Luka 13
13
Richani madambi genu mutsʼidze mukafa
1Ukati uo atʼu anjine ámwambira Jeso dzulu ya atʼu a Galilaya ario Pilato wakala udzialagizira achitemwa-temwa hata achifa ukati phokala analavya makafara kwa Mulungu, na milatso yao yichitsanganyikana na yo ya makafara. 2Ndo Jeso achiauza vivi, “Sambi munaona o Agalilaya a kuulagwa ákala ni adambi muno kuchira Agalilaya anziao osi? 3Tsʼivyo vivyo bee, na ninamwambira mino, hata mwimwi namwi mutsʼiphotya, mundahangamizwa dza ao. 4Hebu munaona ara atʼu kumi na anane ofinikʼirwa ni chidzumba cha mawe cha chimo chire kura Siloamu na kufa phapho kare, ákala ni adambi muno kuchira anjine osi okala anasagala Jerusalemu? 5Tsʼivyo vivyo bee, na ninamwambira mino, hata mwimwi namwi mutsʼiphotya, mundahangamizwa dza ao.”
Tʼadi ya muhi wa mutini otsʼivyala matunda
6Chisha Jeso achiaambira tʼadi yiyi: “Mutʼu mumwenga wakala una muhi wa mutini mwakwe mundani wa mizabibu, na yiye wakala achenda achiulola kwa hata awone uvyala matunda ahunde ngawa, ela wakala achifika wendawona kʼaudzangwe kuvyala hata matunda mwenga. 7Ndo achimwamba yiye muroromi wa mundawe, ‘Lola, mimi nidzihenda myaka mihahu ya kudza nichidza kwa hata nihunde matunda ga mutini uu, na tsʼidzangwe kona hata mwenga. Ndo sambi uteme, mana, unabananga mutsanga wangu bule.’ 8Ela yiye muroromi wa munda achimwamba, ‘Mutumia, nahuuriche mwaka uu kahiri, nami nindautsimbira bopʼo kuzunguluka na niutiyire mboleya. 9Uchikala undavyala matunda mwaka udzao, bee vindakala ni vidzo, ela uchikala kʼauvyalire, hʼa bee phapho undautema.’ ”
Jeso unamuphoza muchetʼu tsʼiku ya Sabato
10Tsʼiku mwenga ya Sabato Jeso wakala unafunza sinagogini, 11na mumo mwakala muna muchetʼu mumwenga yekala una pʼepʼo, yekala udzimuyuga myaka kumi na minane. Muchetʼu yiye wakala hata wenenda chivumbavumba kʼaidima kwima tititi kwa yiye pʼepʼo. 12Ndo Jeso ariphomona yiye muchetʼu, wamwiha achimwamba, “Mayo, udzihendwa uvugukwe.” 13Na chisha achimubandikira mikono kumuvoyera, na phapho kare mwiriwe uchitororoka kahiri, na achimulika Mulungu. 14#Kul 20:9, 10; Kʼumb 5:13, 14Ela mubomu wa sinagogi watsukirwa muno, kwakukala, Jeso wakala udzimuphoza yiye muchetʼu tsʼiku ya Sabato. Ndo yiye mubomu wa sinagogi achiaambira aratʼu atʼu okala arundikana phapho kukala, “Tsʼiku zehu za kuhenda kazi ni tʼandahu. Ndo mwimwi kalani muchidza tsʼiku zizo muphozwe makongo genu, ela mutsʼidze phapha, kudzaphozwa tsʼiku ya Sabato.” 15Phapho Bwana Jeso achiudzidza achiamba, “Mwi alumakwiri! Phakale phana yeyosi phano ariye kʼasundulira ngʼombewe, hebu pʼundawe kulaa chaani akendaneswa tsʼiku ya Sabato? 16Asena! Bee, vikale ni vii vivi kumuhenda avugukwe tsʼiku ya Sabato yuyu muchetʼu wa mudzungu wa Burahemu, ariye Shetani udzimuyuga myaka kumi na minane?” 17Ariphogomba gago, osi okala anashindana naye ágwirwa ni haya muno, na atʼu osi achihamirwa muno kwa maneno gosi mabomu gokala udzigahenda.
Tʼadi ya mbeyu tʼide ya haradali
(Matayo 13:31-32, 34; Mariko 4:30-32)
18Jeso wauza vivi, “Ufalume wa Mulungu u chidzedze? Nindauhwalanisha na utʼu wani? 19Ufalume wa Mulungu unaidima kuhwalanishwa na tʼadi ya mbeyu ya haradali yiriyo mutʼu mumwenga wayihwala achiyiphanda mwakwe mundani, yichimera na kukula hata uchikala muhi ubomu. Nyama a kuburuka achidzajenga nyumba zao mumo mwakwe vitaini.”
Tʼadi ya kufutuka kwa hamira
(Matayo 13:33)
20Jeso wauza kahiri achiamba, “Nindauhwalanisha Ufalume wa Mulungu na utʼu wani? 21Ufalume wa Mulungu unaidima kuhwalanishwa na tʼadi yiyi. Tsʼiku mwenga, muchetʼu wahwala hamira achiyitsanganya phamwenga na unga wa nganu daba mwenga, achiukanda, na yiyo nganu yosi yichikolea hamira.”
Muyango ufufu
(Matayo 7:13-14, 21-23)
22Jeso waenderera na charoche cha kwenda Jerusalemu, achichira na midzini na vidzidzini kusumurira neno ra Mulungu. 23Mutʼu mumwenga achimuuza vivi, “Mwalimu, akale atʼu ondativywa ni achache?” 24Jeso achiaamba, “Hendani chadi muphenye uzimani na muyango ufufu. Ninamwambira mino, anji andahenza kuphenya, ela kʼaandaidima.
25“Ukati undafika ambapho mwenye nyumba undazuka asindike luvi, na phapho mwimwi mundaanza kwima konze mupige hodi muchamba, ‘Bwana, husundulire!’ undamuudzidza amwambe, ‘Tsʼimumanya mulaako mwimwi.’ 26Namwi mundaanza kumwamba, ‘Aa! Bwana, samba ndiswi okala huchirya na kunwa phamwenga nawe, na hata uwe wafunza hata mwehu vidzidzini.’ 27#Zab 6:8Ela yiye undamwamba, ‘Tsʼimumanya mulaako mwimwi, na kwa vivyo, niukirani phapha. Mwimwi mosi bee, mu atʼu muhendao mai!’ 28#Mat 22:13; 25:30#Mat 8:11, 12Phapho ndipho mundadzuta, na murire hata ga milatso chisha, musale konze vivyo. Na mundaaona ano Burahemu, Isaka na Jakobo na agomvi a Mulungu osi, kuko Ufalumeni kwa Mulungu, ela mwimwi mundakala mudzitsuphwa konze! 29Atʼu andakudza kulaa mulairo wa dzuwa na mutswerero wa dzuwa, kulaa vurini na mwakani, adze arye shuhuli phamwenga na ao, kuko Ufalumeni kwa Mulungu. 30#Mat 19:30; 20:16; Mar 10:31Aratʼu ario ni a musindikizo vivi, andakala a mwanzo, na aratʼu ario ni a mwanzo vivi, andakala a musindikizo.”
Jeso unaahenza achina Jerusalemu
(Matayo 23:37-39)
31Ukati uo, Afarisayo anjine ámwendera Jeso achendamutsunira kukala, “Herode unahenza akuulage, kwa vivyo, uka phapha wende phatʼu phanjine.” 32Jeso yiye achiaudzidza achiaamba, “Endani mukamwambe vivi yiye mbewa, ‘Rero na machero ninalavya pʼepʼo na kwaphoza akongo, ela tsʼiku ya hahu, nindamarigiza kazi yangu.’ 33Ela hata vivyo, rero, machero na muhondo ni seti nikale ni charoni, mana, kʼaviidimikika mugomvi wa Mulungu kuulagwa konze ya Jerusalemu!
34“Atʼu a Jerusalemu! Mwimwi achina Jerusalemu! Mwimwi munaaulaga agomvi a Mulungu na kwapiga mawe aratʼu adzumbe ario Mulungu unaahuma kwenu! Ni kʼano ngaphi mino zohenza kwaudza phamwenga atʼu enu dza kolo ra kʼukʼu riakuyakuyavyo anae mwakwe makwaphani, ela mwimwi kʼamukubalire vivyo. 35#Zab 118:26Bee, vivi Mulungu hata kʼandaulola kahiri mudzi wenu. Na ninamwambira jeri, kʼamundanona kahiri hata mwambe, ‘Waajaliwa ni Mwenyezi Mulungu yiye adzaye kwa dzina ra Bwana!’ ”
Currently Selected:
Luka 13: CHIDUR
Highlight
Share
Copy
Want to have your highlights saved across all your devices? Sign up or sign in
