RUKA 5

Arutwa ba mbere ba Yiesû

(Math. 4:18-22; Mko. 1:16-20)

1Îgiita rîmwe Yiesû arûngi rûteere rwa Îria rîa Ngenesareeti, kîrîndî kîamwinyîka kîthikîîrîîtie ntheto ya Ngai. 2Yiesû oona matarû maîrî rûteere rwa îria matarî na antû. Eene mo baarî ategi ba makûyû. Ibaarî bakuuma baathi kûthambia neeti ciao. 3Yiesû aathûngîra îtarûûni rîa muntû eetagwa Simioni amwîra arîtindîke riume rûgombeeni rwa îria rîthiyange ndiani. Aakara nthî îtarûûni rîru, aanjîîria kûrutana antû arî ku.

4Akûthiria kwaria, eera Simioni, “Iranga îtarû ndiani, bûgere neeti cienu bûgwate makûyû.”

5Simioni amûcookeria amwîra, “Mwathani, tûramategire ûtugû bunthe na gûtirî rîo tûragwata. Îndî n'ûntû ûkuuga, ka ngere neeti rûûyîîni.” 6Simioni na bara bangî baarî na bo, baarûtha ûgu Yiesû aabeerire. Bakûrûtha ûgu, baagwata makûyû maingî mûno, mwanka neeti cienda gûtuîkanga. 7Baanjîîria kûûnya ategi bara baarî îtarûûni rîra rîngî baaya kûbagwatia kûruûra neeti. Babu bangî baaya. Baagwatania baûyûria matarû marî maîrî mwanka meenda kûriama rûûyîîni n'ûrito.

8Simioni Petûrû akwona ûgu, aaturîria Yiesû maru amwîra, “Tigana naani Mwathani n'ûntû ndî mwîyia!” 9Simioni na bara bangî baarî na bo baarigara i makûyû mamu baagwete maingî ûgu. 10Na wana kinya aana ba Cabendi bara beetagwa Njakubu na Njoana, bara baarutanagîria ngûgî na Simioni baarigara n'ûntû bûbu.

Yiesû eera Simioni, “Ûtigaakuthûke. Kuuma îîndî ûgaatua gûtegaga antû ûkîbareetaga kîrî niû.”

11Simioni na bara bangî baumîria matarû maao rûgombeeni, baatiganîria into biao bionthe baathingata Yiesû.

Yiesû ooria muntû aayîîtue mûtigiri

(Math. 8:1-4; Mko. 1:40-45)

12Îgiita rîmwe, Yiesû naarî taûni yarî na muntû aayîîtue mûtigiri. Muntû ûyu akwona Yiesû aaya kîrî we. Amûturîria maru ûthiû bwake bûtongithîîtie nthîgûrû, amwereka amwîra, “Mwathani, weegua wenda kûmboria, mboria nthere.”

13Yiesû aatambûrûkia njara yake amûringithia. Amwîra, “Inkwenda, thera!” Nthûti îmwe muntû ûyu oora mûtigiri. 14Yiesû amwîra, “Ûtikeere muntû. Îndî îthi wonwe i mûthînjîri wa Ngai, ûrute kîewa kîra Musa augire kîrutagwe kîrî ûkûûyî kîrî antû.”

15Amwe na ûgu, nkuma ya Yiesû yatamba nthîgûrû yonthe. Kîrîndî kingî gîa antû gîatua kûûya kûmûthikîîria gîkîorua. 16Îndî Yiesû eebathûraga akathi bantû gûtarî antû kûrombera noogo.

Yiesû ooria muntû aarî kîonje

(Math. 9:1-8; Mko. 2:1-12)

17Ntugû îmwe Yiesû akîrutanaga, *Abarisai na aarimû bamwe ba watho ibaarî agu. Baumîîte bwa taûni cia Gariiri, Njundea na Njerusaremu. Yiesû naarî na inya ya kworia aayie. 18Antû bamwe baaya bakamatîîte kîonje na mamaamîro mara kîamaamagîra, bakîreeteete kîrî Yiesû. Antû babu bagûceria a gûgîkûrûkîîria bakiira ara Yiesû aarî bakîmaamia mbere yake, 19baaga n'ûntû bwa antû kwingîa. Baatwa rûûgûrû rwa nyomba baaromora, bakîîndamîîria oogo kîrî mamaamîrooni ma kîo mwanka gatîgatî ga antû, ara Yiesû aarî.

20Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”

21Aarîmû ba watho na Abarisai baatua kûthûgaania na nkoro bakeebûûria, “Muntû ûyû nakwîthûkia taka arî Ngai! Anga ti Ngai wenka aûmba kûrekera muntû meeyia?”

22Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu? 23I bûrîkû bûûthû? I kuuga, ‘Ûkûrekerwa meeyia maaku,’ kana i kuuga ‘Ûkîîra ûthi’? 24Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku, “Ûkîîra ûkamate matandîko maaku wînûke.” 25Nthûti weenu kîonje gîku gîaûkîîra bacûûbîîte, gîakamata mamaamîro ma kîo mara gîakamatîîtwe na mo, kîenûka gîgîkumagia Ngai.

26Antû bonthe bakwona ûgu, baarigara mûno. Baakumia Ngai bamakîîte mûno bauga, “Tûkwona mantû makûrigaria îmunthî.”

Raawî eetwa i Yiesû

(Math. 9:9-13; Mko. 2:13-17)

27Nyuma yoogu Yiesû aumagarûka. Athiîte oona muntû eetagwa Raawî akari nthî ara aakaraga, akîrûngithagia ûgooti. Amwîra, “Nthingata!” 28Raawî aûkîîra aatiganîria into biake bionthe amûthingata.

29Raawî aathuuranîra Yiesû kîatho kîînene mûno mûciî wake. Ageni bamwe bara baarî oogo, baarî arûngithia ûgooti na antû bangî. Yiesû aakaranîîrîîte na bo bonthe meethaani îmwe bakîrîyaga. 30*Abarisai bamwe na aarimû bamwe ba watho bakwona ûgu, baanung'una kîrî arutwa baake, bakîûragia, “I kî gîgûtûma bûrîyanîra na bûnyunyanîra na arûngithia ûgooti na eeyia?”

31Yiesû abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa. 32Ntaaya gwîta antû bara baagîru. Ndaayire gwîta bara eeyia kaingo beerira.”

Gûtîîrîra kûrîa irio n'ûntû bwa maromba

(Math. 9:14-17; Mko. 2:18-22)

33Baûria Yiesû, “I kî n'ûntû arutwa ba Njoana na ba *Abarisai bo batîîragîra kûrîa irio n'ûntû bwa maromba, îndî baaku barîyaga na bakanyua?”

34Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki? 35Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.”

36Yiesû abaa ngerekano auga, “Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa, gîtaame gîku igîkaamîkuuyia. 37Na gûtirî muntû eekagîra ûkî bwa kûrugwa warîru nceemaani înkûrû, n'ûntû ibûgaatûûmûra nceema înu bûûre mana na nceema mbene. 38Ûkî bwa kûrugwa warîru bwîkagîrwa nceemani îtarî nkûrû. 39Gûtirî we eendaga kûnyua ûkî bûtarî bwîru bwega anyuîte ûkî bwîru n'ûntû akauga, ‘Ûkî bwîru i bu bûrî mûrîo.’ ”

Currently Selected:

RUKA 5: thk

Highlight

Copy