I. KORINITO, 6
6
O LE MATAUPU VI.
Aua le fai finauga e le au uso i luma o faapaupau; ia sosola ese i le faitaaga.
1Ai so outou la te fai se finauga ma se isi i se tasi mea, e faamalosi ea ia ina ia faamasinoina i luma o e amioletonu, a e le o luma o le au paia? 2Tou te le iloa ea e faamasinoina le lalolagi e le au paia? afai foi e faamasinoina le lalolagi e outou, e le tusa ea outou ona fai o faamasinoga i mea aupito iti? 3Tou te le iloa ea tatou te faamasino i agelu? e le faamasino ea i mea a le olaga nei i se a? 4O lenei, pe afai ua ia te outou faamasinoga i mea a le ola nei, ina tofia ia o e ua ta‘ufaatauvaaina i le ekalesia latou te faamasino i ai. 5Ou te faapea atu ia te outou ina ia outou mamā. E moni ea? e leai ea sē poto e toatasi o ia te outou, o le na te mafaia ona faamasino i mea a lona uso? 6A e peitai ua fai finauga a le uso, ma ua faia lea mea i luma o e le talitonu. 7O lenei, ua outou matuā sese lava, ina ua ia te outou finauga o le tasi i le tasi. Tou te le onosai ea i le agaleaga i se a? Tou te le onosai i se a pe a gaoia a outou mea? 8A e peitai ua outou agaleaga atu ma faagaoi, ma ua faia ia mea i le au uso. 9Tou te le iloa ea, o e amio leaga e le fai mo latou tofi le malo o le Atua? Aua ne‘i faaseseina outou; o e faitaaga, ma e ifo i tupua, ma e mulilulua, ma e tauātane, 10ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. 11Sa faapea foi nisi o outou; a ua taeele outou, a ua faapaiaina outou, a ua ta‘uamiotonuina outou i le suafa o le Alii o Iesu, i le Agaga foi o lo tatou Atua.
12Ua tataga mea uma ia te au, a ua le aoga mea uma; ua tataga mea uma ia te au, a o a‘u, e le faiaina a‘u i se tasi mea. 13E tatau mea e ‘ai i le manava, e tatau foi le manava i mea e ‘ai; a e faatau faaumatia e le Atua o lena atoa ma ia mea. A e le tatau le tino i le faitaaga, a e tatau i le Alii; e tatau foi le Alii i le tino. 14A o le Atua ua na toe faatuina le Alii, na te toe faatuina foi i tatou i lona lava mana. 15Tou te le iloa ea, o outou tino o itu tino o Keriso ia? O lenei, ou te ave ea itu tino o Keriso a e faia ma itu tino o le fafine talitane? Aua ne‘i faapea. 16Tou te le iloa ea, ua tino e tasi le ua faatasia ma le fafine talitane? auā o loo faapea mai, E avea i laua m tino e tasi. 17A e peitai ua agaga e tasi le ua faatasia ma le Alii. 18Ina sosola ese ia outou i le faitaaga. Ua auliuligia le tino i agasala uma e faia e tagata; a o lē faitaaga, e agasala ia i lona lava tino. 19Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aiā foi outou ia te outou? 20Auā ua faatauina outou i le tau; o lenei, ia outou vivii atu i le Atua i o outou tino ma ou outou agaga, o mea a le Atua ia.
Currently Selected:
I. KORINITO, 6: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.
