Luka 5

Jeso unaaiha anafunzi a kwanza

(Matayo 4:18-22; Mariko 1:16-20)

1 # Mat 13:1, 2; Mar 3:9, 10; 4:1 Tsʼiku mwenga, Jeso wakala wimire kʼanda-kʼanda ya ziya ra Genesareti,#5:1 Ziya ra Genesareti ndiro Ziya ra Galilaya. na atʼu anji achikala adzimuzunguluka na kuno anasukumana kwa hata akale phephi naye asirikise neno ra Mulungu. 2Jeso achiona mashuwa mbiri zibitwʼa nanga phapho kʼanda-kʼanda ya riro ziya, na ao avuwi enye achikala álaa anatsukutsa vimia vyao. 3Ndo Jeso achiphenya mashuwa mwenga yokala ni ya Simoni na achimwamba, “Simoni,#5:3 Simoni ni dzina rinjine ra Pʼetero. yisengeze phapho chinani vichache.” Achisagala mumo ndani ya mashuwa, na achanza kufunza riro duu ra atʼu. 4Ariphomala kufunza wamwamba Simoni vivi, “Yiphirike mashuwa chinani phenye mukatsuphe vimia vyenu muvuwe mabeshe.” 5#Joh 21:3Simoni achimuudzidza, “Aa! Baye, siswi hudzihenda hwidimavyo kuvuwa usiku wosi na kʼahupatire kamare, ela kwa hata udzamba, hundatsupha vimia vivyo.” 6#Joh 21:6Na ariphotsupha vimia, achigwira mabeshe manji hata vimia vyao vichanza kukakatʼika. 7Achiaiha anziao okala a yiyo mashuwa yinjine adze aavize. Achidza, gago mabeshe achigatiya mashuwa zosi mbiri na zichiudzala hata zichitsuma kuhoha. 8-9Avuwi achangalazwa ni gago mabeshe manji gogagwira. Simoni Pʼetero ariphoona gago, achimitʼa mavindi mbere za Jeso achiamba, “Nidzimanya mimi ni mudambi hata tsʼiwirya kukala phamwenga nawe hata vichache!” 10Jakobo na Johana anangwa a Zebedayo okala ni avuwi dza Simoni áangalala vivyo nao. Jeso achimwamba Simoni, “Utsʼogophe, kwanzira rero undakala uchiavuwa atʼu.” 11Ndo ariphoziphirika kʼanda-kʼanda ya ziya zizo mashuwa, achibitʼa nanga na achiricha gosi achimutuwa Jeso.

Jeso unamuphoza mutʼu wa mahana

(Matayo 8:1-4; Mariko 1:40-45)

12Tsʼiku mwenga, Jeso wakala u mudzi umwenga wa Galilaya, kuriko kwakala kuna mutʼu mumwenga yekala una mahana mwiri wosi. Mutʼu yiye ariphomona Jeso tu, wafinikʼirika vifunefune achimuvoya Jeso achimwamba, “Bwana, nitakasa. Ninamanya unaidima kunitakasa uchihenza.”

13Jeso achigolosa mukonowe achimukumba na kuno unaamba, “Ninahenza, takasika!” Phapho kare mahana gachimuricha. 14#Alaw 14:1-32Jeso achimwamba, “Utsʼimwambire mutʼu yeyosi gaga godzikuhendera. Ela enda ukadzonyese kwa kuhani tu uwe, na ukalavye sadaka dza vihenzwavyo ni Shariya ya Musa, na yiyo yindaamanyisa atʼu kukala udzitakaswa.”

15Ela nguma dzulu ya Jeso yichikaza kugotʼa chila phatʼu. Atʼu anji achidza kwa hata amusirikise na aphozwe makongo gao. 16Ela Jeso yiye wakala ukati kwa ukati wenda phatʼu kʼanda hicheye photsʼi atʼu kwendavoya.

Jeso unamuphoza mutʼu wa kupholoza

(Matayo 9:1-8; Mariko 2:1-12)

17Tsʼiku mwenga, Jeso wakala unafunza duu ra atʼu. Kati ya riro duu ra atʼu, phákala phasegere Afarisayo, na alimu a shariya kulaa chila kadzidzi kariko jimbo ra Galilaya, jimbo ra Judea na mudzi wa Jerusalemu. Phapho Bwana Mulungu wakala unamwidimisa Jeso kuphoza akongo. 18Ndo phapho phachidza atʼu okala atsukula mutʼu wa kupholoza na lutsʼatsʼa. Atʼu ao áheza kumuphenyeza nyumba yokala Jeso kwa akamwike mbereze, 19ela kʼaapatire mwanya wa kumuphenyeza kwa riro duu ra atʼu. Ndo atʼu ao achikotʼa na ngazi hata dzulu ya yiyo nyumba, achitsamula phatʼu hata achipata mwanya, na achimutsereza na lutsʼatsʼalwe, achimwika mbere za Jeso phapho kati-kati ya riro duu ra atʼu. 20Jeso ariphoona jisi atʼu ao arivyokala na kuluphiro, wamwamba vivi yiye mutʼu, “Musena, udzisamehewa dambizo.”

21Ndo phapho alimu a shariya na Afarisayo achanza kudziuza vivi, “Ni mutʼu ani yuno amukufuruye Mulungu vino? Kʼakuna mutʼu aidimaye kusamehe dambi, hata atsʼiphokala Mulungu hicheye tu!” 22Ela Jeso achimanya maazo gao photsʼiambirwa hata ni mutʼu, na achiauza vivi, “Kwadze munaazavyo mwenu myoyoni? 23Ni riphiro ririro dide, ni kumwamba yuno mutʼu wa kupholoza, ‘Udzisamehewa dambizo,’ hebu ni kumwamba, ‘Unuka wenende’? 24Bee, vivi nindamonyesa kukala, mimi Mutʼu yelaa dzulu nina widimi phapha duniani wa kusamehe atʼu dambi zao.” Phapho Jeso achimwamba yiye mutʼu yekala upholoza vivi, “Unuka uhwale lutsʼatsʼalo, wende vyako mudzini.” 25Yiye mutʼu yekala upholoza achiunuka phapho kare mbere za osi, achihwala lutsʼatsʼalwe achenda vyakwe mudzini na kuno unamulika Mulungu. 26Osi achangalala, na achiphenywa ni woga achimulika Mulungu achiamba, “Hudzona utʼu wa kwangalaza rero.”

Jeso unamwiha Lawi akale mwanafunziwe

(Matayo 9:9-13; Mariko 2:13-17)

27Gariphochira gago Jeso walaa konze ya uo mudzi, achimona mutosi wa kodi mumwenga aihiwaye Lawi#5:27 Atʼu anaona kukala Lawi ni dzina rinjine ra Matayo. usegere ufisi ya kodi, na Jeso achimwamba, “Nituwa!” 28Lawi achiunuka achiricha gosi achimutuwa. 29Lawi achendamuhendera Jeso ujeni ubomu kwakwe mudzini, na phákala phana atosi a kodi anji na atʼu anjine phapho orya nao. 30#Luk 15:1, 2Ndo Afarisayo na alimu a shariya achanza kwanungʼunikira anafunzi a Jeso na kwauza vivi, “Heka munarya na kunwa vinwadzi phamwenga na atosi a kodi na atʼu anjine otsʼiriwa?”#5:30 Chiyunani chinaamba: atosi a kodi na adambi? 31Ela Jeso yiye achiaamba, “Azima kʼaana haja na muganga, ario na haja na muganga ni akongo. 32Mimi tsʼidzire kudzaaiha atʼu adzonao anahenda ga haki atye, ela nákudzaaiha adambi atye.”

Swali dzulu ya kufunga

(Matayo 9:14-17; Mariko 2:18-22)

33Atʼu anjine ámwamba Jeso vivi, “Anafunzi a Johana Mubatizi anafunga kʼano nyinji na kuvoya, na anafunzi a Afarisayo nao ndivyo ahendavyo. Ela heka uwe ano ako kʼaafunga hata kazi yao ni kurya na kunwa tu?” 34Jeso naye achiauza chitʼadi vivi, “Vidze, munaidima kwahenda atʼu oambirwa nyambura afunge, na hata bwana nyambura ucheri phamwenga nao? Kʼaviidimikika vivyo. 35Ela ukati undafika urio bwana nyambura undauswa kati yao, na ukati uo ndipho andafunga.”

36Chisha Jeso achiaambira tʼadi yiyi, “Kʼakuna mutʼu atosaye chiraka kulaa valo iphya na kuchishona demuni. Achihenda vivyo, undakala udziribananga riro valo iphya, na chicho chiraka kʼachindaigana na riro demu. 37Hebu kʼakuna mutʼu atiyaye divai mbitsi ndani ya viriba#5:37 Chiriba ni chiya cha chʼingo chofumwa dza chirenje cha kwikira divai, nyuchi na kwenderera. vya pʼindi, mana, mutʼu achihenda vivyo, yiyo divai mbitsi yindachemuka na yivyudule vivyo viriba, yiyo divai yimwagike, na vivyo viriba vibanangike. 38Ela divai mbitsi niyitiywe ndani ya viriba viphya. 39Na kʼakuna mutʼu ahenzaye divai mbitsi anwapho ya kwiva, kwakukala, yiye nikwamba, yiyatʼu ya kwiva ndiyo mbidzo muno.”

Currently Selected:

Luka 5: CHIDUR

Highlight

Copy