1 โคลินโท 15
15
เยซู ไต่ มี่ง แอ๋ง นั่ง ต้าย
1หฒวัง ก๋อ-โย์ว อ่า, เยีย อ๋อย ปุน เม่ย บัว จั๋ง เจี๊ยน ฒิ่น ด่าง เยีย ฒุ่น บั๋ว เม่ย บัว เญย คู้ เฝียน. น้าย คู้ เฝียน เม่ย บัว ฒิบ ต้าย โหฒว กอน-โด๊ะ เสียน ตุ๊ ว้วน. 2สี ก๊อง เม่ย บัว นั้น ว้วน เยีย ฒุ่น เญย คู้ เฝียน, น้าย คู้ เฝียน ฯฒฯ ปุน เม่ย บัว ตุ๊ เหฌียว. ไม้ เฒย แอ๊ะ, เม่ย บัว เสียน ไม้ ลั่ม หล่ง.
3เยีย กั้น ฒิบ ต้าย เญย เยีย ฒุ่น บั๋ว เม่ย บัว หมี่ อ๊ะ. เก้า หล่ง เจี๊ยน เจี๋ย เญย เซ ฮนั้ง กีง-โซว เฟี้ย เจี๊ยน ก๊อง นอ, กีตู่ เหว่ย บัว เญย ฒุ์ย ไต่.#อิสะยา 53:5-12 4หย่า ฮนั้ง กีง-โซว ก๊อง, นิ่น หฒุ ปย๊บ เจี๊ยน. เถา ตะฟาม ฮนอย ทิน-ฮู่ง แอ๋ง ปุน นิ่น นั่ง ต้าย.#สีง ฑูง 16:8-10; มัดทาย 12:40; กง-โฒ่ 2:24-32 5นิ่น หย่า หิ่น ปุน ปีเต#15:5 ฟาน หฒะ ก๊อง เคฟ้าด. เป๊ย หมั่ง โยฮัน 1:42. ปวัด, แอ๋ง ฆะฮ้า หิ่น ปุน วั้ว เต๋ย เหฒียบ เหญ่ย เต้า กง-โฒ่ ปวัด.#มัดทาย 28:16-17; มาโค 16:14; ลูกา 24:34,36; โยฮัน 20:19
6ฆะฮ้า นิ่น แอ๋ง หิ่น ปุน ฮม์ แป๊ะ เล่ง เต้า กัน นิ่น เญย เมี่ยน ล่ม ฑ่อย ปวัด. น้าย เต๋ย เมี่ยน ธั้ม เจี๋ย หธ่อ เฒี่ยง เจี๊ยน เญย, มป่า ม่าย เต๋ย ไต่ หมี่ อ๊ะ.#15:6 กีก หว่า ก๊อง มฌ่อม มป่า เอ๋ย เล์ย เซ ไต่ หมี่ อ๊ะ. 7ฆะฮ้า นิ่น หิ่น ปุน ยากอบ ปวัด, แอ๋ง หิ่น ปุน หฒวัง กง-โฒ่ ปวัด.
8ฆะฮ้า ลาย เจี๋ย, นิ่น หิ่น ปุน เยีย ปวัด, ไม้ กุ๊น เยีย เซ ฮนั้ง เต้า ม่าย ไม้ เก๋า, ธ้วด เสย ต้าย เญย เมี่ยน นอ.#กง-โฒ่ 9:3-6 9เหยียด ฒู้ง กง-โฒ่ เยีย โหฒว ไฝ เจี๋ย. เยีย เลี่ยม ไม้ ผุย ตุ๊ บั๋ว เห่ว กง-โฒ่, เหว่ย หฒุ เยีย ฒิ่น ด่าง โหฒว โตะ ทิน-ฮู่ง เญย จิว-ปาง.#กง-โฒ่ 8:3 10มป่า เยีย ฮนั้ง หาย นอ, เซ เหว่ย ทิน-ฮู่ง เญย เอน หธีง ต้าย ฮนั้ง น้าย นอ. นิ่น เหธย เอน ปุน เยีย, หย่า ไม้ เฒ์ย ไม้ ลั่ม หล่ง. ต๋าว หฑวน เหยียด ฒู้ง กง-โฒ่, เยีย โหฒว กง เก้า โค้ว เจี๋ย. มป่า ไม้ เฒ์ย เยีย กั้น โหฒว, เซ ทิน-ฮู่ง เญย เอน เถง เจี๊ยน เยีย โหฒว. 11เหว่ย น้าย, ไม้ กุ๊น เซ เยีย ไฟ วั้ว เต๋ย กง-โฒ่, เยีย บัว เหยียด ฒู้ง ต้ง น้าย หญู่ง คู้ เฝียน ฒุ่น. เม่ย บัว เสียน เญย หย่า ต้ง น้าย อ๊ะ.
บัว ไต่ มี่ง แอ๋ง นั่ง ต้าย
12เยีย บัว ฒุ่น คู้ เฝียน ก๊อง, กีตู่ ไต่ มี่ง มป่า ทิน-ฮู่ง ปุน นิ่น นั่ง ต้าย. วั้ว หญู่ง, เยียม เม่ย บัว หน่าย ม่าย เต๋ย ฝู่ง ไฮ่ ก๊อง เมี่ยน ไต่ มี่ง มป่า ไม้ ไฮ่ นั่ง ต้าย? 13สี ก๊อง เมี่ยน ไต่ มี่ง หย่า ไม้ ไฮ่ นั่ง นอ, กีตู่ ไต่ มป่า ทิน-ฮู่ง ไม้ เฒ์ย ปุน นิ่น นั่ง. 14สี ก๊อง ทิน-ฮู่ง ไม้ เฒ์ย ปุน กีตู่ นั่ง, เยีย บัว ฒุ่น เญย คู้ เฝียน ไม้ ม่าย กอน. เม่ย บัว เสียน เญย หย่า ไม้ ลั่ม หล่ง. 15ไม้ ตาน น้าย ฮนั้ง, น้าย ปุน ธีง เยีย บัว โหฒว จ๊า ฒอง-เหฒง ก๊อง ทิน-ฮู่ง ฮนั้ง หาย นอ, เหว่ย หฒุ เยีย บัว ก๊อง กีตู่ ไต่ มี่ง, ทิน-ฮู่ง หย่า ปุน นิ่น นั่ง ต้าย. มป่า สี ก๊อง เมี่ยน ไต่ มี่ง หย่า ไม้ ไฮ่ นั่ง ต้าย นอ, ทิน-ฮู่ง หย่า ไม้ เฒ์ย ปุน กีตู่ นั่ง ต้าย. 16เหว่ย หฒุ สี ก๊อง ไต่ มี่ง เญย เมี่ยน ไม้ ไฮ่ นั่ง ต้าย, ทิน-ฮู่ง หย่า ไม้ เฒ์ย ปุน กีตู่ นั่ง ต้าย. 17สี ก๊อง ทิน-ฮู่ง ไม้ เฒ์ย ปุน กีตู่ นั่ง ต้าย, เม่ย บัว เสียน เญย เซ ไม้ ลั่ม หล่ง, เม่ย บัว หธ่อ ม่าย ฒุ์ย เญย. 18เสียน กีตู่ เญย เมี่ยน, ไต่ มี่ง วั้ว เต๋ย, ฒู้ง หฒุ เหมียด เหฑ่ง. 19สี ก๊อง บัว เสียน กีตู่ เญย เมี่ยน เซ เหว่ย น้าย เสย ม่าย ลั่ม ฮนั้ม ฮนั้ง, เยียม น้าย ลู่ง เดี๊ย เญย หม่าน เมี่ยน, ต้ง เก้า อ๋อย หฒุ ค้อ-เลี่ยน เจี๋ย เซ บัว อ๊ะ.
20มป่า เฒียน สี่, กีตู่ ไต่ มี่ง, ทิน-ฮู่ง ปุน นิ่น นั่ง ต้าย, เหว่ย โหฒว ไต่ มี่ง เญย เมี่ยน นั่ง ต้าย เญย ต้าว เต้า.#15:20 ต้าว เต้า ฟาน ต้าย ก๊อง ต้าว ถอง เปี๊ยว. 21ป้าม เมี่ยน ฮนั้ง หาย นอ หลาย เหยียด ล่าน เมี่ยน หฒุ ไต่, ป้าม เมี่ยน หย่า ฮนั้ง วั้ว นอ เหว่ย เหยียด ล่าน เมี่ยน ตุ๊ นั่ง ต้าย. 22หม่าน เมี่ยน ฮนั้ง หาย นอ หลาย จวั่ง อาดัม หฒุ ไต่, เมี่ยน หย่า ฮนั้ง วั้ว นอ เหว่ย เหธา กีตู่ จวั่ง แหม่ง อ๋อย ตุ๊ นั่ง ต้าย. 23มป่า เต้าๆ เฒว่ย เยี้ยด เฒว่ย เหญ่ย เญย นั่ง ต้าย. กีตู่ โหฒว นั่ง ต้าย เญย ต้าว เต้า. ฆะฮ้า, กีตู่ แอ๋ง ต้าย วั้ว หฒั่น, เป๋น นิ่น เญย เมี่ยน วั้ว เต๋ย เหยียด ฒู้ง หย่า อ๋อย นั่ง ต้าย. 24ฆะฮ้า เซ้ด เมว์ย เญย เฒี่ยง โห่ ฯฒฯ เถา อ๊ะ. เถา วั้ว หฒั่น กีตู่ อ๋อย ฮี่ง เหฑ่ง เหยียด ฒู้ง กุ๊น ด๊าม-ลู่ง, ม่าย หลี่ง ม่าย ชะ เญย, ฯฒฯ เฒาะ นิ่น เญย กั๊วะ จิว ปุน นิ่น เญย เตีย ทิน-ฮู่ง. 25เหว่ย หฒุ กีตู่ อ๋อย หฒุ กุ๊น เถา ทิน-ฮู่ง เฒาะ เหยียด ฒู้ง วิน-วั้ง ปุน เยียม กีตู่ เญย เหฒา-เดี๊ย.#สีง ฑูง 110:1 26ฆะฮ้า ลาย หฒุ เหมียด เญย วิน-วั้ง เซ ไต่ เญย เจ๊า. 27เหว่ย หฒุ กีง-โซว ก๊อง,
“ทิน-ฮู่ง ปุน หม่าน หมวด เยียม นิ่น เญย เหฒา-เดี๊ย.”#สีง ฑูง 8:6
มป่า ปวัด ตุ๊ เม่ง เญย, ก๊อง “หม่าน หมวด” วั้ว โจ๋ว หว่า ไม้ เฒ์ย ก๊อง หฒุ ทิน-ฮู่ง, ต้ง ปุน หม่าน หมวด เยียม นิ่น เญย เหฒา-เดี๊ย วั้ว เต้า. 28มป่า หม่าน หมวด หฒุ บัวะ กีตู่ กุ๊น วั้ว หฒั่น, ตอน กั้น ฯฒฯ เยียม ต้ง ปุน หม่าน หมวด บัวะ นิ่น กุ๊น วั้ว เต้า ทิน-ฮู่ง เญย ปั์ว-เดี๊ย. ฮนั้ง หน่าย ทิน-ฮู่ง ฯฒฯ กุ๊น เหฑ่ง หม่าน หมวด.
29สี ก๊อง เมี่ยน ไต่ มี่ง ไม้ ไฮ่ นั่ง ต้าย, เมี่ยน เจี๋ย ววม เญย เล์ย เหว่ย ตี๊ ไต่ มี่ง เญย เมี่ยน ม่าย หาย หญู่ง เอ๋ย เล์ย? สี ก๊อง ไต่ มี่ง มป่า หฒะเก้ง ไม้ ไฮ่ นั่ง ต้าย นอ, เมี่ยน เหว่ย หาย ติ่ว เจี๋ย ววม เญย เล์ย ตี๊ ไต่ มี่ง เญย เมี่ยน? 30เยีย บัว หย่า เหว่ย หาย ติ่ว หฒั่นๆ หฒุ ปวั้ง เฮ้ย สี่? 31ก๋อ-โย์ว อ่า, เยีย ฮนอยๆ ต๋อง ไต่ หมี่ อ๊ะ. เยีย ก๊าม ฮนั้ง น้าย ก๊อง เหว่ย หฒุ บัว ล่ม ฑ่อย เหธา บัว เญย เฒี้ยว กีตู่ เยซู จวั่ง แหม่ง เฒี่ยง. เยีย หย่า อะเฮน้ย ไห่ เม่ย บัว อ๊ะ. 32สี ก๊อง เยีย เยียม เอเฟโซ ฒี่ง ขูง เอย ป้าม เมี่ยน เญย เฮญี้ยว เหธา เฮยี่ย ฒ่อย ป์อง จ๋า, เยีย ตุ๊ หาย หญู่ง หลง? สี ก๊อง เมี่ยน ไต่ มี่ง หย่า ไม้ ไฮ่ นั่ง ต้าย นอ, บัว อ๋อย หฒุ เอย เมี่ยน ก๊อง น้าย เต๋ย หว่า,
“กุ๊น หญั่น, กุ๊น ฮบ,
เหว่ย หฒุ ฌัง ฮนอย บัว ไต่ อ๊ะ.”#อิสะยา 22:13
33ไม้ ตู๋ง ปุน เมี่ยน ดั๊ว. “คู้ เมี่ยน เหธา เมี่ยน หว่าย เมี่ยน โหฒว ต่อย, คู้ เมี่ยน ฯฒฯ หว่าย หมี่ อ๊ะ.” 34เม่ย บัว อ๋อย หฒุ ก๊อย เฮญี้ยว หฑวน ต้าย, ไม้ ตู๋ง แอ๋ง ป์าม ฒุ์ย. เยียม เม่ย บัว หน่าย ม่าย เต๋ย ฒู้ง ไม้ ฮิ้ว ตุ๊ ทิน-ฮู่ง. เยีย ฮนั้ง น้าย นอ ก๊อง, เม่ย บัว อ๋อย หฒุ ไญ้ อ๊ะ.
เมี่ยน ไต่ มี่ง แอ๋ง นั่ง ต้าย, ซิน ฮนั้ง หาย นอ
35ม่าย เมี่ยน อ๋อย หน่าย, “ไต่ มี่ง เญย เมี่ยน, ฮนั้ง หาย นอ ไฮ่ นั่ง? นั่ง ต้าย วั้ว หฒั่น, นิ่น บัว เญย ซิน ฮนั้ง หาย นอ?” 36กะน้าย-หฮงง อ้า! เม่ย หฒวัง เญย ญิม ไม้ ฮู้ นอ, ญิม ไม้ ไฮ่ กุ ญ่า. 37เม่ย หฒวัง เหยียด นอม ญิม, ไม้ กุ๊น เบย้า วิด ไฟ กั้น หญู่ง ญิม, เซ ขูง หฒวัง ญิม ฮนั้ง, ไม้ เฒ์ย หฒวัง โฮล เหฒียง เญย กะน้าย-ฒู่ง. 38ทิน-ฮู่ง เอย นิ่น กั้น เญย หฒะเอ๋ย ปุน วั้ว นอม ญิม ธ้วด ต้าย ม่าย กั้น เญย มิ่ว. นอมๆ ญิม เอย ญิม เญย ป๊วน ม่าย ญิม เญย มิ่ว.
39ม่าย อ๊อ เญย กะน้าย, ไม้ เฒ์ย หญู่งๆ เญย อ๊อ ฟี่ ฮนั้ง เหฑ่ง. ป้าม เมี่ยน เญย อ๊อ กั้น หญู่ง, แซง-คู้ อ๊อ กั้น หญู่ง, เหนาะ เญย อ๊อ กั้น หญู่ง, เบย์า เญย อ๊อ หย่า กั้น หญู่ง. 40ลู่ง หฒั่ง ม่าย ลู่ง หฒั่ง กะน้าย เญย ซิน, เดา-เป้ย ม่าย เดา-เป้ย กะน้าย เญย ซิน. ลู่ง หฒั่ง กะน้าย เญย ซิน ม่าย เหยียด หญู่ง เหฑว่ย. เดา-เป้ย เญย กะน้าย หย่า ม่าย กั้น หญู่ง เหฑว่ย. 41บะฮนอย ม่าย กั้น หญู่ง ฌัง-หล่าง, หฮลา ม่าย กั้น หญู่ง ฌัง-หล่าง, เหฮลย ม่าย กั้น หญู่ง ฌัง-หล่าง. เหฮลย หย่า เหยียด นอม ม่าย เหยียด นอม เญย ฌัง-หล่าง.
42ไต่ มี่ง เญย เมี่ยน นั่ง ต้าย เซ ฮนั้ง น้าย อ๊ะ. ปย๊บ เญย ซิน ไฮ่ ฮู้ เญย. ไต่ มี่ง แอ๋ง นั่ง ต้าย เญย ซิน ไม้ ไฮ่ ฮู้ อ๊ะ. 43หฒุ ปย๊บ เญย ซิน เซ อะหมั่ง. นั่ง ต้าย เญย ซิน เซ เหฑว่ย เญย. หฒุ ปย๊บ เญย ซิน เซ เมา. นั่ง ต้าย เญย ซิน เซ เฮ้น. 44หฒุ ปย๊บ เญย ซิน เซ อ๊อ ซิน. นั่ง ต้าย เญย ซิน เซ สีง ลี่ง ปุน ม่าย แหม่ง เญย ซิน. สี ก๊อง ม่าย อ๊อ ซิน, ฯฒฯ ม่าย สีง ลี่ง ปุน ม่าย แหม่ง เญย ซิน. 45เหว่ย หฒุ กีง-โซว ก๊อง,
“ต้าว เต้า เมี่ยน เซ อาดัม,
นิ่น หย่า เป๋น ม่าย แหม่ง เญย เมี่ยน.”#ทิน เต่ย โต้ว 2:7
มป่า ฆะฮ้า วั้ว เต้า อาดัม#15:45 ฆะฮ้า วั้ว เต้า อาดัม ก๊อง หฒุ กีตู่. เซ ปุน เมี่ยน ม่าย แหม่ง เฒี่ยง เจี๊ยน วั้ว เต้า. 46ธ้วด ด่าง เซ ไม้ เฒ์ย สีง ลี่ง ปุน ม่าย แหม่ง เญย, เซ ม่าย อ๊อ ซิน เญย, ฆะฮ้า สีง ลี่ง หธีง ปุน ม่าย แหม่ง เญย. 47ตะเยี้ยด เต้า อาดัม, ทิน-ฮู่ง หล่ง เดา-เป้ย เญย เนีย เหฒย ต้าย. ตะเหญ่ย เต้า อาดัม เยียม ทิน-ต้อง เหฌี่ย ต้าย. 48หล่ง เนีย เหฒย วั้ว เต้า ป้าม เมี่ยน ฮนั้ง หาย นอ, เกวย ป้าม เกน วั้ว เต๋ย เซ ฮนั้ง วั้ว นอ. เยียม ทิน-ต้อง ต้าย วั้ว เต้า ฮนั้ง หาย นอ, เกวย ทิน-ต้อง วั้ว เต๋ย หย่า ฮนั้ง วั้ว นอ. 49บัว ฮนั้ง หาย นอ ฒวั้ง หล่ง เนีย เหฒย ต้าย วั้ว เต้า, บัว หย่า อ๋อย ฮนั้ง วั้ว นอ ฒวั้ง เยียม ทิน-ต้อง ต้าย วั้ว เต้า.
50ก๋อ-โย์ว อ่า, เยีย บั๋ว เม่ย บัว, ม่าย อ๊อ ม่าย ฑย้าม เญย ซิน ไม้ ไฮ่ หฑิบ ทิน-ฮู่ง เญย กั๊วะ เญย ป่วน. ไฮ่ ฮู้ ไฮ่ หว่าย เญย หย่า ไม้ ไฮ่ หฑิบ ไม้ ไฮ่ ฮู้, ไม้ ไฮ่ หว่าย เญย. 51หมวัง หลง เยีย อ๋อย ก๊อง น้าย เต๋ย ไม้ แก้ง บย๋าง ย่าง เญย สี่ บั๋ว เม่ย บัว. บัว ไม้ เฒ์ย เหยียด ฒู้ง ไต่, มป่า บัว อ๋อย ก๊อย เหยี่ยน เหฑ่ง. 52หฑัด บุย ฆะฮ้า ลาย วั้ว หฑุ่น, บัว เหยียด ฒู้ง เลี่ยม เฒ่ย อ๋อย ก๊อย เหยี่ยน ด่ง เฑี้ยบ มฒีง เซี้ยบ. เหว่ย หฒุ หฑัด บุย วั้ว หฒั่น, ไต่ มี่ง เญย เมี่ยน ฯฒฯ นั่ง ต้าย, เหยียด ลิ์ว ไม้ ไต่ อ๊ะ. บัว เหยียด ฒู้ง หย่า ก๊อย เหยี่ยน.#1 เทสะโลนิกา 4:15-17 53เหว่ย หฒุ ไฮ่ ฮู้ เญย ซิน อ๋อย ทิ้ว เป๋น#15:53 ทิ้ว เป๋น กีก หว่า ก๊อง ฒุ เจี๊ยน. ไม้ ไฮ่ ฮู้ เญย ซิน. ไฮ่ ไต่ เญย หย่า อ๋อย ทิ้ว เป๋น ไม้ ไฮ่ ไต่ เญย. 54ไฮ่ ฮู้ เญย ซิน ทิ้ว เป๋น ไม้ ไฮ่ ฮู้ เญย, ไฮ่ ไต่ เญย หย่า ทิ้ว เป๋น ไม้ ไฮ่ ไต่ เญย วั้ว หฒั่น, ฯฒฯ ธ้วด ต้าย ต๋อย-ติ่ว น้าย เต๋ย กีง-โซว เญย หว่า. กีง-โซว ก๊อง,
“หฒุ ไต่ เญย ชะ หฒุ เหมียด เหฑ่ง.
ตุ๊ ฮี่ง เญย ชะ ฯฒฯ กุ๊น เจี๊ยน.”#อิสะยา 25:8
55“หฒุ ไต่ เญย ชะ อ้า! เม่ย ตุ๊ ฮี่ง เญย ชะ เยียม หาย?
ไต่ เญย ชะ อ้า! ตั๋น เมี่ยน ไต่ เญย เดีย-โตะ เยียม หาย?”#โฮเซยา 13:14
56ตั๋น เมี่ยน ไต่ เญย เดีย-โตะ เซ ฒุ์ย. ฒุ์ย เญย ชะ หย่า เยียม เล์ย-หลัด ต้าย. 57มป่า แล์ง ฒี่ง ทิน-ฮู่ง, นิ่น ปุน บัว เหว่ย บัว เญย เฒี้ยว เยซู กีตู่ ตุ๊ ฮี่ง.
58เยีย ฮนั้ม เญย ก๋อ-โย์ว อ่า, เหว่ย น้าย เม่ย บัว อ๋อย หฒุ เสียน ว้วน, ไม้ ตู๋ง ถุย. อ๋อย หฒุ หฒั่นๆ ธ้วด ชะ โหฒว เฒี้ยว เญย กง, เหว่ย หฒุ เม่ย บัว ฮิ้ว ตุ๊ เม่ย บัว เหว่ย เฒี้ยว โหฒว กง, ไม้ ม่าย เหยียด หญู่ง ไม้ ลั่ม หล่ง.
Currently Selected:
1 โคลินโท 15: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
