I AR-ARI 13
13
Ti pacdaar nga imbaga ti maysa a mamadto a taga Juda. Maysa a mammadto a lacay ulbodenna ti mammadto a taga Juda tapno di agtulnog, ket papatayen ti maysa a leon. Dagiti papadi ni Jeroboam.
1Ket, adtoy, ti #2 Ar. 23:17.maysa a lalaki ti Dios a naggapu sadi Juda a gapu iti sao ni Jehova immay idiay Bet-el: ket ni Jeroboam agtatacder iti denna ti altar tapno mangpuur iti incienso.
2Ket isu nagickis a maibusor iti altar a gapu iti sao ni Jehova, ket kinunana, O altar, altar, castoy ti cuna ni Jehova: Adtoy, maysa nga anac maipasngayto iti balay ni David, #2 Ar. 23:15, 16.nga agnagan iti Josias; ket isu idatonnanto iti rabawmo dagiti papadi dagiti nangato a disso nga agpupuur iti incienso iti rabawmo, ket tultulang dagiti tattao ti puurandanto iti rabawmo.
3Ket isu nangted ti maysa a #2 Ar. 19:29.tanda idi met laeng nga aldaw, a kinunana, Daytoy isu ti tanda isu a sinao ni Jehova: Adtoy, ti altar magisayto, ket dagiti dapo nga addada iti rabawna maibellengdanto.
4Ket naaramid idi a ti ari mangngegna ti panagcuna ti lalaki ti Dios, isu nga impuccawna a maibusor iti altar sadi Bet-el, a ni Jeroboam inyunnatna ti imana manipud iti altar, a kinunana, Isu tiliwenyo. Ket ti imana, nga inyunnatna a maibusor kencuana, nagango, iti casta nga isu dina naisubli iti cagagapuna.
5Ti altar met nagisay, ket dagiti dapo naibellengda nanipud iti altar, a cas iti tanda isu a ti lalaki ti Dios intedna a gapu iti sao ni Jehova.
6Ket ti ari simmungbat, ket kinunana iti lalaki ti Dios, #Ex. 8:8; 9:28; 10:17, 18. Num. 21:7.Gawawaem ita ti parabur ni Jehova a Diosmo, ket cumararagca a maipaay caniac, tapno ti imac mapasubli manen caniac. Ket ti lalaki ti Dios gimmawwawa ken Jehova, ket ti ima ti ari napasubli manen kencuana, ket naipulang a cas idi cagagapuna.
7Ket ti ari kinunana iti lalaki ti Dios, Umayca caniac iti balay, ket agpalamiisca, ket #2 Ar. 5:15.iccancanto iti maysa a gunguna.
8Ket ti lalaki ti Dios kinunana iti ari #Num. 22:18; 24:13.Uray itedmonto caniac ti cagudua ti balaymo, diacto cumuyog kenca a mapan, diacto mangan iti tinapay wenno uminum iti danum iti daytoy a disso;
9Ta casta ti naibilin caniac babaen ti sao ni Jehova, a kinunana, Dicanto mangan iti tinapay, wenno uminum iti danum, wenno agsubli iti dalan a nagnaam.
10Iti casta isu napan iti sabali a dalan, ket saan a nagsubli idi dalan a nagnaanna a napanan idiay Bet-el.
11Ket agnaed ti maysa a lacay a mammadto idiay #2 Ar. 23:18.Bet-el; ket maysa cadagiti annacna a lallaki dimteng ket imbagana kencuana dagiti amin nga aramid a ti lalaki ti Dios inaramidna iti daydi nga aldaw idiay Bet-el: dagiti sasao nga isu sinaona iti ari, sinaoda met ken ni amada.
12Ket ni amada kinunana cadacuada, Sadino ti nagturonganna? Ket dagiti annacna nakitada ti nagturongan ti lalaki ti Dios, a naggapu sadi Juda.
13Ket isu kinunana cadagiti annacna, Sillaanyo a maipaay caniac ti asno. Iti casta isuda sinillaanda a maipaay kencuana ti asno; ket sinacayanna.
14Ket isu sinurotna ti lalaki ti Dios, ket isu nasaracanna nga agtugtugaw iti siroc ti maysa a lugo; ket isu kinunana kencuana, Sica ti lalaki ti Dios a naggapu sadi Juda? Ket isu kinunana, Siac.
15Iti casta isu kinunana kencuana, Umayca caniac iti balay, ket manganca iti tinapay.
16Ket isu kinunana, Diac mabalin ti agsubli a cumuyog kenca, uray sumbrec a cumuyog kenca; wenno siac manganacto iti tinapay uray makiinum kenca iti danum ditoy a disso:
17Ta naisao caniac a gapu iti sao ni Jehova, Dicanto mangan iti tinapay wenno uminum iti danum sadiay, wenno agsublicanto manen a magna iti dinalanmo a napan.
18Ket isu kinunana kencuana, Siac maysaac met a mammadto a cas kenca; ket maysa nga angel nagsao caniac a gapu iti sao ni Jehova, a kinunana, Isublim a caduam iti balaymo, tapno isu macapangan iti tinapay ken macainum iti danum. Ngem isu nagulbod kencuana.
19Iti casta isu nagsubli a kimmuyog kencuana, ket nangan iti tinapay iti balayna, ken imminum iti danum.
20Ket naaramid, idinto nga agtutugawda iti lamesaan a ti sao ni Jehova immay iti mammadto isu a nangisubli kencuana;
21Ket isu nagickis iti lalaki ti Dios a naggapu sadi Juda, a kinunana, Castoy ti kinuna ni Jehova, Agsipud ta dica nagtulnog iti ngiwat ni Jehova, ket dica inannurot ti bilin isu a ni Jehova a Diosmo imbilinna kenca,
22Ngem nagsublica, ket nanganca iti tinapay ken imminumca iti danum iti disso isu a nagcunaanna kenca, Dica mangan iti tinapay, ken dica uminum iti danum; ti bagim saanto a dumteng iti tanem dagiti ammam.
23Ket naaramid calpasan ti pannanganna iti tinapay, ken calpasan ti iyiinumna, nga isu sinillaanna, ti asno, a maipaay kencuana cayatna a sawen, maipaay iti mammadto nga isu insublina.
24Ket idi nga isu nacaawiden, maysa a leon #1 Ar. 20:36.simmabet kencuana iti dalan, ket isu ti pinatayna: ket ti bangcayna naiwalang iti dalan, ket ti asno sitatacder iti dennana; ti leon met sitatacder iti denna ti bangcay.
25Ket, adtoy dagiti lallaki naglabasda iti asideg, ket nakitada ti bangcay a naiwalang iti dalan, ken ti leon a sitatacder iti denna ti bangcay; ket napanda ket imbagada iti ili a #bil. 11.pagnaedan ti lacay a mammadto.
26Ket idi a ti mammadto a nangisubli kencuana a naggapu iti dalan nangngegganna, kinunana, Isu ti lalaki ti Dios, nga di-nagtulnog iti ngiwat ni Jehova: gapuna a ni Jehova inyawatna iti leon, isu a namisangpisang kencuana, ken namatay kencuana, a mayannurot iti sao ni Jehova, nga isu insaona kencuana.
27Ket nagsao cadagiti annacna, a kinunana, Sillaanyo a maipaay caniac ti asno. Ket sinillaanda.
28Ket isu napan ket nasaracanna ti bangcay a naiwalang iti dalan, ken ti asno ken ti leon a sitatacderda iti denna ti bangcay; ti leon saanna a linamut ti bangcay, ken saanna met a pinisangpisang ti asno.
29Ket ti mammadto inacupna ti bangcay ti lalaki ti Dios, ket imparabawna iti asno, ket isu ti insublina; ket immay iti ili ti lacay a mammadto, tapno dung-awanna ken isu ti itabonna.
30Ket isu incabilna ti bangcayna iti tanemna met laeng; ket isu dinungdungawanda, a kinunada, #Jer. 22:18.Ay, cabsatco!
31Ket naaramid, iti calpasan ti panangitabonna kencuana, nga isu nagsao cadagiti annacna, a kinunana, Intono matayac, iti casta itabondac iti tanem a yan ti lalaki ti Dios a naitabon #2 Ar. 23:17, 18.icabilyo dagiti tultulangco iti denna dagiti tultulangna.
32Ta ti sao #bil. 2. 2 Ar. 23:16, 19.nga isu inyickisna a gapu iti sao ni Jehova a maibusor iti altar sadi Bet-el, ken maibusor cadagiti amin a #1 Ar. 12:31.balbalay cadagiti nangato a disso nga adda cadagiti il-ili ti #1 Ar. 16:24.Samaria, dinto bumurong a matungpal.
33Iti calpasan daytoy a banag ni Jeroboam saan a naglicud iti dakes a dalanna, no di ket nangaramid manen cadagiti amin nga ili #1 Ar. 12:31.cadagiti papadi dagiti nangato a disso: siasinoman a mayat, isu ti #Oc. 17:5.inconsagrarna, tapno adda coma idi papadi dagiti nangato a disso.
34Ket daytoy a banag nagbalin a basol iti balay ni Jeroboam, tapno isu #1 Ar. 14:10.maiccat, ken isu madadael manipud iti rabaw ti daga.
Currently Selected:
I AR-ARI 13: TB1973
Highlight
Share
Copy
Want to have your highlights saved across all your devices? Sign up or sign in
Ti Biblia © 1973 Philippine Bible Society
