Saray Salmo 34
34
Panangidayew ed Dios Lapud Kaabigan To#SAY TITULO ED TIKSTON HEBREO: Salmo nen David a tinaynan toy Abimelec kayari ton nanambagel-bagelan tan patataynanen la nen Abimelec.
1Misalamat ak lawas ed Katawan;
ag ak ontondan mangidayew ed sikato.
2Idayew koy Katawan lapud saray ginagawa to;
ondengel tan manggayaga komun iray maniirap!
3Ibaan yo ak a mangitandurod Katawan;
mankakasakey itayon mangidayew ed ngaran to!
4Nampikasi ak ed Katawan et inebatan to ak,
inekal ton amin iray takot ko.
5Onsisingger ed sikato ray napapairap, et magayaga ra;
ag iran balut nabaingan.
6Ontatawag ed sikato iray doroka, et eebatan to ra;
ilalaban to ra ed amin a gunigon da.
7Say anghil na Katawan babantayan to ray mangigagalang ed Katawan
tan iyaagel to rad kaatapan.
8Nengneng mon dili so ontan lan kaabigay Katawan.
Maliket iray totoon onsasalimbeng ed sikato.
9Igalang yoy Katawan, amin yon totoo to;
saray matoluk ed sikato et walay amin a nakakaukolan da.
10Anggan saray lion nanaandian iray nakan tan nanaerasan ira,
balet ag onkukulang ed antokaman a maabig iray mangoonur ed Katawan.
11Gali dia, anak, tan dengel yo ak,
ta ibangat ta kayo a mangigalang ed Katawan.
12Labay yon maliket so pambilay yo?
Labay yon andokey tan maaligwas so pambilay yo?
13Ag kayo sirin mansasalitay maoges
tan ag kayo mantitila.
14Arawian yoy kaogsan tan manggawa kayoy kamaungan;
pampilalekan yod intiron puso so kareenan.
15Say Katawan iimanoen to ray matonung,
tan dedengelen to ray tawag da;
16balet sumpad saray managgaway kaogsan,
kanyan no ompatey ira, sigput la ran nalingwanan.
17Saray matonung ontatawag irad Katawan, et dedengelen to ra;
iyaagel to rad amin a gunigon da.
18Say Katawan maasinger ed saray nanaekalay biskeg na linawa;
ilalaban to ray sigput a naandiay ilalo.
19Amayamay iray gunigon a paniirapay toon matonung,
balet say Katawan ilalaban tod amin a gunigon to;
20aasikasoen a maung na Katawan;
anggapoy pokel ton napoter.
21Pateyen na kaogsan iray totoon maoges;
nadusa ray mamobosul ed saray matonung.
22Ilaban na Katawan iray totoo to;
ag nadusa ray papaiyagel ed sikato.
Currently Selected:
Saray Salmo 34: MBBPAN83
Highlight
Share
Copy
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983
