Luka 6

Swali dzulu ya Sabato

(Matayo 12:1-8; Mariko 2:23-28)

1 # Kʼumb 23:25 Tsʼiku mwenga ya Sabato, Jeso wakala unachira phamwenga na anafunzie kwenye minda ya nganu, na ao anafunzie achanza kufutsula masuche ga nganu achigafikitsa na kwafuna. 2Afarisayo anjine achiauza vivi, “Heka munahenda neno ririro tsʼi shariya kuhendwa tsʼiku ya Sabato?” 3Jeso achiaudzidza achiaamba, “Vidze, kʼamudzangwe kusoma dzulu ya vyohenda mufalume Daudi na anzie ukati phokala ana nzala? 4#Alaw 24:9#1 Sam 21:1-6Daudi ukati uo waphenya dzumba rokala Aiziraeli achivoya Mulungu, achihwala yiyatʼu mikahe yokala yidziikwa mbere za Mulungu, achirya na achiapʼa ao anzie nao. Chishariya, ákala ni makuhani hichiyao tu, okala anahenzezwa arye mikahe yiyo.” 5Ndo achimarigiza na kwamba, “Mimi Mutʼu yelaa dzulu ni Bwana hata wa Sabato.”

Mutʼu wa kupholoza mukono unaphozwa

(Matayo 12:9-14; Mariko 3:1-6)

6Tsʼiku yinjine ya Sabato, Jeso waphenya sinagogini achifunza. Mumo ndani mwakala muna mutʼu yekala mukonowe wa kulume wakala upholoza. 7Phapho alimu a shariya na Afarisayo ákala anatsakula chausa cha kumulumbira Jeso. Ndo achikala a phapho anatariza aone kumba undamuphoza mutʼu tsʼiku yiyo ya Sabato. 8Ela Jeso yiye achigamanya gago maazo gao photsʼiambirwa hata ni mutʼu, na achimwamba yiye mutʼu wa kupholoza mukono, “Unuka udze wime phano mbere.” Yiye mutʼu achiunuka achendaima phapho mbere. 9Ndo Jeso achiaamba, “Ninamuuza, ni riphiro ririro ni shariya kurihenda tsʼiku ya Sabato, ni kuhenda neno idzo, hebu kuhenda neno ii, ni kutivya mutʼu, hebu kuulaga?” 10Ariphoalola na kona kʼaphana hata mumwenga amuudzidzaye, achimwamba vivi yiye mutʼu, “Golosa mukonoo.” Naye achihenda vivyo, na mukonowe uchiuya uzima kamare. 11Ela Afarisayo na alimu a shariya achitsukirwa muno hata achiuzana-uzana ra kumuhenda Jeso.

Jeso unaatsagula ahumwae kumi na airi

(Matayo 10:1-4; Mariko 3:13-19)

12Tsʼiku mwenga, Jeso wakotʼa mwangoni kwendavoya, na achichesa kuko kumuvoya Mulungu. 13Kunadzachakwe achiaiha anafunzie, na kati yao achitsagula atʼu kumi na airi ario waapʼa dzina ra ahumwa. 14Na ao atʼu otsagulwa ndio aa: Simoni (ariye wamuhatsʼa dzina ra Pʼetero), Andireya nduguye yiye Pʼetero, Jakobo na Johana, Filipu na Batolomayo, 15Matayo#6:15 Atʼu anaona kukala Matayo ni dzina rinjine ra Lawi. na Tʼomasi, Jakobo wa Alifayo na Simoni (mutʼu wa chama cha Zelote), 16Juda#6:16 Juda yuyu kunjine unaihiwa Tadayo. Lola Matayo 10:3 na Mariko 3:18. wa Jakobo, na Juda Isikariyoti yekudzamuguza Jeso.

Jeso unafunza na kwaphoza atʼu

(Matayo 4:23-25)

17Jeso ariphoteremuka kulaa kuko mwangoni phamwenga na ao anafunzie, waima phatʼu phokala pha tʼambarare. Phapho phákala phana duu bomu ra anafunzie, na atʼu anji okala alaa pʼande zosi za Judea, mudzi wa Jerusalemu na pʼande za kʼanda-kʼanda ya bahari za Tʼiro na Sidoni. Osi ákala ákudzamusirikisa Jeso, na aphozwe makongo gao. 18Jeso achiaphoza atʼu osi okala anayugwa ni pʼepʼo a vitswa. 19Na atʼu osi ákala anasukumana kwa hata amukumbe, kwakukala, nguvuze za kuphoza zakala zilaa mwakwe mwirini, na osi omukumba, áphola.

Atʼu a raha na a shenene

(Matayo 5:1-12)

20Jeso waagalukira anafunzie achiaamba,

“Baha mwimwi achiya,

mana, Ufalume wa Mulungu ni wenu.

21Baha mwimwi musikirao nzala vivi,

mana, mundakudzamvunywa.

Baha mwimwi murirao vivi,

mana, mundakudzahamirwa hata mutseke.

22 # 1 Pet 4:14 “Ndo baha mwimwi chikala atʼu anamumena na kumurema, anamuhakana na kumubanangira dzina kwa dzulu ya mimi Mutʼu yelaa dzulu. 23#2 Mgu 36:16; Mahe 7:52Maneno gaga gachilairira, mwimwi hamirwani hata muvine, mana, manoso genu ni mabomu mulunguni. Vivyo bee ndivyo akare ao arivyoahendera agomvi a Mulungu.

24“Ela mundamanya enye mwimwi murio mu matajiri vivi,

mana, mwaphokera kare mazagazi genu ga raha.

25Mundamanya enye mwimwi odzimvuna vivi,

mana, mundakudzasikira nzala.

Mundamanya enye mwimwi murio muna raha hata munatseka,

mana, mundakudzashononeka na murire.

26“Mundamanya enye mwimwi mulikwao ni chila mutʼu, mana, akare enu áalika dza vivyo agomvi a Mulungu a ulongo.”

Jeso unakanya kwazira adawa

(Matayo 5:38-48; 7:12a)

27Jeso waenderera kugomba achiamba, “Ela ninamwambira mwimwi munisirikisao, ahenzeni adawa enu, ahenderenitʼo aratʼu odzimumena, 28avoyereni aajaliwe ni Mulungu aratʼu amulaphizao, na avoyereni nao aratʼu amuhenderao vii. 29Mumwenga wao achikupiga ukofi kʼai mwenga, uwe bee hata mugaluzire yiyo kʼai yinjine nayo apige. Achihwala kotiro, murichire hata shatiyo nayo. 30Chila akuvoyaye-voyaye chitʼu, mupʼe, na achikuphoka miyoyo, tsʼimwambe akuudzire. 31#Mat 7:12Ahenderenitʼo anjine dza viratʼu muhenzavyo nao amuhendere.

32“Maana, muchikala mwahenza aratʼu amuhenzao nao tu, bee muna udzo wani? Kʼamuna udzo, mana, hata adambi nao anaahenza aratʼu aahenzao. 33Muchiahenderatʼo aratʼu amuhenderaotʼo nao tu, bee muna udzo wani? Kʼamuna udzo, mana, hata adambi nao anagahenda gago. 34Na muchikala munaakopesha aratʼu murio munaaona andamuripha nao tu, mukale munawirya kulikwa na kunoswa? Ngʼo kʼamuwirya, mana, hata adambi anaakopesha adambi anziao, kwa hata ariphwe chitʼu dza chicho! 35Kwa vivyo, ahenzeni adawa enu, na ahendereni chividzo. Lavyani photsʼilolera kuriphwa, na manoso genu gandakala mabomu, na mundakala anangwa a Mulungu Ariye Dzulu kuchira osi, mana, yiye ni mudzo hata kwa otsʼi mumvera, na ai. 36Mwimwi hendani mbazi dza Abayenu Mulungu arivyo na mbazi.”

Dzulu ya kwalamula anjine

(Matayo 7:1-5)

37Chisha Jeso wagomba achiamba, “Mutsʼialamule anjine, na ndipho namwi kʼamundalamulwa ni Mulungu, mutsʼialaumu anjine, na ndipho namwi kʼamundalaumiwa ni Mulungu, na asameheni anjine, na ndipho namwi mundasamehewa ni Mulungu, 38apʼeni anjine chodziaphungukira, Na mwimwi mundahewa ni Mulungu. Mwimwi mundaphokera na mikono yenu pʼishi ya tele, yodzifyeherwa na kukuchwakuchwa hata kumwagika. Maana, pʼishi yiyatʼu muyihumirayo kwa anjine, ndiyo ariyo Mulungu undayihumira kwenu naye.”

39 # Mat 15:14 Chisha Jeso achiaambira tʼadi yiyi: “Vidze, mutʼu yetsʼona unaidima kumulongoza munziwe yetsʼona vivyo? Hʼa-a kʼaviidimikika, na achivihenda, osi airi andavoromoka bopʼoni. 40#Mat 10:24, 25; Joh 13:16; 15:20Mwanafunzi tsʼiye mubomu kuchira mwalimuwe, ela chila mwanafunzi achimala masomoge chividzo, nikukala dza mwalimuwe. 41Kwadze unalola chidudu chiricho dzitsoni mwa munzio, ela kʼuchona chikokopha chiricho mwako dzitsoni? 42Hebu unaidimadze kumwamba munzio, ‘Musena, hima nikulavye chidudu,’ na kuno kʼuchona chikokopha chiricho mwako dzitsoni? Uwe mulumakwiri uwe! Chilavye mwanzo chikokopha chiricho mwako dzitsoni, na ndipho undaidima kona chividzo hata widime kumulavya chidudu munzio naye.”

Muhi umanyikana kwa matundage

(Matayo 7:17-20; 12:34b-35)

43Jeso waenderera kugomba achiamba, “Muhi udzo wa tʼude za kuriwa kʼauvyala matunda ga kʼoma, hebu muhi wa kʼoma kʼauvyala matunda madzo ga kuriwa. 44#Mat 12:33Atʼu aumanya muhi kwa tʼudeze uvyalazo. Vi lwazu kukala, atʼu kʼaahunda tʼini kulaa kwa mihi ya miya, hebu kʼaahunda zabibu kulaa kwa vitsaka vya mihi ya miya. 45#Mat 12:34Mutʼu mudzo, una madzo mwakwe moyoni, na kwa vivyo, ugomba gago madzo galaago mumo moyoni. Na mutʼu mui naye, una mai mwakwe moyoni, na kwa vivyo, ugomba gago mai galaago mumo moyoni. Maana, mutʼu ugomba garatʼu garigo tele mwakwe moyoni.”

Tʼadi ya ajengi airi

(Matayo 7:24-27)

46Chisha Jeso wagomba achiamba, “Kwadze munaniiha ‘Bwana, Bwana,’ na kuno kʼamugahenda gano nimwambirago? 47Bee ninamwambira mino, chila mutʼu adzaye kwangu, akasikira maneno gangu na kugatuwa, 48unga dza mutʼu ajengaye nyumba. Yiye nikuyitsimbira ndani muno hata akakumba mwamba, chisha akayitiya chunu. Ndo muvo wa madzi nikudza ukayipiga yiyo nyumba, ela ukashindwa vivyo, mana, yajengwa kudiniswa. 49Ela asikiraye maneno gangu na kʼagatuwa, unga dza mutʼu yejenga nyumba na kʼayitsimbirire ndani muno, na chisha kʼayitiyire chunu. Ndo muvo wa madzi uriphokudzayipiga, nyumba yiyo yagwa maruru, na yichikuluzwa ni madzi kamare!”

Currently Selected:

Luka 6: CHIDUR

Highlight

Copy