Luka 12

Jeso unakanya ulumakwiri

(Matayo 10:26-27)

1 # Mat 16:6; Mar 8:15 Atʼu mahelufu na mahelufu ariphorundikana hata kuno achikala anayahana, Jeso waambira anafunzie mwanzo kukala, “Dzimanyirireni na kufutuka kwa hamira ya Afarisayo, yani ulumakwiri. 2#Mar 4:22; Luk 8:17Chila chofinikʼirwa chindafunulwa, na chila chofitswa chindamanyikana. 3Kwa vivyo, chila murirorigomba dzizani, atʼu andarisikira na mutsana, na chila murirorigomba pʼore-pʼore ndani ya vyumba vyodzisindikwa, atʼu andahendapanda dzulu ya nyumba arisumurire.”

Mogopheni Mulungu

(Matayo 10:28-31)

4Chisha, Jeso achiagalukira aratʼu atʼu achiaamba, “Ninamwambira asena angu, mutsʼiaogophe atʼu aulagao mwiri na achihenda vivyo akakala kʼaana rinjine ii muno ra kuhenda. 5Nindamwambira yiye muwiryaye kumogopha: mogopheni Mulungu, ariye achiulaga mwiri, una widimi wa kutsupha mutʼu moho wa Jahanamu. Ninamwambira mino, yuyu bee ndiye muwiryaye kumogopha jeri!

6“Hwalani mufano wa vinyama vidide vya kuburuka. Vivyo kala nikuguzwa, vitsano vilaa shilingi mbiri tu, chisha Mulungu kʼavinyala vivyo hata kamwenga. 7Nichiuya upande wenu mwimwi, hata zo nyere zenu zosi mumo mwenu vitswani, Mulungu unazimanya ni nyingaphi! Ndo mutsʼogophe, mana, mwimwi muna tende muno kuchira duu ra vivyo vinyama vya kuburuka!”

Tsʼimonereni waibu Jeso

(Matayo 10:32-33; 12:32; 10:19-20)

8Jeso wagomba achiamba, “Ninamwambira jeri, mutʼu yeyosi ashuhudiyaye jamani kukala, yiye ni mutʼu wangu, bee hata mimi Mutʼu yelaa dzulu nami nindakudzashuhudiya dza vivyo mbere za malaika a Mulungu kukala, yiye ni wangu. 9Ela anitinaye jamani, bee hata mimi nami nindamutina dza vivyo mbere za malaika a Mulungu.

10 # Mat 12:32; Mar 3:29 “Chila mutʼu agombaye maneno ga kunipinga mimi Mutʼu yelaa dzulu, bee kusamehewa dambize unaidima, ela yeyosi amukufuruye Roho wa Mulungu kʼandasamehewa.

11 # Mat 10:19, 20; Mar 13:11; Luk 21:14, 15 “Atʼu achimugwira na kumuphirika mbere za abomu a masinagogi na mbere za atawali na enye widimi, mutsʼangalazwe ni vyondadzihehera hebu mutsʼitangetange rondagomba. 12Maana, Roho wa Mulungu undamufunza ukati uo chicho muhenzwacho mugombe.”

Tʼadi ya dzumbe yetsʼimanya

13Mutʼu mumwenga kati ya riratʼu duu ra atʼu wamwamba Jeso vivi, “Mwalimu, mwambire muvyere wangu hugavye ufa huriorichirwa ni baba.” 14Jeso achimuudzidza achimwamba, “Abaye, ni ani yenipʼa utumia wa kulamula kumugavya ufa wenu?”

15Na phapho achenderera kwaambira osi kukala, “Dzimanyirireni mutsʼilaiwe ni matso kamare kwa vya atʼu, mana, mazagazi ga mutʼu kʼagatsukulwa ni unji wa miyo ariyo nayo.” 16Chisha achiaambira tʼadi yiyi, “Kwakala dzumbe mumwenga ariye mundawe wakala udziudzala chila chitʼu. 17Ndo yiye mutʼu achaza mwakwe moyoni achiamba, ‘Nina chila chitʼu jeri, ela tsʼina phatʼu pha kuviika, nindahendadze mino? 18Chitʼu chondahenda ni chichi, nindavomola vitsaga vyangu na nikotʼe vibomu vyenye, na mumo nindaikatʼo matsere gangu gosi na miyo yangu yosi. 19Nichimala kuhenda vivyo, nindaidima kuyamba roho yangu, vivi unayo mbeko yiriyo undahumira myaka minji. Kwa vivyo, sagala uhurire, urye miyo tu uwe, unwe na kudzihendera uhenzaro.’ 20Ela phapho Mulungu achimwamba, ‘U muzuzu uwe. Uu usiku wa rero rohoyo yindatoswa. Hʼaya, vitʼu vyosi vivyo urivyodzirundikira vindakala vya ani?’ ” 21Jeso achimarigiza na kwamba, “Vivyo ndivyo virivyo kwa mutʼu adzirundikiraye miyo mwenye tu bahi, kwa Mulungu tsʼiye tajiri.”

Mukuluphireni Mulungu

(Matayo 6:25-34)

22Chisha Jeso achiaamba anafunzie vivi, “Ndo ninamwambira mino, mutsʼibabaikire mazagazi genu, kukala mundaryani, hebu mutsʼibabaikire miiri yenu, kukala mundavalani. 23Maana, uzima ndio chitʼu cha mana, kuchira leu, na mwiri nao una maana, muno kuchira nguwo. 24Hwalani mufano wa nyama a kuburuka. Ao kʼaarima na kʼaaguwa, hebu kʼaana vitsaga, ela Mulungu unaarisa vivyo. Hʼaya kafuje mwimwi murio hata muna maana muno kuchira ao nyama a kuburuka? 25Na mutsʼibabaike kwakukala, kʼakuna aidimaye kudzonjezera hata dakika mwenga kwakwe maishani kwa kubabaika. 26Ndo muchikala kʼamwidima kuhenda hata neno dide dza rino, kwadze mubabaikire gano manjine? 27#1 Afal 10:4-7; 2 Mgu 9:3-6Hwalani mufano wa maruwa gatsamulavyo nago. Gago kʼagahenda kazi, na kʼagadzifumira nguwo. Ela ninamwambira mino, ni madzo gago genye hata Selemani mwenye na utajiriwe wosi, chisha kʼadzivikire nguwo mbidzo dza mwenga ra maruwa gaga. 28Ndo chikala Mulungu unagamanyirira hata maruwa, garigo rero ga phapho na machero ganangʼolwa, akale yiye kʼandamwidimisa mupate nguwo mwimwi? Heka mwimwi hata kuluphiro renu ni dide vino? 29Hʼaya bee mutsʼiike mbere kutsakula chondarya hebu chondanwa, na mutsʼibabaike kamare. 30Kwakukala, gago gosi bee ndigo gazungulukirwago ni atʼu osi otsʼimumanya Mulungu. Ela mwimwi Abayenu Mulungu unamanya kukala, munago haja gago. 31Ndo kurichisa vivyo, ikani mbere maneno ga Ufalumewe, na gago mundaonjezwa dzuluye.”

Utajiri wa mulunguni ndio utajiri wa jeri

(Matayo 6:19-21)

32Jeso wagomba achiamba, “Mutsʼogophe mwimwi achache, kwakukala, Abayenu Mulungu uhenza kumupʼa uo ufalumewe. 33Guzani miyo yenu yosi na pʼesa zondapata mukaapʼe achiya, na vivyo mundakala munadziikira mbeko mulunguni, kuriko utajiri ni wa kamare na kʼauphunguka. Kuko aivi kʼaafika, na hebu kʼaubanangwa ni myungu. 34Maana, moyo wa mutʼu chila ukati waza pharatʼu pharipho utajiriwe.”

Ahendikazi amanyiriri

35 # Mat 25:1-13 Jeso waenderera kugomba achiamba, “Dziikeni kwete ukati wosi, dzifungeni nguwo zidine na mataa genu mutsʼigafise. 36#Mar 13:34-36Kalani dza ahendikazi amutarizao tajiri wao auye kulaa nyamburani, kwa hata achifika muyangoni na kupiga hodi tu, mumuvugulire phapho kare. 37Baha aratʼu ahendikazi ario tajiri wao achiuya undakudzaaona a matso. Ninamwambira jeri, phapho yiye tajiri achiona vivyo undavula nguwoze mbidzo, avale za kazi na ambe ao ahendikazie asagale, yiye aahikirehikire. 38Na hata kala ni usiku wa manane hebu ni pʼeho za kucha, ao ahendikazi andahamirwa vivyo achidzaonewa ni yiye tajiri wao a matso. 39#Mat 24:43, 44Ela kalani muchimanya kukala, kala mwenye nyumba nikumanya ni usiku wa saa ngaphi urio mwivi undakudza,#12:39 Nakala zinjine zinaonjeza: angari kuchesa na... kʼangakubalire nyumbaye yivunzwe na kuphenywa. 40Ndo hata mwimwi namwi, kalani kwete ukati wosi, mana, mimi Mutʼu yelaa dzulu nindakudza ukati urio mundakala kʼamunilolera.”

Muhendikazi wa kukuluphirika na yetsʼikuluphirika

(Matayo 24:45-51)

41Pʼetero achimwamba, “Bwana, gano ni ga dzulu yehu siswi hichiyehu tu, hebu hata atʼu osi?” 42Bwana Jeso naye achimuudzidza kwa kumuuza vivi, “Hebu nimwambire muhendikazi wa kukuluphirika, na mwenye hekima arivyo. Muhendikazi wa kukuluphirika ni yuyatʼu ariye tajiri undamwika mwimirizi wa ahendikazi anzie kwa hata aapʼe leu ukati uwiryao. 43Ndo baha yiye muhendikazi wa kukuluphirika ariye tajiriwe achiuya, undakudzamona unahenda godzimulagiza. 44Ninamwambira jeri mino, tajiri achiona vivyo, undamwika muhendikazi yiye mwimirizi wa miyoye yosi. 45Ela achikala muhendikazi yiye undaaza mwakwe moyoni ambe, ‘Aa, tajiri wangu undachelewa kuuya,’ ndo hata aaphenyerere kwapiga ao ahendikazi anzie ache kwa alume, chidzako aanze kurya na kunwa hata akole, 46tajiriwe nikudza tsʼiku yiriyo undakala kʼamulolera, na saa ariyo kʼayimanya. Phapho ndipho tajiriwe undamutiya akili vikali, na amwike duu mwenga na aratʼu otsʼikuluphira. 47Na muhendikazi amanyaye ahenzwago ahende ni tajiriwe ela yiye akose kudziikatʼo na kugahenda, yiye kutiywakwe akili kundakala kubomu muno. 48Ela yuyatʼu ariye kʼamanya ahenzwago ahende ni tajiriwe, hata akahenda gawiryago atiywe akili, kutiywakwe akili kundakala kuchache. Yehewa manji undahenzwa alavye manji, na yehewa manji muno undahenzwa alavye manji muno vivyo.”

Jeso ndiye chanzo cha mugavikano wa atʼu

(Matayo 10:34-36)

49Jeso waenderera kugomba achiamba, “Kudza kwangu kundaricha dunia yitiywe tsʼanzala, nami hata ninaaza kala yaashwa kare vivi. 50#Mar 10:38Ela mimi ni seti nishononeswe muno, nife musalabani, na gago gananiyuga muno hata paka gachimire! 51Munaona nákudza duniani kureha reri? Ngʼo tsʼivyo, hata náreha mugavikano. 52Maana, kwanzira vivi, nyumba ya atʼu atsano andagavikana ahahu kwa airi, na airi kwa ahahu. 53#Mik 7:6Atʼu andagavika, hata mutumia amureme mwanawe wa chilume, na mwana wa chilume naye amureme abaye. Achetʼu andaarema ana ao a chiche, na ao ana a chiche nao, andaarema amezao. Achetʼu enye akaza ana andaarema akaza ana ao, na akaza ana nao, andaarema mevyala ao.”

Kumanya ukati

(Matayo 16:2-3)

54Jeso waambira kahiri maduu ga atʼu kukala, “Muchona maja, na muchisikira musindo tu phapho munaamba, ‘Mvula yindanya,’ na chidzako nikunya jeri. 55Muchona vuto ra vuri rinavuma munaamba, ‘Kundakala na kazikazi,’ na chidzako vinakala vivyo jeri. 56Mwimwi alumakwiri, munamanya kulola chimbere virimo vyondakala kwa kulola duniani na mainguni, ndo heka sambi kʼamwidima kumanya gano gahendekago vino?”

Erekezana na mudawao

(Matayo 5:25-26)

57Chisha phapho Jeso waamba, “Na kwadze kʼamwidima kudzilamulira enye neno idzo ra kuhenda? 58Achikala mulumbirio unakuphirika kotini, henda widimavyo werekezane naye mumo njirani, kwa hata atsʼidze akakuphirika mbere ya mulamuli, na mulamuli akakulavya kwa shikari, shikari naye akakutiya jela. 59Ninamwambira mino, uchitiywa kuko, kʼundalaa hata ulavye tʼatʼu yosi.”

Currently Selected:

Luka 12: CHIDUR

Highlight

Copy