1 โคลินโท 14
14
เปาโล แอ๋ง ก๊อง สีง ลี่ง เญย ฒี่ง เหญ่ย
1ตะเยี้ยด เม่ย บัว อ๋อย หฒุ ฮนั้ม เมี่ยน. หย่า อ๋อย หฒุ จอม เฮญี้ยว ล์อ สีง ลี่ง ปุน ต้าย เญย ฒี่ง เหญ่ย. เก้า หล่ง เจี๊ยน เจี๋ย, อ๋อย หฒุ ล์อ ฒี่ง เหญ่ย โต่ว ทิน-ฮู่ง เญย หว่า. 2หาย เต้า ก๊อง กั้น หญู่ง หว่า เซ ไม้ เฒ์ย เหธา เมี่ยน ก๊อง, นิ่น เหธา ทิน-ฮู่ง ก๊อง, เหว่ย หฒุ ไม้ ม่าย หาย เต้า หมวัง ตุ๊ ฮิ้ว นิ่น เญย หว่า. นิ่น หล่ง สีง ลี่ง เญย ชะ ก๊อง ไม้ แก้ง บย๋าง ย่าง เญย เจ๊า. 3มป่า, โต่ว ทิน-ฮู่ง เญย หว่า วั้ว เต้า เหธา เมี่ยน ก๊อง เหว่ย เหธย นิ่น บัว เจี์ย ต้าย, ขวิน นิ่น บัว, หย่า ออน นิ่น บัว เญย เฮญี้ยว. 4ก๊อง กั้น หญู่ง หว่า วั้ว เต้า ขูง เหธย ตุ๊ กั้น ฮนั้ง, มป่า โต่ว ทิน-ฮู่ง เญย หว่า วั้ว เต้า เหธย จิว-ปาง.
5เยีย อ๋อย เม่ย บัว โม์ว ล่าน ไฮ่ ก๊อง กั้น หญู่ง หว่า. มป่า เยีย เก้า อ๋อย เม่ย บัว ไฮ่ โต่ว ทิน-ฮู่ง เญย หว่า. โต่ว ทิน-ฮู่ง เญย หว่า วั้ว เต้า เซ เก้า หล่ง เจี๊ยน ก๊อง กั้น หญู่ง หว่า วั้ว เต้า, ธ้วด ลิ์ว ม่าย เมี่ยน ไฮ่ ฟาน วั้ว เต๋ย หว่า เหว่ย เหธย หฒวัง จิว-ปาง. 6หฒวัง ก๋อ-โย์ว อ่า, สี ก๊อง เยีย มี่ง เถา เม่ย บัว หน่าย หย่า ก๊อง กั้น หญู่ง หว่า, น้าย เถง เม่ย บัว ตุ๊ หาย หญู่ง หลง? ไม้ เถง เหยียด หญู่ง, ธ้วด ลิ์ว เยีย ก๊อง ทิน-ฮู่ง หล่าว ย่าง เญย สี่, ไฟ ก๊อง โจ๋ว ไกว-ช้าว หว่า, ไฟ โต่ว ทิน-ฮู่ง เญย หว่า, ไฟ หฌาว เหยียด หญู่ง เม่ย บัว.
7ไม้ ม่าย แหม่ง เญย กะน้าย ฮนั้ง เฮล้า-ด้ง หนู เหธา ต้าน ป้า ไฮ่ ม่าย เฉีย บุย เญย. มป่า สี ก๊อง เฉีย บุย ไม้ เม่ง, หมวัง เญย เมี่ยน ฮนั้ง หาย นอ ไฮ่ ฮิ้ว ตุ๊ ปย๊ม ไฟ พัด หาย หญู่ง โพว? 8สี ก๊อง ปย๊ม หฑัด, เฉีย หย่า ไม้ เม่ง, แปง ฮนั้ง หาย นอ ไฮ่ ฮิ้ว ตุ๊ หลิ่ว เล์ย มี่ง เบ๊าะ จ๋า? 9เม่ย บัว ฟี่ ฮนั้ง เญย. สี ก๊อง เม่ย บัว ไม้ ก๊อง หมวัง ตุ๊ ฮิ้ว เญย หว่า, หาย เต้า ไฮ่ ฮิ้ว ตุ๊ เม่ย บัว ก๊อง หาย หญู่ง? เซ ฮนั้ง ก๊อง หว่า ปุน หฑยาว สาว ฮนั้ง.
10น้าย นอม ป้าม เกน ม่าย เหฒีย! เหฒีย หญู่ง หว่า มป่า ไม้ ม่าย เหยียด หญู่ง หว่า ไม้ ม่าย เอ๋ย เล์ย. 11สี ก๊อง เยีย ไม้ เม่ง แปะ เหธา เยีย ก๊อง หว่า วั้ว ล่าน เมี่ยน เญย หว่า, นิ่น ฯฒฯ ฮิ้ว ตุ๊ เยีย เหธา นิ่น กั้น ฝีง. เยีย หย่า ฮิ้ว ตุ๊ นิ่น เหธา เยีย กั้น ฝีง. 12ฮนั้ง หน่าย, เหว่ย หฒุ เม่ย บัว จอม เฮญี้ยว อ๋อย ตุ๊ สีง ลี่ง เญย ฒี่ง เหญ่ย, หล่ง เจี๊ยน เจี๋ย เม่ย บัว อ๋อย หฒุ ล์อ ต้ง เก้า ไฮ่ เหธย จิว-ปาง วั้ว หญู่ง ฒี่ง เหญ่ย.
13เหว่ย น้าย, หาย เต้า ก๊อง กั้น หญู่ง หว่า, อ๋อย หฒุ โท้ สีง ลี่ง เญย ฒี่ง เหญ่ย ไฮ่ ฟาน วั้ว หญู่ง หว่า. 14สี ก๊อง เยีย หล่ง กั้น หญู่ง หว่า เต๋า เก๋า, น้าย เซ เยีย เญย ลี่ง ว่วน เต๋า เก๋า, มป่า เกวน ไม้ หฒุ เยีย เญย เฮญี้ยว. 15วั้ว หญู่ง, เยีย อ๋อย หฒุ ฮนั้ง หาย นอ โหฒว? เยีย อ๋อย หล่ง เยีย เญย ลี่ง ว่วน เต๋า เก๋า มป่า เยีย หย่า อ๋อย หล่ง เยีย เญย เฮญี้ยว เต๋า เก๋า. เยีย อ๋อย หล่ง เยีย เญย ลี่ง ว่วน ป๋าว ฑูง, หย่า อ๋อย หล่ง เยีย เญย เฮญี้ยว ป๋าว. 16สี ก๊อง ขูง หล่ง ลี่ง ว่วน แล์ง ฒี่ง ทิน-ฮู่ง, เม่ย แล์ง ฒี่ง ลิ์ว, ต้ง เยียม วั้ว หมวัง มป่า ไม้ ฮิ้ว วั้ว เต๋ย หว่า เญย เมี่ยน, ฮนั้ง หาย นอ ไฮ่ เหธา เจี๊ยน ก๊อง, “อาเมน”? นิ่น ไม้ ฮิ้ว ตุ๊ เม่ย ก๊อง หาย หญู่ง. 17ไม้ กุ๊น เม่ย แล์ง ฒี่ง ทิน-ฮู่ง หย่า ก๊อง ตุ๊ ด่ง หาย หลง, น้าย เหยียด เต๋ย หย่า ไม้ เหธย วั้ว เต้า.
18เยีย แล์ง ฒี่ง ทิน-ฮู่ง, เยีย ก๊อง กั้น หญู่ง หว่า เก้า ธั้ม เม่ย บัว หฒวัง เมี่ยน. 19มป่า จิว-ปาง กั๊บ ฒุ้น เญย เฒี่ยง โห่ เยีย อ๋อย ก๊อง ปยา โจ๋ว หมวัง ตุ๊ ฮิ้ว เญย หว่า หฌาว เมี่ยน, เก้า หลง ก๊อง เหยียด ธิน เหยียด หว่าน โจ๋ว กั้น หญู่ง หว่า.
20หฒวัง ก๋อ-โย์ว อ่า, เม่ย บัว ฮนั้ม เญย เจ๊า, ไม้ ตู๋ง ฮนั้ง ฝุเจว๊ย นอ ฮนั้ม. โหฒว หว่าย สี่ อ๋อย หฒุ ฮนั้ง กู้งว์า นอ, มป่า เม่ย บัว ฮนั้ม เญย เจ๊า อ๋อย หฒุ ฮนั้ง ต้ม เมี่ยน อ๊ะ. 21กีง-โซว เฟี้ย เจี๊ยน ก๊อง,
“เฒี้ยว ก๊อง,
‘เยีย อ๋อย หล่ง ก๊อง กั้น หญู่ง หว่า เญย เมี่ยน,
หย่า หล่ง กั้น ฝีง เมี่ยน เญย ฑุ่ย เหธา น้าย เต๋ย แปะ ฝีง ก๊อง,
มป่า นิ่น บัว หธ่อ ไม้ อ๋อย หมวัง เยีย เญย หว่า.’”#อิสะยา 28:11-12
22ฮนั้ง หน่าย, ก๊อง กั้น หญู่ง หว่า เซ โหฒว จั๋ง-โห่ ปุน ไม้ เสียน เญย เมี่ยน, ไม้ เฒ์ย ปุน เสียน เญย เมี่ยน. โต่ว ทิน-ฮู่ง เญย หว่า เซ โหฒว จั๋ง-โห่ ปุน เสียน เญย เมี่ยน, ไม้ เฒ์ย ปุน ไม้ เสียน เญย วั้ว เต๋ย.
23วั้ว หญู่ง, สี ก๊อง จิว-ปาง เญย หฒวัง เมี่ยน กั๊บ ฒุ้น เญย เฒี่ยง โห่ เมี่ยน ล่ม ฑ่อย ก๊อง กั้น หญู่ง หว่า, แอ๋ง ม่าย เต๋ย ไม้ ฮิ้ว น้าย หญู่ง หว่า เญย เมี่ยน ไฟ ไม้ เสียน เญย เมี่ยน เปียะ ต้าย, นิ่น บัว ไม้ เฒ์ย อ๋อย ก๊อง เม่ย บัว ปุ๊ด ดิน ซ่าะ? 24มป่า, สี ก๊อง เต้าๆ โต่ว ทิน-ฮู่ง เญย หว่า แอ๋ง ม่าย ไม้ เสียน เญย เมี่ยน ไฟ ไม้ ฮิ้ว วั้ว เต๋ย กั้น หญู่ง หว่า เญย เมี่ยน เปียะ ต้าย, นิ่น ไฮ์ เญย เหยียด ฒู้ง ฯฒฯ ปุน นิ่น ฮิ้ว ตี่ง นิ่น ม่าย ฒุ์ย หย่า หฒุ ตี่ง ฒุ์ย หมี่ อ๊ะ. 25นิ่น เยียม เฮญี้ยว ปี๋ง เจี๊ยน เญย สี่ หย่า ธ้วด เหฑ่ง ต้าย อ๊ะ, นิ่น ฯฒฯ พัวะ เหฌี่ย เดา ป๋าย ทิน-ฮู่ง เหญี่ยม, “ทิน-ฮู่ง หฒะเก้ง เยียม เม่ย บัว บุด๋ง อ๊ะ.”
โหฒว เล์ย-ป๋าย เญย เหยียด เหญ่ย
26หฒวัง ก๋อ-โย์ว อ่า, เยีย เญย เอ๋ย เล์ย เซ ฮนั้ง น้าย. เม่ย บัว กั๊บ ฒุ้น โหฒว เล์ย-ป๋าย เญย เฒี่ยง โห่, เก๊าะ-เมี่ยน ม่าย เต๋ย ม่าย ฑูง, ม่าย เต๋ย หฌาว เล์ย, ม่าย เต๋ย ก๊อง ทิน-ฮู่ง หล่าว ย่าง เญย สี่, ม่าย เต๋ย ก๊อง กั้น หญู่ง หว่า, แอ๋ง ม่าย เต๋ย ฟาน วั้ว เต๋ย หว่า. อ๋อย หฒุ โหฒว หญู่งๆ เหว่ย เหธย จิว-ปาง เฮ้น เจี์ย ต้าย. 27สี ก๊อง ม่าย เมี่ยน ก๊อง กั้น หญู่ง หว่า, ขูง ปุน อี ล่าน, ธั้ม เจี๋ย เถา ปัว ล่าน ก๊อง. หย่า อ๋อย หฒุ เหยียด ล่าน ก๊อง ลิ์ว เหยียด ล่าน หธีง ต้าย ก๊อง. แอ๋ง อ๋อย หฒุ ม่าย เต้า ฟาน. 28สี ก๊อง ไม้ ม่าย เมี่ยน ไฮ่ ฟาน นอ, อ๋อย ก๊อง กั้น หญู่ง หว่า วั้ว ล่าน อ๋อย หฒุ ไม้ ตู๋ง ก๊อง อ๊ะ. ขูง อ๋อย หฒุ เยียม กั้น เญย เฮญี้ยว เหธา นิ่น กั้น ก๊อง หย่า เหธา ทิน-ฮู่ง ก๊อง. 29ปุน อี ไฟ ปัว ล่าน โต่ว ทิน-ฮู่ง เญย หว่า, มป่า หมวัง เญย เมี่ยน หย่า อ๋อย หฒุ ฒ่า หมั่ง วั้ว เต๋ย หว่า. 30สี ก๊อง เฒว์ย วั้ว เญย เมี่ยน ม่าย เต้า ฒิบ ทิน-ฮู่ง หล่าว ย่าง เญย สี่ อ๋อย โต่ว บั๋ว เมี่ยน, ก๊อง เจี๊ยน หว่า วั้ว เต้า อ๋อย หฒุ ตี้ง เหฌี่ย. 31เม่ย บัว เต้าๆ โต่ว ทิน-ฮู่ง เญย หว่า ตุ๊ เญย, มป่า อ๋อย หฒุ เหยียด ล่าน ก๊อง ลิ์ว เหยียด ล่าน หธีง ต้าย ก๊อง เหว่ย หฌาว หฒวัง เมี่ยน ฯฒฯ ปุน นิ่น บัว เญย เฮญี้ยว ม่าย ชะ. 32โต่ว ทิน-ฮู่ง เญย หว่า วั้ว เต้า อ๋อย หฒุ ไฮ่ กุ๊น นิ่น กั้น ตุ๊ ต้าย เญย ฒี่ง เหญ่ย, 33เหว่ย หฒุ ทิน-ฮู่ง ไม้ เฒ์ย โหฒว ปุน เมี่ยน หลุ่น, ทิน-ฮู่ง ปุน เมี่ยน ม่าย แป้ง ออน.
ฮนั้ง เยียม ทิน-ฮู่ง เญย นอมๆ จิว-ปาง นอ, 34กั๊บ ฒุ้น โหฒว เล์ย-ป๋าย เญย เฒี่ยง โห่, มเซียะ ตอน อ๋อย หฒุ เหฑียะ ฑี์ง, เหว่ย หฒุ มเซียะ ตอน ไม้ ม่าย เล์ย ก๊อง หว่า. นิ่น บัว หอบ หฒุ บัวะ เมี่ยน ฮนั้ง เล์ย-หลัด ก๊อง นอ. 35สี ก๊อง นิ่น บัว อ๋อย ฮิ้ว หาย หญู่ง, อ๋อย หฒุ เยียม เปย๊า หน่าย โหฆ. โหฒว เล์ย-ป๋าย เญย เฒี่ยง โห่ มเซียะ ตอน ก๊อง หว่า เซ ไญ้ ไห่ เญย สี่.
36ทิน-ฮู่ง เญย โต์ เยียม เม่ย บัว หน่าย ธ้วด ไฟ? ขูง ฒุ่น เถา เม่ย บัว หน่าย ฮนั้ง ไฟ? 37หาย เต้า ฝุน กั้น โหฒว โต่ว หว่า เมี่ยน, ไฟ ม่าย สีง ลี่ง ปุน ต้าย เญย ฒี่ง เหญ่ย, อ๋อย หฒุ ฮิ้ว ตี่ง เยีย เฟี้ย ปุน เม่ย บัว น้าย เต๋ย หว่า เซ เฒี้ยว เญย หลี่ง. 38มป่า สี ก๊อง นิ่น ไม้ แล์ง นอ, เม่ย บัว ไม้ ตู๋ง เธี้ยบ นิ่น อ๊ะ.
39ก๋อ-โย์ว อ่า, ฮนั้ง หน่าย, เม่ย บัว อ๋อย หฒุ ตี่ง เฮญี้ยว อ๋อย โต่ว ทิน-ฮู่ง เญย หว่า. เมี่ยน ก๊อง กั้น หญู่ง หว่า หย่า ไม้ ตู๋ง ล่าน. 40มป่า หม่าน สี่ อ๋อย หฒุ เฒว่ย เยี้ยด เฒว่ย เหญ่ย เญย โหฒว หอบ.
Currently Selected:
1 โคลินโท 14: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
