Say Sulat ni Jeremias 1
1
1Sikato yay kopia na sulat ya impawit nen Jeremias ed saray totood Jerusalem kasakbayan na inkadakep ed sikara na ari na Babilonia tan inkiakar dad Babilonia. Diad sayan sulat, nilogan iray bengatlan ingganggan na Dios ed kinen Jeremias ya ibaga tod saray totood Jerusalem.
Mabayag so Pakadakep ed saray Totoo
2Nankasalanan kayod Dios. Sikato yay makasengeg a si Ari Nabucodonosor et ngalngali to kayo la alaen a priso tan iyakar ed Babilonia. 3Mansiansia kayod man a priso legan na amayamay a taon, anggad kumapiton kailalakan; insan mareen so pamapawil na Dios ed sikayo manlapud Babilonia.
4Diad Babilonia nanengneng yo ray diriyos ya agawad kiew, pilak, tan balituk—saray diriyos a sasakbaten na totoo ed takeb da tan panaarien toy takot ed saray totoon pagano. 5Nepeg a manalwar kayo ya ag yon balut aaligen ira may Hintil. Ag yo aabuloyan iray diriyos da a panarien dad sikayo so takot no nanengneng yo ran sasakbaten ed libut tan nigagalang. 6Ingen, ikuanyod sikayon dili, “Bukor mo labat, Katawan, so nepeg min igalang.” 7Niwalad man ed sikayo so anghil na Dios; asikasoen to kayo.
Anggapoy Nagawaan na saray Talintaoy Diriyos
8Naokupan na pilak tan balituk iray talintaoy diriyos da tan ginawa na saray marunong a kumikimey iray dila ra. Balet aliwa ran peteg a diriyos, tan ag ira makasalita. 9Saray totoo et manggagawa ra na balituk iran korona tan itotoon dad kaolowan na saray diriyos da, a sarayan talintao et singa ra bibiin labalabay da ray alahas. 10No maminsan tatakewen na saray papari so pilak tan balituk ed saray diriyos da tan igagastos dan para sikaran dili; 11iyaapag da ni ingen iray bibiin marotak a walad timplo. Aalaen na saray totoo ira yan kiew, pilak, tan balituk a diriyos da, insan da ra kakawesan, a singa ra totoo. 12Balet anggaman a nasolungan ira na saray purpuran kawes a singa ra arari, ag da nin siansia niagel so sikaran dili ed pakarotakan odino pakataboney da. 13No ompeket so dabuk a manlalapud timplo ed saray lupa ra, nepeg a walay toon mamponas a mangekal ed samay dabuk. 14Singa ra totoon huis a sankabembenan da ray sitro, balet anggapoy pakayari ran manusa ed siopaman a manggagaway makapoy ed sikara. 15No maminsan wala ray punyal tan wasay ed lima ra, balet ag da niagel so sikaran dili ed pakaderal no bakal odino diad pakapangibatik ed sikara na saray matakew. 16Sikara yan amin so mamapaneknek ya aliwa ran diriyos—ag yo ra igagalang.
17Singa anggapoy kanan nabtag a yaung ira yan diriyos a nipayorung ed saray timplo ra. Napnoy mata ra na dabuk a nipupukapok na saray sali na totoon onloloob. 18Papaletan na saray papari iray timplo, diad panamegley na pangiiyan da na saray puirta, balewet tan tarangka, pian ag makaloob iray matakew. Apokuk irad asaraan a pasen iray diriyos, a singa sakey a prison ngalngali la pateyen lapud krimin a ginawa to sumpad ari. 19Seselselan na saray papari iray lamparaan a para saray diriyos. Dakel niy seselselan da nen say nakakaukolan dan para sikaran dili, balet ag nanengneng na saray talintao so anggan sakey ed sikara. 20Kakanen na saray bigis so dalem da, a singa saray kiew a panoksulan na timplo; nadederal met ira kawes da, balet ag da anggan amta. 21Nadedeketan na asewek ed timplo iray kalupaan da. 22Ompepeket ed sikara iray kulalatnit, saray anuyaw, tan saray arum a manok, tan yoyorungan ira na anggan saray pusa. 23Sikara yan amin so mamapaneknek ya aliwa ran diriyos—ag yo ra igagalang.
24Naokupan ira na balituk a mamaparakep ed sikara, balet ag ira onsileng no anggapoy mamasileng ed sikara. Nen nibububo rad saray muldora, anggapoy alikna ra. 25Anggapoy wala, ya anggan antoy bili ra, ta siansian ag ira makaingas. 26Nengneng yo so ontan lan andi-kakanaan da! Ag ira makaakar diad panamegley na saray dilin sali ra, no ag ta nepeg iran sakbaten ya iliber. 27Nababaingan iray anggan saray mangaasikasod sikara no say sakey ed saray diriyos da et atumbad dalin tan nakaukolan ya ipaalagey. No walay mangipaalagey na sakey ed sikara ed sakey a pasen, ag makagalaw, tan no dokingking so inkipaalalagey to, ag ton balut napetek so sikaton dili. Say pangyapay ed sikara na saray rigalo et kapara toy pangiter na saray rigalo ed bangkay. 28Ilalako na saray papari iray nibabagat ed saray diriyos da tan ikakana ray kuarta a para sikaran dili. Aasinan na saray kaasawaan na saray papari iray bagat, pian mabayag iran nikana, anta nepeg komun ya inagnag da rad saray mairap-bilay odino saray pakaskasi. 29Nanaabuloyan a makadiwit na saray bagat iray bibiin naliliberan odino kapananak. Sikara yan amin so mamapaneknek ya aliwa ran diriyos—ag yo ra igagalang.
30Panoy pakatawag a diriyos ira, no saray bibii et nanaabuloyan iran mangisaklang na saray bagat ed sarayan bengatlan ginawad kiew, pilak tan balituk? 31Anggan saray papari et onyoyorung irad dalem na saray timplo na maneermen ira, ya apilat-pilat iray kawes da tan akiskisan tan ag asakbungan so kaoloan da. 32Saray papari et manungol tan maneyag ira ed arap na saray diriyos da, a singa ra walad pista na pompon. 33Eekalen da ray kawes na diriyos da tan iiter dad saray kaasawaan tan anak da. 34Anggapoy wala no tulongan odino deralen na sakey a too ira yan diriyos, ta ag da nabales. Ag da nayarian a pagmaliwen odino ekalen ya ari so siopaman. 35Ag da nayarian a pagmaliwen a mayaman so sakey a too odino itdan na kuarta. No walay manggawad sikara na sipan a sinambaan, balet ag to lamlamang sumpalen, ag dan balut nabales. 36Ag dan balut niagel ed patey so sakey a too, tan ag dan balut tutulongan so toon makapoy sumpad toon mabiskeg. 37Ag da nipawil so pakanengneng na toon bulag odino nilaban so siopaman a maniirap. 38Ag da nayariay mangasi odino ontulong ed saray bibiin balo odino saray olila. 39Singa anggapoy pakayarin baton nalad kapalandeyan ira yan bengatlan ginawad kiew tan naokupan na pilak tan balituk; tan nabaingan iray totoon mangigagalang ed sikara. 40Panoy pangipasen na siopaman a diriyos ira odino tawagen ton diriyos ira?
Say Inkakulang-kulang na Panangigalang ed saray Talintaoy Diriyos
Saray taga Babilonia et ipepelag dad kababaingan iray dilin diriyos da. 41No walay toon ag makasalita, iyaakar dad timplo tan kekerewen dad Bel ya itdan toy pakayarin mansalita, a singa walay natalusan nen Bel. 42Balet anggan nabirbir na sarayan totoo ya ag makatulong iray diriyos da, diad inkakulang-kulang da itutuloy dan igalang ira. 43Aliwan satan labat, no ag ingen mangibabaliber iray bibii na saray koldon ed laman da tan manyorung irad gilig na dalan a mampopool na insinso tan iiter dan marotak a bibii so sikaran dili. No naala so sakey ed sikara a piakdulan na laki, ompawil a balawen to may biin kaabay to ya ag apili lapud aliwan magana. 44Tilatilan amin iray bengatlan nipaakar ed sarayan talintaoy diriyos. Panoy pangipasen na siopaman a diriyos ira odino tawagen ton diriyos ira?
45Saray marunong a managkitikit na kiew tan saray platiro so manggagawad sarayan diriyos, kanyan anggapoy arum a napagmaliwan da no ag say labay labat na sarayan totoo. 46Ag anggan mambibilay na andokey iray manggagawad sikara, kanyan panoy pakagawa ra na saray diriyos? 47Anggapoy ititilak na sarayan totoo no ag say palikdo tan kababaingan a tawiren na saray mantombuk a kailalakan. 48No onsabi ray bakal tan saray golo, iplano na saray papari no iner so amutan da a kaiba da ray diriyos da. 49Anggapoy nagawaan na sarayan talintaoy diriyos no wala ray bakal tan saray golo. Akin et ag nabirbir na totoo ya aliwan diriyos ira yan talintao?
50Anggapoy arum ira yan talintaoy diriyos no ag ingen kiew ira ya naokupan na pilak tan balituk; onsabiy agew a napalinew ya aliwa ran peteg a diriyos. 51Nabirbir na amin da ray bansa tan arari ya anggapoy arum ira yan talintaoy diriyos no ag say kimey na limay too. Anggapod sikaray pakayari na sakey a dios, 52tan nepeg a naamtaan na balang sakey ya aliwa ran peteg a diriyos.
53Sarayan diriyos et ag dan balut napagmaliw ya ari so sakey a too odino nipelag so oran. 54Ag iran balut makapannunot no antoy nepeg dan gawaen para sikaran dili odino makapangiter na katonungan ed sakey a toon akapanggawaay maoges; anggapon balut so nagawaan da. Andi-kakanaan iran singa saray wawak a tikyab a tikyab ed tagey. 55No napoolan so sakey a timplo, ombatik iray papari diad pangyagel dad bilay da; balet saray diriyos a kiew tan inokupan na pilak tan balituk et natilak ira a napoolan a singa saray kiew a panuksolan. 56Ag da nalabanan iray arari odino nabakal iray kalaban. Panoy pakapanisia na siopaman a diriyos ira?
57Sarayan diriyos a kiew ya inokupan na balituk tan pilak et ag da niagel so sikaran dili ed saray matakew tan saray tulisan 58ya aalaen da ray pilak tan balituk tan saray kawes da ray diriyos tan ibabatik da ran amin. Anggapoy nagawaan na saray diriyos ed pamatonda rad sikara. 59Antokaman a bengatla, manlapud masebeg ya ari ya anggad makanan banga, et maung ni nen say sakey a tila-tilan dios. Maung ni so anggan sakey a kaput na puirta nen say sakey a tila-tilan dios; niagel na sakey a kaput na puirta iray bengatlan walad dalem na abung. Anggan say sakey a kiew a lusek na palasio et maung ni nen say sakey a tila-tilan dios.
60Inter na Dios so agew, say bulan, tan saray bitewen a mangiter na silew, tan ontotoluk irad sikato. 61Ontan met na kirmat tan dagem. Nanengneng ed arawi so kirmat, tan onsisiplug ed anggan iner so dagem. 62No iganggan na Dios so lorem ya ombuyak ed intiron mundo, ontotoluk. 63No say Dios et mangipelag, manlapud tawen, na apoy a mamool ed saray kapalandeyan tan katakelan, gawaen na apoy so nibagad sikato. Ag nagawaan na diriyos ira yan bengatla—ag ira anggan makagaway maung a panangalig ed saraya. 64Akin et nepeg iran tawagen na diriyos, anta ag da itayon balut natulongan odino napasakitan? 65Amta yo ya aliwa ran diriyos—ag yo ra igagalang.
66Anggapoy pakayari na sarayan diriyos ed saray arari; ag da nibalikas iray samba ed sikara odino niiter iray bindision ed sikara. 67Ag ira makapangiletaw na saray tanda ed tawen para saray bansa; ag ira makasinag a singa say agew odino say bulan. 68Maung ni ray anggan ayayep ed katakelan nen sarayan talintaoy diriyos; makabatik iray ayayep a pangyagel day sikaran dili. 69Kanyan sigput a malinlinew ya aliwa ran diriyos—ag yo ra igagalang.
70Sarayan diriyos da, a ginawad kiew tan naokupan na pilak tan balituk, et singa ra tootoon panagabul na saray manok ed alog a nantanemay pipino; anggapon balut so nitulong da. 71Say nagawaan dan kamaungan et singa masabit a dika et tanamanan; anta abulen da komun iray manok, sikara laingey totoonan da. Singa bangkay a nibantak ed kabilongetan ira yan diriyos. 72Ondadaan iray kawes a purpuran linen ya isosolung da, kanyan amta tayon aliwa ran diriyos. Diad kaonuran, kanen ira na saray bigis, insan anggapo lan balut so napangikanaan ed sikara.
73Walay panmaungan na toon matonung ed saray arum a totoo; anggapoy kayaryan ton talintao, kanyan ag dan balut napalikdo.
Currently Selected:
Say Sulat ni Jeremias 1: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983