Mark 13

Mipanggop Si Mayam-alan Chi Templo

(Mat. 24:1-2; Luk. 21:5-6)

1Lummawa pun si Jesus si templo, kalan chi osaʼn disipulusla, “Mistulu, ilam ked cha mangkabyaɏun byetu ya cha byeɏoy alla! Bibiɏu in-ilonchaʼn langwa.”

2Ot kalan Jesus kan siya, “Mailayu cha allaʼn mangkachakkeɏʼn byeɏoy, ngim chumtong chi timpu un maamin mikusob cha laoy, ked lappun akit matelan si byetu si sigud un igewla.”

Cha Mangagammuwan Si Alungus Chi Eɏgew

(Mat. 10:17-22; 24:3-14; Luk. 21:7-19)

3Ummamuy pun si Jesus ud Bilig un Olivo, un chomangon chi templo, lakaimus cha Peter, James, John ya Andrew kan Jesus ti tummalincha. 4Kalancha, “Ibyegam u kan chikami lu kam-amman chi makwaan chi hachiʼn imbyegam, ked simma mangagammuwanmi un chancheli makwaancha?”

5Ot summongbyat si Jesus un kalala, “Man-alled kayu ta achi kayu maallilaw. 6Achu cha umali un us-useɏoncha ngachenku un kangkalancha, ‘Sakon si Kristu!’ ked achu cha allilawoncha. 7Ked lu chongɏonyu cha manggugubyat, ya chameg un langgugubyat si uchum un ili, achi kayu umogyat. Ti masapuɏʼn makwa katchi, ngim chaampun chi alungus chi lubung. 8Ti manggugubyat cha nasyun, ya manggugubyat bo cha iturayan cha ari. Ked lumoswa cha chita ya uɏat si cha kailiili. Ngim cha laoy siya mallugiyan cha ligligat un isun chi sumigabyen chi buwang chi byebyai un allaʼn umalak.

9“Ngim allechenyu. Ti chokmaan chikayu ked ichiɏum chikayu si korti, ked saplitancha chikayu si sinagoga. Ked mipasangu kayu si cha turay ya cha Ari mipagapu kan sakon, ta hachi wayayu un mangibyega si Bibiɏuʼn Chameg kan chicha. 10Masapuɏʼn umun-ula mibyegbyega chi Bibiɏuʼn Chameg kan cha losan un tagu si ili-ili. 11Ked lu chokmaancha chikayu ya michiɏum kayu si korti, achi kayu machalagen si isongbyatyu, ti mipakaammu kan chikayu ustuʼn ibyegayu. Ti chakampun kan chikayu meɏpuwan chi ibyegayu, ti ha Ispiritun Apudyus chi mangipaspasmok kan chikayu.

12“Si hachiʼn timpu, man-asiibit cha mansusulud ta mapatoy chi suludcha, ya ulay bo cha man-aama ya man-iila. Ked sasangngaon cha aalak cha amacha ya ilacha ked ipaotoycha chicha. 13Ked lawingon chikayu kan cha losan un tagu gapu kan sakon. Ngim lu silu mangipapati si pammatila kan sakon inggalà alungusla, chicha matatagu ing-inggala.”

Ha Mayam-alalaʼd Jerusalem

(Mat. 24:15-22; Luk. 21:20-24)

14Intuɏuy Jesus un kalala, “Lu mailayu hachiʼn patunged ‘Kaog-ogyat un Manyam-an’ un sumisiked si lugeɏʼn chakampun si lobbonglaʼn inggewan. (Cha mamasa si laoy, maawatancha otyan). Ked cha inggew ud Judea, masapuɏʼn umawidcha si bibbilig.#13:14 Daniel 9:27, 11:31, 12:11 15Ha taguʼn awed si otop chi byeɏoyla ked masapuɏʼn achipun lumoksed willu lumlok si byeɏoyla, ta mangaɏa cha alikamola. 16Ha taguʼn inggew si tattaɏun, masapuɏʼn achipun mangulin umoy mangaɏa si takpin chi silupla. 17Si hachiʼn timpu, kadchegu cha mabugi ya cha mantagibi. 18Iluwaluyu kan Apudyus ta achipun miyaspuɏ si timpun chi agilid. 19Ti ha ligat si hachiʼn timpu, ked lappun isula malipud si chamchamun langwaan Apudyus si lubung inggala si sala, ya lappun bo isula si umaliʼn eɏgew. 20Lu achipun Apudyus pilaagobbya cha hachiʼn eɏgew, lappun lin latagu kan cha tagu. Ngim gapu si kachegula kan cha losan un chilutukala, pilaagobbyala cha hachiʼn eɏgew.

21“Ked lu awed mangibyega kan chikayu un kalala, ‘Ilanyu, allaya si Kristu!’ willu ‘Ilanyu, anchiya siya!’ achiyu patiyon. 22Ti lumoswa tuntulli un Kristu ya tuntulli un propeta. Mangipailacha si mangilasilan ya lakaskaschaaw ta mangallilawcha kan cha taguʼn pililiyan Apudyus. 23Ngim man-alled kayu; ilun-ulak imbyegbyega kan chikayu losan cha laoy.”

Ha Umaliyan Chi Alak Chi Tagu

(Mat. 24:29-31; Luk. 21:25-28)

24Intuɏuy Jesus un ibyega, “Si hachiʼn eɏgew, lu lagamput chi amod un ligat, gumikbot chi ilit ya achipun sumeɏeg.#13:24 Isaiah 13:10

25“Man-odcheg cha bituwon un lampeɏpuʼd langit ya mikilug cha losan un pallakabyelin ud langit.#13:25 Isaiah 34:4

26“Ked mailan cha losan un tagu Sakon un Alak chi Tagu un umali un mipati si libuu, ked maila chi kilabyelinku ya lumilalilang chi kila-Apudyusku.#13:26 Daniel 7:13

27“Ked ibuunku cha angheles un umoy si losan un ilid chi lubung ta chaguponcha cha taguʼn chilutukan Apudyus.”#13:27 Deuteronomy 20:4, Zechariah 2:6

Ha Maacheɏ Si Kayuʼn Igus

(Mat. 24:32-35; Luk. 21:29-33)

28Ot kalan bo Jesus, “Achaɏonyu itudtuchun chi kayuʼn Igus. Lu lugiyalan sumimit cha pingila ya utela, tagammuyu un chanchali chegun. 29Isula bo, lu mailayu un makwa cha allaʼn ilugudku, ammuyu un chancheli mangulilak kasin utla pita. 30Tuttuwa ibyegak kan chikayu, sissiyan matattagu cha uchum un tagu si salaʼn lolap, ked makwa losan cha laoy. 31Maumas losan cha awed langit ya utla pita ngim ha ugudku achipun pulus maumas.”

Ha Timpun Chi Mangulilan Jesus

(Mat. 24:36-42; Luk. 17:26-30)

32Ot kalan bo Jesus, “Lappun mangagammu si hachiʼn eɏgew willu uras, ulay cha angheles ud langit ya ulay sakon un Alak Apudyus, ngim abus si Ama sintagammu. 33Man-alled kayu mansagala ti achipunyu ammu lu chumtong chi hachiʼn timpu. 34Ha gumatngak, ked isun chi taguʼn ummoy lambyaat. Ked lu umoyon, impiyeɏla kan cha bubùulola losan un biyangcha. Bililola man-aachug si sawang ta sasaggalaola. 35Katchi boʼn mansasaggala kayu ti achipunyu ammu uras un mangulilan chi Apu, maschom willu gawan labi, chokak tullakok, willu bigbigat. 36Mansasaggala kayu ti lu mangulilak achipunku otyan maochesan chikayu un masusuyop. 37Ha ibyegak kan chikayu, ked ibyegak kan cha losan un tagu: Sasaggalaonyu!”

Currently Selected:

Mark 13: HUA

Highlight

Copy