MATAIO, 26

O LE MATAUPU XXVI.

Ua taupulepule le au faitaulaga sili ia Iesu e fasioti ia te ia.

1Ua faaiu e Iesu o ia upu uma, ona fetalai atu ai lea o ia i ona soo, 2Ua outou iloa a mavae aso e lua ona fai ai lea o le paseka, e tuuina atu ai le Atalii o le tagata ina ia faasatauroina. 3O ona po ia ua faapotopoto ai le au faitaulaga sili, ma le au tusiupu, ma toeaina o le nuu i le maota o le faitaulaga sili, e igoa ia Kaiafa; 4ua latou taupulepule i se mailei e mafai ai ona pue, ma fasioti ia Iesu. 5A ua latou faapea ane, Aua le faia i le tausamiga, ina ne‘i faanunununu ai le nuu.

6Sa i Petania Iesu i le fale o Simona le lepela, 7ona sau ai lea ia te ia o le fafine ma le fagu alapasa ua i ai le suāuu manogi tau tele, ona liligi ai lea e ia i lona ao a o taoto ia e taumafa. 8Ua iloa e ona soo, ona tiga ai lea o latou loto, ua latou faapea ane, Se a le mea ua faamāumau ai lena mea? 9auā ana faatauina lena suāuu manogi po ua tele sona tau, e foaiina atu ai i e matitiva. 10A ua silafia e Iesu, ona faapea atu ai lea o ia ia te i latou, Se a le mea ua outou faalavelave ai i le fafine? auā o le mea lelei ua na faia ia te au nei. 11Auā tou te nonofo pea ma e matitiva; a o a‘u nei, tatou te le nonofo pea ma a‘u. 12Auā ua liligi e ia lenei suāuu manogi i lo‘u tino e fai ma faataimuaga o lo‘u tanuga. 13E moni, ou te fai atu ia te outou, o nuu uma i le lalolagi e tala‘iina atu i ai lenei tala lelei, e ta‘ua ai le mea ua faia e lenei fafine, e faamanatu a‘i ia te ia.

14Ona alu ai lea o le tasi o le toasefulu ma le toalua, e igoa ia Iuta le Sekara, i le au faitaulaga sili, 15ua faapea atu, Se a le mea tou te au mai ma‘u, ou te faalataina ai o ia ia te outou? Ona latou avane ai lea ia te ia o tupe e tolugafulu. 16Talu ai lea aso ua lamalama e ia se itu aso e faigofie ai ona faalataina o ia.

17O le muai aso o areto e le faafefeteina ua o mai ai le au soo ia Iesu, ua faapea mai ia te ia, Po o fea le mea e te finagalo i ai matou te saunia e te taumafa ai le paseka? 18Ona faapea atu ai lea o ia, Ina o atu ia i le aai i le tasi tagata, ma fai atu ia te ia, Ua fai mai le a‘oa‘o, ua latalata o‘u aso; matou te fai ai le paseka ma o‘u soo i lou fale. 19Ona faia lea e ona soo e pei ona fetalai atu ai Iesu, ua saunia foi le paseka.

20Ua oo i le afiafi, ona taoto ai lea o ia e taumafa faatasi ma le toasefulu ma le toalua. 21O loo latou aai, ona fetalai atu ai lea o ia, E moni ou te fai atu ia te outou, e faalataina a‘u e so outou. 22Ona latou matuā tiga ai lea, ua latou taitasi ma fai mai ia te ia, Le Alii e, o a‘u ea? 23Ona tali atu ai lea o ia, ua faapea atu, O lē fufui faatasi lona lima ma lo‘u i le tanoa, o ia lea na te faalataina a‘u. 24E alu lava le Atalii o le tagata e pei ona tusia ia te ia; a o le tagata na te faalataina le Atalii o le tagata oi talofa ia te ia! e lelei i lea tagata pe ana le fanau mai o ia. 25Ona tali mai ai lea o Iuta le na faalataina ia, ua faapea mai, Rapi e, o a‘u ea? Ua fetalai atu o ia ia te ia, O lena lava.

26O loo latou aai, a e tago Iesu i le areto, ua faafetai, ona tofitofi ai lea, ma avatu i le au soo, ua faapea atu, Ina tago ia, ina aai; o lo‘u tino lenei. 27Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, Ina inu ia outou uma i ai; 28auā o lo‘u toto lenei, o le toto o le feagaiga fou, ua faamaligiina mo tagata e toatele e faamagalo a‘i agasala. 29Ou te fai atu foi ia te outou, ou te le toe inu lava i lenei fua o le vine, seia oo i lea aso ou te inu ai le uaina fou faatasi ma outou i le malo o lo‘u Tamā. 30Ua uma ona fai o a latou pese, ona latou o atu ai lea i le mauga o Olive.

31Ona fetalai atu ai lea o Iesu ia te i latou, E tausuai outou uma ona o a‘u i lenei lava po; auā ua tusia, Ou te taia le leoleo mamoe, ona taapeape ai lea o le lafu mamoe. 32A e a mavae lo‘u toe tu, ona ou muamua atu ai lea ia te outou i Kalilaia. 33Ona tali mai ai lea o Peteru, ua faapea mai ia te ia, E ui lava ina tausuai o tagata uma ona o oe, ou te le tausuai lava a‘u. 34Ona fetalai atu ai lea o Iesu ia te ia, E moni, ou te fai atu ia te oe, o lenei lava po, a o lei vivini moa, e te faafiti faatolu mai ai ia te au. 35Ona fai mai ai lea o Peteru ia te ia, E ui ina tā oti lava faatasi ma oe, ou te le faafiti lava ia te oe. Ua faapea foi ona fai mai o le au soo uma lava.

36Ona oo ai lea o Iesu faatasi ma i latou i le fanua ua igoa ia Ketesemane; ua faapea atu foi o ia i le au soo, Ia outou nonofo iinei, seia ou alu atu iilā ou te tatalo. 37Ua o ane o ia ma Peteru ma atalii o Sepetaio e toalua, ona tiga lea o ia ma atuatuvale. 38Ona fetalai atu ai lea o ia ia te i latou, Ua matuā tiga lo‘u loto e oo i le oti; ia outou nonofo pea iinei, ma ia tatou mataala faatasi ma a‘u. 39Ua maliu faaitiiti atu i luma, ona faapaū fao ai lea o ia ma tatalo, ua faapea atu, Lo‘u Tamā e, afai e mafai, ia ave ese lenei ipu ia te au; a e aua le faia lo‘u loto, a o lou finagalo. 40Ona maliu ane lea o ia i ona soo, ua maua i latou o momoe, ona fetalai atu ai lea o ia ia Peteru, Pe faapena ea ona outou le lavā ona tatou mataala faatasi ma a‘u i le itu po e tasi? 41Ia outou mataala ma tatalo, ina ne‘i oo mai le faaosoosoga ia te outou; ua manao i ai le loto, a o le tino ua vaivai. 42Ua toe maliu ane ia o le atu lua lea, ua tatalo, ua faapea atu, Lo‘u Tamā e, a le mafai ona ave ese o lenei ipu ia te au seia ou inu ai, ia faia lou finagalo. 43Ona maliu ane ai lea o ia ua maua i latou ua toe momoe; auā ua maaa o latou laumata. 44Ona tuua lea o i latou e ia, ua toe maliu ane, ua tatalo o le atu tolu lea, ua fetalai atu i le upu lava e tasi. 45Ona maliu ane ai lea o ia i ona soo, ua faapea atu ia te i latou, Ina momoe pea ia, ma malolo; faauta, ua latalata le itu po e faalataina ai le Atalii o le tagata i lima o tagata agasala. 46Ina tutū ia, tatou o; faauta, ua latalata mai o ia na te faalataina a‘u

47Faauta, o loo fetalai o ia, a sau Iuta, o le tasi o le toasefulu ma le toalua, ua faatasi mai foi ma ia le motu o tagata e toatele, mai le au faitaulaga sili ma toeaina o le nuu, ua ia te i latou o pelu ma uatogi. 48Na tuuina atu foi e le na faalataina o ia le faailoga ia te i latou, ua faapea atu, O lē ou te sogi atu i ai, o ia lea; ia outou pue ia te ia. 49Ona sau loa lea o ia ia Iesu, ua faapea mai, Rapi e, si o‘u alofa; ona sogi ai lea o ia ia te ia. 50Ona fetalai atu ai lea o Iesu ia te ia, Sole, se a le mea ua e sau ai? Ona latou o mai ai lea, ua tago atu o latou lima ia Iesu, ua latou pue ia te ia. 51Faauta foi, o le tasi o e na ia Iesu, ua tago ia i lana pelu, ua se‘i, ona ia taia lea o le auauna a le faitaulaga sili, ua tipiesea lona taliga. 52Ona fetalai atu lea o Iesu ia te ia, Ina toe sulu ia o lau pelu i lona faamoega; auā o i latou uma o e tago i le pelu, e oti i latou i le pelu. 53Fa te oe ea ou te le mafaia ona aioi atu nei i lo‘u Tamā, ona aauina mai ai lea e ia ia te au o agelu e sili ona toatele i lekeona e sefulu ma le lua? 54Ona faapefea lea ona taunuu o Tusi, e tatau ona oo ia mea? 55O lea itu po ua fetalai atu ai Iesu i le motu o tagata, Ua outou o mai ea ma pelu ma uatogi e pue mai ai ia te au, peiseai o se fao mea? sa tatou nonofo ma outou i le malumalu, ma ou a‘oa‘o atu ai i aso fai soo, a e tou te lei pueina ai a‘u. 56A ua oo ia mea uma ina ia taunuu ai Tusi a le au perofeta. Ona tuua ai lea o ia e le au soo uma, a e sosola i latou.

57O e na pue ia Iesu ua latou ta‘ita‘i ia te ia ia Kaiafa le faitaulaga sili, na faapotopoto ai le au tusiupu ma toeaina. 58A ua mulimuli mamao mai Peteru ia te ia, ua oo i le maota o le faitaulaga sili, ua ulufale atu i ai, ua nofo foi o ia faatasi ma auauna, ia iloa ona iu. 59A o le au faitaulaga sili, ma toeaina, ma le taupulega uma, ua latou saili ni e molimau pepelo ia Iesu, ina ia latou fasioti ia te ia; 60a e lei maua; e ui lava ina o mai molimau pepelo e toatele, a e lei maua lava. E mulimuli ane ua o mai molimau pepelo e toalua, ua faapea mai, 61Na fai mai lenei tagata, Ou te mafaia ona lepeti o le malumalu o le Atua, ma ou toe faia i aso e tolu. 62Ona tu ai lea i luga o le faitaulaga sili, ua faapea mai ia te ia, E leai ea sau tali? Pe se a le mau a nei tagata ia te oe? 63A ua le fetalai Iesu. Ona fai mai ai lea o le faitaulaga sili, ua faapea mai ia te ia, Ou te fai atu ia te oe ia te tauto mai ia te i matou i le suafa o le Atua soifua, po o oe le Keriso, o le Alo o le Atua. 64Ona fetalai atu ai lea o Iesu ia te ia, O lea lava; ou te fai atu foi ia te outou, E mulimuli ane tou te iloa ai le Atalii o le tagata e nofo i le itu taumatau o le e ona le mana, e sau foi o ia i ao o le lagi. 65Ona saeia ai lea e le faitaulaga sili ona lava ofu, ua faapea ane, Ua upu leaga o ia i le Atua se a se toe aoga o molimau ia te i tatou? faauta, ua outou faalogo nei i ana upu leaga i le Atua. 66Pe ni a fa outou? Ona latou tali mai ai lea, ua faapea mai. E tatau ona oti o ia. 67Ona latou taufaifeanu ai lea i ona fofoga, ua taufaitu‘i foi ia te ia; ua taufaipo atu foi isi, 68ua faapea mai, Keriso e, ina iite mai ia te i matou, po o ai na na fasia oe?

69A o Peteru sa nofo o ia i fafo i le maota; ona alu atu ai lea o le tasi auauna teine ia te ia, ua faapea atu, O oe foi, sa oulua faatasi ma Iesu le Kalilaia. 70Ona faafiti lea o ia i o latou luma atoa, ua faapea ane, Ou te le iloa le mea e te fai mai ai na. 71Ua ulufafo ia i le faapaologa, ona iloa mai ai lea o ia e le tasi auauna teine, ua na fai atu i e ua i ai, O lenei tagata foi sa la faatasi ma Iesu le Nasareta. 72Ona toe faafiti ai lea o ia ma le augani, Ou te lei iloa lea tagata. 73Ua toe itiiti, ona o ane ai lea o e na tutū mai, ua faapea mai ia Peteru, E moni, o oe lava lo latou; auā ua iloa oe i lau gagana. 74Ona augani ai lea o ia ma tauto, ua faapea atu, Ou te le iloa lava lea tagata. Ona vivini loa lea o moa. 75Ona manatua lea e Peteru o le upu na fetalai atu ai Iesu ia te ia, E le vivini moa seia e faafiti faatolu mai ia te au. Ona ulufafo ai lea o ia, ua tagi lotulotu.

Currently Selected:

MATAIO, 26: SOV

Highlight

Copy