MATAIO, 27

O LE MATAUPU XXVII.

O le faasatauroina o Iesu.

1Ua ao, ona taupulepule ai lea o le au faitaulaga sili uma ma toeaina o le nuu ia Iesu ina ia fasioti ia te ia; 2ua latou noanoa ia te ia, ona latou ta‘ita‘i ai lea ia te ia, ma tuu atu ai ia Ponotio Pilato le alii.

3Ua iloa e Iuta, o le na faalataina o ia, ua faasalaina o ia, ona salamo ai lea o ia, ua toe ave tupe e tolugafulu i le au faitaulaga sili ma toeaina, ua faapea atu, 4Ua ou agasala, ina ua ou faalata le ua le sala. A ua latou faapea mai, Sa matou mea ea lena? faitalia lava oe. 5Ona lafo ai lea e ia o tupe i le malumalu, ua alu ese; ona alu ai lea o ia ua noa o ia e ia. 6Ona tago ai lea o le au faitaulaga sili i tupe, ua faapea ane, E sa ona tuu ia mea i le mea e teu ai oloa, auā o le tau o le toto. 7Ua latou filifili, ona faatau a‘i lea o le fanua o le fai ipu omea, e tatanu ai tagata ese. 8O le mea lea ua igoa ai lea fanua, O le fanua o le toto, ua oo lava i nei ona po. 9Ona taunuu ai lea o le upu a le perofeta o Ieremia, ua faapea mai, Ua latou tago i tupe e tolugafulu, o le tau lea o le na faatatauina, na faatatauina e nisi o le fanauga a Isaraelu; 10ona latou faatau a‘i lea o le fanua o le fai ipu omea, e pei ona fetalai mai ai ia te au o le Alii.

11Ua tu Iesu i luma o le alii; ona fesili mai ai lea o le alii ia te ia, ua faapea mai, O oe ea o le tupu o tagata Iutaia? Ona fetalai atu ai lea o Iesu ia te ia, O lea lava. 12Ua momoli ia te ia e le au faitaulaga sili ma toeaina, a ua leai sana tali. 13Ona fai mai ai lea o Pilato ia te ia, Ua e le faalogo ea i le tele o mea ua latou molimau mai ai ia te oe? 14A ua le tali atu ia ia te ia i se upu e tasi; ona matuā ofo ai lea o le alii.

15Ua masani le alii e tatala atu i lea tausamiga ma lea tausamiga i le motu o tagata se tasi tagata ua noanoatia, o le ua latou loto i ai. 16O ona po ia sa i ai ia te i latou le tagata ua noanoatia ua logologoa, e igoa ia Parapa. 17O lea na fai atu ai Pilato ia te i latou, ina ua potopoto i latou, Po o ai tou te loto i ai ou te tatalaina atu ia te outou? o Parapa ea? po o Iesu le ua igoa ia Keriso? 18Auā ua na iloa o le mataua na latou tuuina atu ai o ia. 19Ua tietie o ia i le nofoa faamasino, ona sau ai lea o le feau mai lana avā, ua faapea mai, Ne‘i e mao i lea tagata amiotonu; auā na ou matuā tigaina analeila i le miti ia te ia. 20A ua faaoso e le au faitaulaga sili ma toeaina i le motu o tagata ia latou fai atu, o Parapa, a ia fasiotia Iesu. 21Ona fai atu ai lea o le alii, ua faapea atu ia te i latou, O ai so laua tou te loto i ai ou te tatalaina atu ia te outou? Ona latou fai mai ai lea, O Parapa. 22Ona fai atu ai lea o Pilato ia te i latou, Se a foi le mea ou te faia ia Iesu o le ua igoa ia Keriso? Ona fai mai ai lea o i latou uma ia te ia, Ia faasatauroina ia. 23A ua fai atu le alii, Pe se a foi se leaga ua ia faia? A ua atili ai ona alalaga i latou, ua faapea mai, Ia faasatauroina ia. 24Ua iloa e Pilato, ua le aoga lana upu, a e atili ai le vāvaō, ona tago ai lea o ia i le vai, ua fafano ai ona lima i luma o le motu o tagata, ua faapea atu, Ou te mamā a‘u i le toto o lenei tagata amiotonu; faitalia lava outou. 25Ona tali mai ai lea o le nuu uma, ua faapea mai, Ia i luga ia i matou, ma a matou fanau lona toto. 26Ona tatalaina atu ai lea e ia o Parapa ia te i latou, a ua sasaina e ia o Iesu, ma tuuina atu o ia ia faasatauroina.

27Ua ta‘ita‘iina Iesu e le ‘au a le alii i le maota o le alii, ona latou faapotopotoina ai lea ia te ia o le ‘au uma. 28Ua latou toeseina ona ofu, ona latou faaofuina ai lea o ia i le ofu mūmū. 29Ua latou taataai foi laau tuitui ua fai a‘i le pale, ona latou faaee ai lea i lona ao, ua tuu foi le u i lona aao taumatau; ona latou tootuli ai lea i ona luma, ua faatauemu mai ia te ia, ua faapea mai, Talofa, le tupu o tagata Iutaia! 30Ua feanu i latou ia te ia, ona latou tago ai lea i le u, ma ta i lona ao. 31Ua uma ona latou faatauemu mai ia te ia, ona latou tatala ese lea o le ofu, ma faaofu ia te ia i ona lava ofu; ona latou ta‘ita‘i atu ai lea ia te ia ia faasatauroina. 32Ua latou o atu, ona iloa ai lea e i latou o le tagata Kurene, e igoa ia Simona, ua latou faatauanau ia te ia ia ave lona satauro. 33Ua latou oo atu i le mea ua igoa ia Kolokota, o lona uiga, O le mea o i ai le ulupoo; 34ona latou avatu lea ia te ia le vineta ua fefiloi ma le laau oona, ia inu ai; ua tofotofo e ia, a ua le mafai ona inu ai. 35Ua latou faasatauro ia te ia, ona tufatufa ai lea e i latou o ona ofu, ua latou fai ai le vili; ina ia taunuu ai le upu a le perofeta, Ua latou tufatufaina o‘u ofu mo i latou, ua latou faia foi le vili i lo‘u ofu tino. 36Ua latou nonofo i lea mea ua leoleo ia te ia. 37Ua latou tuu foi i luga ae o lona ao le tusi i le mea na molia ai o ia, O IESU LENEI, O LE TUPU O TAGATA IUTAIA. 38Ona latou faasatauro lea faatasi ma ia tagata fao mea e toalua, o le tasi i le itu taumatau, ma le tasi i le itu tauagavale. 39Ua upu leaga ia te ia o e na ui ane, ma lialiai o latou ulu, 40ua faapea mai, O oe na, o lē lepeti i le malumalu, ma toe faia i aso e tolu, ina faaola ia oe ia te oe. Afai o oe le Alo o le Atua, ina alu ifo ia i le satauro. 41Ua faapea foi ona faatauemu o le au faitaulaga sili, ma le au tusiupu, ma toeaina, ua faapea ane, 42Na ia faaolaina isi tagata, e le mafaia e ia ona faaola ia te ia. Afai o le Tupu o Isaraelu o ia, ina alu ifo nei lava o ia i le satauro, ona tatou talitonu ai lea ia te ia. 43Na faatuatua ia i le Atua, ina laveai mai nei o ia ia te ia, afai e finagalo o ia ia te ia; auā na ia fai mai, O a‘u o le Atalii o le Atua. 44Ua faapea foi ona upu leaga ia te ia o tagata fao mea ua faasatauroina ma ia.

45Ua fua mai i le itu aso e ono, ua pogisa uma ai le nuu, ua oo lava i le itu aso e iva. 46Ua lata i le itu aso e iva, ona alaga ai lea o Iesu ma le leo tele, ua faapea atu, Eli, Eli, lama sapatani? o lona uiga lenei, Lo‘u Atua e, lo‘u Atua e, se a le mea ua e tuulafoai mai ai a‘u? 47Ua faalogo ai nisi o e na tutū mai, ona latou faapea atu ai lea, Ua valaau atu lenei tagata ia Elia. 48Ona momo‘e loa ai lea o so latou, ua tago i le omomi, ua fufui ai i le vineta, ma tuu i luga i le pito laau, ua faainu ia te ia. 49A ua faapea ane i latou uma, Tuu ai pea ia, se‘i tatou iloa pe sau Elia na te faaolaina o ia. 50Ua toe alaga Iesu ma le leo tele, ona tuuina atu ai lea e ia o lona agaga. 51Faauta foi, ua saeluaina le ie puipui o le malumalu, ua amata ifo i luga, ua oo i lalo; ua luluina foi le eleele, ua mavaevae foi papa; 52ua avanoa foi tuugamau, ua toe tutū mai foi tino o tagata paia e toatele na momoe, 53na mavae foi lona toe tu mai, ona latou o mai ai lea nai tuugamau, ma latou o atu i le aai paia, ua iloa i latou e tagata e toatele. 54O le ta‘ita‘i foi o le toaselau, ma e na leoleo ia Iesu faatasi ma ia, na latou iloa le mafuie ma mea na faia, ona latou matuā matatau ai lea, ua faapea ane, E moni, o le Alo lava lenei o le Atua. 55Sa i ai foi fafine e toatele na vaavaai mamao mai, o i latou ia na mulimuli mai ia Iesu mai Kalilaia, ma auauna mai ia te ia; 56sa i ai ia te i latou o Maria le Makatala, ma Maria le tinā o Iakopo ma Iose, o le tinā foi o atalii o Sepetaio.

57Ua oo i le afiafi, ona sau ai lea o le tasi tagata mauoa, o le Arimataia, e igoa ia Iosefa, o ia foi o le soo o Iesu; 58ua alu atu o ia ia Pilato, ua faanoi atu ai i le tino o Iesu. Ona fai atu ai lea o Pilato ia tuu ane le tino. 59Ua ave e Iosefa le tino, ona aui ai lea i le ie lino e mamā. 60Ua tuu ai i lona tuugamau fou na foa i le papa; ua fuli atu e ia le maa tele i le gutu o le tuugamau, ona alu ai lea o ia. 61Sa i ai Maria le Makatala, ma le isi Maria, sa la nonofo feagai ma le tuugamau.

62O le taeao, o le aso lea e tuaoi ma le aso o le sauniga, ua faapotopoto atu ai ia Pilato le au faitaulaga sili ma le au faresaio, 63ua faapea atu, Le alii e, ua matou manatua, na fai mai lena tagata pepelo, ina o ola mai o ia, A mavae aso e tolu ou te toe tu mai ai. 64O lenei, ia e fetalai ane, ia faamauina le tuugamau seia oo i le aso tolu, ina ne‘i o atu ona soo i le po, ma gaoi ia te ia, ma latou fai atu i le nuu, Ua toe tu mai ia nai e ua oti; ona sili ai lea o le pepelo e mulimuli i le na muamua. 65Ona fai ane ai lea o Pilato ia te i latou, Ua ia te outou leoleo, ina o ia, faitalia lava outou ona faamau ai. 66Ona latou o ai lea, ua faamauina le tuugamau, ua faamaufaailoga i le maa, ma tuu ai tagata e leoleo.

Currently Selected:

MATAIO, 27: SOV

Highlight

Copy