RUKA 6
6
Yiesû Mwathi wa Sabatû
(Math. 12:1-14; Mko. 2:23-28)
1Ntugû îmwe ya *Sabatû Yiesû nakûrûkîîrîîte mîndaani ya ngano. Arutwa baake baanjîîria kuuna ngano bagiikithaga na njara bakarîa. 2*Abarisai bamwe babaûria, “I kî n'ûntû bûkûrûtha bûra bûtabuîrîîte kûrûthwa ntugû ya Sabatû?”
3Yiesû abacookeria abeera, “Ka bûtaathooma bûra Ndaundi na antû bara baarî na bo baarûthire beegua yûûra? 4Aathiire nyomba ya Ngai aathûkia mîgaate îra mîtheru aarîa na aarûmia bara baarî na bo, na ibwiyî mîgaate înu îtikîrûmwa i muntû ûngî tatiga *athînjîri ba Ngai bonka.” 5Yiesû abeera, “Mwana wa Muntû n'we Mwathi wa Sabatû.”
Yiesû ooria muntû ntugû ya Sabatû
(Math. 12:9-14; Mko. 3:1-6)
6Ntugû îngî ya *Sabatû, Yiesû aathi *sinagoogiini îmwe aarutana. Ikwarî na muntû ûmwe ku oonjete njara ya ûrîo. 7*Abarisai bamwe na aarimû ba watho ibaacûaga ûntû bwa kûthitangîra Yiesû. Baarîthania n'we boona kana akoorania ntugû ya Sabatû. 8Yiesû akûmenya mathûgaania maao, eera muntû ûyu aarî na njara îmbonju, “Ncû ûrûngame aaga mbere.” Muntû ûyu aûkîîra aarûngama oogo.
9Yiesû abaûria, “Inkûbûûria, *watho bwîtîgîîrîîtie muntû arûtha bwega kana i bûûthûûku ntugû ya Sabatû? I kwonokia mwoyo kana i gûcuûraga?” 10Aathiûrûûkia meetho abaraitha bonthe. Rîru eera muntû ûyu aarî mwonju njara, “Tambûrûkia njara yaku.” Muntû ûyu amîtambûrûkia, yabua. 11Abarisai na aarimû ba watho baathûûra mûno. Baanjîîria kwaranîria batua bûra bakaamûrûtha.
Yiesû aataara atûmwa îkûmi na baîrî
(Math. 10:1-4; Mko. 3:13-19)
12Kagiitaani gaku Yiesû aatwa karîmaani kûromba. Aareere naagu akîrombaga Ngai ûtugû bunthe. 13Rûûni rûkîîrî eeta arutwa baake, aathuura îkûmi na baîrî kuuma kîrî bo abeeta atûmwa. 14Mariîtwa ma bara aataarire maarî, Simioni ûra kaîrî eetire Petûrû, mûruagina Enderea, Njakubu, Njoana, Piripû, Bathoromayo, 15Mathayo, Tooma, Njakubu wa Arubayo, Simioni ûra eetagwa Ciroti, 16Njundas wa Njakubu, na Njundas Mûcikariota ûra aakunyanîîre Yiesû amûgwatithia.
Yiesû aarutana na oorania
17Yiesû na atûmwa baake bakûgûrûka bauma karîmaani gaku, baarûngama mwaranthî. Kîrîndî kingî kîa arutwa baake kîamwîthîranîra. Ikwarî kinya na antû bangî ba kuuma Njundea yonthe, Njerusaremu, na ba kuuma akubî na îria rîa Turo, na Sindoni. 18Baayîîte kwîgua Yiesû agîtûmîîria bakîorua ndwari ira baayîîtue. Na bara baathîînagua n'irundu biithûûku wana bo ibaayire, boorua. 19Antû bonthe ibaageragia gûtonga Yiesû na njara, n'ûntû inya ya kworania yaumaga kîrî we îkabooria bonthe.
Gîkeno na kîeba
(Math. 5:1-12)
20Yiesû aaraitha arutwa baake auga,
“Kîthaarimo i kîrî biû bara bûrî na ûkîa,
ûnene bwa Ngai i bwenu.
21Kîthaarimo i kîrî biû bara bûrî na yûûra îîndî,
bûkaabaa.
Kîthaarimo i kîrî biû bara bûkûrîra îîndî,
bûkaatheka.
22Kîthaarimo i kîrî biû rîra antû bakûbûmena,
na rîra bakwîbathûrana naabi, rîra bakûbûbûthia,
na kûbûthûûkîria mariîtwa meenu
n'ûntû bwa Mwana wa Muntû.
23“Kenaani bwona ûgu bûtûûbatûûbe i gîkeno! Kîewa kîenu îgûrû i kîînene. Nwa ta bu biûyûûyû biao biarûthire iroria.
24“Îndî bûkoona thîîna mûno, biû bara bûrî itonga,
kûganîrwa kwenu nwa gûku.
25Bûkoona thîîna mûno, biû bara bûbai îîndî,
bûkaabûûta.
Bûkoona thîîna mûno, biû bûkûtheka îîndî,
bûkaagwatwa i kîeba nkorooni bûnyinyire.
26Bûkoona thîîna mûno biû bûgûkumua n'antû,
woogu nwa bu biûyûûyû bienu biarûthagîra iroria bia ûrongo.”
Endaga anthû baaku
(Math. 5:38-48)
27Yiesû abeera, “Biû bûrî aaga bûkwîgua, ga nkûbwîra, endagaani anthû beenu na rûthagîraani bwega bara babûmenaga. 28Thaarimagaani bara babûrîrîkaga na rombagîraani bara babûthîînagia. 29Muntû agakûringa îkoobi rûthea rûmwe mûgarûrîre kinya rûru rûngî aringe. Muntû agagûtunya îgooti rîaku mûnenkere wana caati mbene. 30Muntû agakûromba gîntû ûtikaarege kûmûteethia. Na ûra agaagûtunya into biaku ûtikamûrandûke bio.
31“Rûthagîraani bara bangî bûra wana biû bwendaga babûrûthîra. 32Bwenda wabara babwendeete bonka akî rî, i bûrîkû bûnene bûra bûgaatûma bûthaarimwa? Anga wana eeyia batiendaga bara babeendeete! 33Bwarûtha bwega kîrî bara babûrûthagîra bwega akî rî, i bûrîkû bûnene bûra bûgaatûma bûthaarimwa? Wana eeyia ibarûthaga ûgu. 34Na bûgatua gûkoobithagia wabara baûmba kûbûrîa bonka rî, i bûrîkû bûnene bûra bûgaatûma bûthaarimwa? Wana eeyia ibakoobanaga na bakarîana. 35Endagaani anthû beenu na barûthagîreeni bwega. Koobithanagiani bûtakwîrîgîîra kûrîgwa, na kîewa kîenu ûkeegua kîrî kîînene. Bûgaatuîka aana ba ûra arî îgûrû mûno. We n'ûmwega kîrî bara batarî nkaatho na bara bathûûku. 36Îgaguani bûrî antû ba kîao ta bûra Abaagu arî wa kîao.”
Ûtikaagiitîre bara bangî îgamba
(Math. 7:1-5)
37Yiesû abeera, “Bûtikaagambithie bara bangî bûûya kûgambithua. Bûtikaagiitîre bara bangî îgamba naabi bûtigiitîrwa. Rekanagîraani naabi bûkaarekerwa.
38“Eyanagaani naabi Ngai akabwaa. Kîra ûkeeyana i kîo na woû ûgaacookerua kîûyûrîîtue na kîathûmbîîrua. Kîthimi kîra ûkaathimîra na kîo bara bangî, wana woû i kîo ûkaathimîrwa na kîo.”
39Yiesû abaa ngerekano abeera, “Ntûngi îtiûmba kûgwata îra îngî mûtî. Îkamîgwata ibagwa îrinyaani bonthe. 40Mûrutwa atirî îgweta nkûrûki ya mwarimû wake. Îndî mûrutwa wonthe ûra arutanîîtwe bwega, agaakara ta mwarimû wake.
41“N'ata ûkwonanga gakaracû karî riitho rîa mûcoore waku, îndî ûtikwona mûgogo ûra ûrî riitho rîaku? 42N'ata ûûmba kwîra mûcoore waku, ‘Ga nkûrute gakaracû riitho,’ na ûtikwona mûgogo ûra ûrî riitho rîaku? Woû mwîbwithia! Amba wîrute mûgogo riitho rîaku kaingo ûûmba kwona bwega gakaracû kara karî riitho rîa mûcoore waku, ûmûrute ko.”
Mûtî ûmenyekanaga na maciaro ma uu
(Math. 7:17-20)
43Yiesû abeera, “Mûtî ûmwega ûticiaraga maciaro maathûûku. Na mûtî ûmûthûûku ûticiaraga maciaro meega. 44Mûtî ûmenyekanaga na maciaro ma uu. Ûtiûmba gûtua nkûyû mûtîîni ûrî na mîîgua, kana ûtua mabeera mûgaani. 45Muntû ûmwega arûthaga mantû meega mara maumaga nkorooni yake. Muntû ûmûthûûku arûthaga mantû maathûûku mara maumaga nkorooni yake. Kanyua kaaragia mara maûyûrîîte nkorooni.”
Aaki baîrî
(Math. 7:24-27)
46Yiesû abeera, “I mbi bûmbîtagîra, ‘Mwathani, Mwathani,’ na bûtirûthaga bûra mbendaga kûrûthwa? 47Muntû wonthe ûra aayaga kîrî niû akeegua ntheto ciakwa agacirûtha, nkabwîra bûra akari. 48Akari ta muntû ûra mbere ya gwaka nyomba yake aambire eenja mûcingi ûmûriku, aarûngîka nyomba yake rwaraani rûûmîîte ta iiga. Kinya mbura îkuura mûguû waya wamîkûmba, nyomba înu îteenyenya n'ûntû nîakîîtwe bwega. 49Îndî muntû ûra eegagua ntheto ciakwa na atarûthe bûra mbendaga kûrûthwa, akari ta muntû ûra aakire nyomba îtarî na mûcingi. Mbura îkuura mûguû waya wamîkûmba, nyomba înu yaturana nthî, yoombokana. Kûgwa kûra yagwîre kwarî kûûnene mûno!”
Currently Selected:
RUKA 6: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy
