Marcos 4

Say Alimbawan nipaakar ed Dumaralus

(Mat. 13:1-9; Luc. 8:4-8)

1Nambangat lamet si Jesus ed gilig na Dayat na Galilea. Diad karakel na totoon dinmadagod sikato, linmogan ed sakey a baloton walad tapew na danum. Saray totoo balet, nandengel irad sakbit, diad gilig na danum. 2Amayamay iray imbangat tod sikara ya imparalan ed alimbawa. Diad pambabangat to inkuantod sikara:

3“Dengel kayo! Walay sakey a dumaralus a linman nampasek. 4Nen mansisibwag, wala ray ilik a dinmapod gilig na dalan. Sinmabi ray manok ya atap tan tinotoktok da ra. 5Saray arum ya ilik dinmapod dalin a batoy dalem to. Lapud kinaraiset tan kinaimpis na dalin, tinmubo ran tampol. 6Balet nen atagey lay agew, nalnes tan amagaan ira, lapud ataptapew iray lamut da. 7Saray arum ya ilik dinmapod dalin a tutuboay dikarikan masabit. Nen baleg la ra may dikarikan masabit, pinatey da ra may tinmubon ilik; kanyan ag ira akapambunga. 8Wala met iray ilik a dinmapod mataban dalin. Tinmubo, binmaleg, tan nambunga ra. Wala ray nambungay santatalomplon bokel so balang dawa, wala ray sananemaplo, tan wala ni ra ingey sanlasus.”

9Insan kuanen Jesus, “Dengel kayo sirin, sikayo ran walay layag!”

Say Getma na saray Alimbawa

(Mat. 13:10-17; Luc. 8:9-10)

10Nen bukbukor la nen Jesus sininggeran na saray labinduan disipulo tan saray pigarad saramay nandengel, tan kinerew dan ipaliwawa to ray alimbawa. 11Inkuanen Jesus, “Niiter ed sikayoy pakaamta ed saray maamut a bengatlan nipaakar ed Panariay Dios, balet saray arum narerengel da labat ed panamegley na alimbawa. 12Kanyan,

‘Nengneng la ra man a nengneng,

ag da met lamlamang nanengneng;

dengel la ra man a dengel,

ag da met lamlamang natalusan;

ta ompan lagi ompawil irad Dios,

et pirdonaen to ra.’”

Impaliwawa nen Jesus so Kabaliksay Alimbawa

(Mat. 13:18-23; Luc. 8:11-15)

13Inkuanen Jesus ed sikara: “Ag yo ta natalusan yan alimbawa? Panon sirin so pakatalus yod saray arum ni ran alimbawa ey? 14Say isisibwag to may dumaralus say salitay Dios. 15Saramay ilik a dinmapod gilig na dalan aliling da ray totoon kadngel dad salitay Dios, laen iran tampol nen Satanas ya ekalen imay salitan nadngel da. 16Saray arum a totoo aliling da ra may ilik a dinmapod dalin a batoy dalem to. Kadngel dad salita, awaten dan sililiket. 17Balet ag onlamut; kanyan ag mansiansiad puso ra. Kanyan no onsabi lay kairapan o sikara lay napasegsegang makasengeg ed salitay Dios, bigla la ran ombetel. 18Saray arum a totoo aliling da ra may ilik a dinmapod tutuboay dikarikan masabit. Dengelen dan tuay salita, 19balet deralen ira na saray kapagaan na panagbilay, say inkaagom ed kayamanan, tan say alablabas a pampirawat ed arum ni ran bengatla; kanyan ag ira mambunga. 20Balet saray arum a totoo aliling da ra may ilik a dinmapod mataban dalin. Dengelen day salitay Dios, awaten da tan mambunga ra. Wala ray mambungay santatalomplo, wala ray sananemaplo, tan wala ni ra ingey sanlalasus.”

Say Silew a Sinakuban

(Luc. 8:16-18)

21Intuloy nen Jesus so nansalita. Inkuanto, “No say lamparaan et selselan, sakuban kasi na timba o iyan kasid silong na katri? Ag kasi itapew ed panangipatoonan? 22Anggapoy akaamut ya ag ompaway, tan anggapoy asakuban ya ag ombawag. 23Dengel kayo sirin, sikayo ran walay layag!”

24Insan inkuantod sikara, “Talusan yon maung so narerengel yo. No panoy panukat yod arum a totoo, ontan met so panukat na Dios ed sikayo—lalon mapeget ni ingen. 25Say toon wala lay bengatlad sikato, naitdan ni; balet say anggapoy bengatlad sikato, naala so anggan say dagdaiset a walan bengatlad sikato.”

Say Alimbaway Katutubo na Bokel

26Intuloy nen Jesus so nampaliwawa: “Say Panariay Dios aliling toy sakey a toon mansisibwag na ilik ed dalin to. 27Kasumpal to, naogip no labi tan ombangon no agew. Saray ilik balet, ontutubo tan ombabaleg ira, ya ag to amta no panon so itutubo tan ibabaleg da. 28Say dalin so mamapabaleg tan mamapabunga: ontubon onaan, mambolung, tan diad kaonuran, mambunga. 29No tinmakken la ray bunga, samay nantanem anien to la ra, ta asabi lay panagani.”

Say Alimbawan nipaakar ed Bokel na Mustasa

(Mat. 13:31-32, 34; Luc. 13:18-19)

30Tinepet nen Jesus, “Antoy pangiparaan tayod Panariay Dios? Anton alimbawa so mangipalinew? 31Say Panariay Dios aliling toy bokel na mustasa, a sankamelagan a bokel diad tapew na dalin. 32Balet no nitanem la, ombaleg tan magmaliw a sankabalegan ed saray tantanaman. Mansanga na masalsalompapak, tan nayarin panobungan na saray manok ed tagey.”

33Onyay impanpupulong nen Jesus ed salitay Dios, diad panamegley na amayamay ya alimbawa. No kaonungay nayarian dan talusan, ontan met so imbabangat tod sikara. 34Ag to nampulong no ag imparalan ed alimbawa. Balet no bukbukor to la tan saray disipulo to, ipaliwawa ton amin ed sikara.

Pinatonda nen Jesus so Bagyo

(Mat. 8:23-27; Luc. 8:22-25)

35Nen onlalabi la, diad saman lamlamang ya agew, inkuanen Jesus ed saray disipulo to, “Ombaliw itayo.” 36Tinaynan da sirin ira may totoo tan linmogan irad baloton kawalaan la nen Jesus, insan ira binmaliw. Wala met iray baloton kabansag da. 37Kabebekta, sinmabi so maksil a bagyo. Lapud saray daluyon ya onsisipwak ed baloto, ngalngali la napanoy danum. 38Akadanganan a naogip si Jesus, diad bandad samput na baloto. Niliing na saray disipulo tan inkuanda, “Maistro, anggapo labat so pagpagam? Onlelereg itayo la!”

39Binmangon si Jesus tan ingganggan to may maksil a bagyo, “Tonda ka!” Insan kuantod saray daluyon, “Deen kayo!” Tinmondan tuay bagyo tan dinmeen a maung so dayat. 40Kayari to man, kuanen Jesus ed sikara, “Akin et agaylay takot yo? Anggapo ta niy pananisia yo?”

41Asabian iray balbaleg a takot tan inkuandad sakey tan sakey, “Siopa kasi yan too, a pati say dagem tan saray daluyon et ontotoluk irad sikato?”

Currently Selected:

Marcos 4: MBBPAN83

Highlight

Copy