Kanta da ray Taloran Lalakin Tobun-balo 1

Say Pikakasi nen Azarias

1Ginapwan na saray taloran tobun-balo a di Ananias, Misael, tan Azarias#1:1 ANANIAS, MISAEL, TAN AZARIAS: Sikara yay gendat a ngaran di Sadrac, Mesac tan Abednego (nengneng yoy Dan. 6:1-7). so nanakar-akar ed apoy. Nankakanta ra na saray imno ed Dios, tan indadayew da a Katawan. 2Insan nanalagey ya ag ginmalaw si Azarias tan dimad apoy, nampikasi na maksil: 3“O Katawan, say Dios na saray lalaki mi, idadayew tan igagalang mi ka; nagalang komun ya anggad angga so ngaran mo. 4Ginawam ed sikami so kanepegan mi. Diad amin a ginawam ed sikami matwa ka lawas, tan no iyakar mo kamid panagsintinsian, maptek ka lawas. 5Ginawam so manepeg nen inyakar moy deral ed Jerusalem, say masanton siudad na saray lalaki mi. Kanepegan mi man a sintinsia lapud saray kasalanan mi. 6Ag mi ka inonur, imbeneg mi ka, tan ginawa miy amin a kasalanan. 7Ag mi sinumpal iray bengatlan ingganggan mon gawaen mi. No inonur mi ray ganggan mo, inmaligwas kami komun, 8balet natan kanepegan miy sintinsia tan dusan inyakar mod sikami. 9Impalima mo kamid saray kalaban ya ag mangingalngalep ed ganggan, managbosul, tan mapaatagey—diad sankaogsan ya ari ed mundo. 10Apaabeba kami natan, amin min mangigagalang ed sika; ambaing kamin mangilokas na sangi mi.

11“Balet lapud dilin kagalangan mo, ag mo pa dederalen so impisipanan mod sikami tan ag mo kami pa ikakaindan ya anggad angga. 12Ag mo pa isisiblet so panangasim ed sikami. Sumpal mo pa ray sipan mod kinen Abraham ya inarom, kinen Isaac ya aripen mo, tan kinen Jacob ya ama na saray masanton totoom ya Israel. 13Insipan mon itdan ira na saray kabyangay boleg, a singa karakel na saray bitewen ed tawen odino singa karakel na buer ed gilig na dayat. 14Balet natan, Katawan, daiset kami ni nen say dinanman a bansa; inermay kawalaan mi, mambibilay kamid kababaingan, lapud saray kasalanan mi. 15Ataynan kamin anggapoy ari, anggapo ray propita odino saray pangulo. Anggapo lay Timplo a nayarian min laen a pangisaklangan ed sika na saray bagat a popoolan, saray saklang, saray rigalo, odino insinso; anggapoy pasen a pangibagatan mid sika tan pakalmoan mi na panangasim. 16Balet onsisingger kamid sika a sibabawi ray puso mi tan sipapaabeba ray ispiritu mi, tan kekerewen mid sika ya awat mo kami komun, a singa kami dinmagon nanawit na saray kanding a kalakyan tan saray bakan kalakyan a bagat iran popoolan tan nilibon mataban kordiro. 17Awat mo pay pagbabawi mi a singa bagat mid sika diad sayan agew, pian naonur mi ka ed intiron puso mi. Anggapoy toon manmamatalek ed sika a nasali toy naekalay biskeg na linawa. 18-19Natan diad intiron puso mi, isisipan mi a toluken mi ka, galangen mi ka, tan onsingger kamin mampikasid sika. Ipanengneng mo pad sikami so panangasi tan abagey, tan ag mo kami pa ipepelag ed kababaingan. 20O Katawan, iyagel mo kami pa diad panamegley na sakey ed saray milagrom; itdan mo pay kagalangan so ngaran mo.

21“Ipelag mo pad kababaingan iray mamapasakit ed sikami. Ekal mo pad sikara so pakayari tan pakaoley da tan paandim pay biskeg da. 22Ipaamtam ed sikara a sika labat so Katawan tan Dios tan napnoy katageyan so panooley mod intiron mundo.”

23Saray aripen na ari ya angibontuk ed saramay taloran lalaki ed palbaan et impansiansia ran ampetapetang so apoy diad panamegley na pangiiyan da na larak, alkitran, dayami, tan salsalingsing na kiew. 24Linmiub so apoy ya anggad tinmagey na duamplo tan apat a mitro, 25tan kinmayat tan pinoolan to ray taga Babilonian manalalagey ed abay na palbaan. 26Balet linmeksab so sakey ya anghil na Katawan ed apoy a kawalaan na saramay taloran lalaki. Impolisay to may apoy, 27kanyan singa ambetel a palayupoy na dagem so nagmaliwan to, tan ag balut dinmiwit ed saramay lalaki imay apoy tan ag to ran balut pinasakitan.

Say Kanta da ray Taloran Lalakin Tobun-balo

28Diman ed palbaan, saramay taloran lalakin tobun-balo et nambabansag ira lamet a nankanta na pangidayew ed Dios:

29“Idadayew mi ka, O Katawan, say Dios na saray lalaki mi.

30Napagalangan tan nadayew komun ya anggad angga

so mapagalang tan masanton ngaran mo.

31Nakanta komun iray imno a pakagalangan mo ed ando lan ando,

tan nadayew komun ed saman a timplo so masanton kiwawalam,

32a panyodyorungan mo ed mangatatawen a tronom diad tagey na saray kirubin

tan ososdungan mo so pasen a panaayaman da ray inaatey.

Nadayew tan nagalang ka komun ya anggad angga.

33Nadayew ka komun legan mon akayorung ed tronom.

Nakanta komun iray imno a pakagalangan ed ando lan ando.

34Nadayew ka komun ed intiron katawenan.

Nakanta komun iray imno a pakagalangan mo ed ando lan ando.

35“Idayew yoy Katawan, amin yon pinalsa;