NEHEMIAS 9
9
Ang Pagtu-ad ni Esdras sang mga Sala sang Israel
1Karon sa ikaduha ka pulo kag apat nga adlaw sining bulan ang katawohan sang Israel nagtipon nga may pagpuasa kag may panapton nga sako, kag may duta sa mga olo nila. 2Kag ang mga Israelnon nagpain gikan sa tanan nga dumuloong, kag nagtindug kag nagtu-ad sang ila mga sala kag sang mga kalautan sang ila mga ginikanan. 3Kag nagtindug sila sa ila duug kag nagbasa sa tolon-an sang kasogoan sang Ginoo nga ila Dios sa ikap-at nga bahin sang adlaw; sa isa pa ka ikap-at nga bahin nagtu-ad sila kag nagsimba sa Ginoo nga ila Dios. 4Nagtindug sa hagdanan sang mga Levinhon sila ni Jesua, Bani, Cadmiel, Cebanias, Buni, Serebias, Bani kag Kenani; kag nagtuaw sila sa mabaskug nga tingug sa Ginoo nga ila Dios. 5Niyan ang mga Levinhon, sila ni Jesua, Cadmiel, Bani, Hasabnias, Serebias, Hodias, Sebanias, kag Petahias, nagsiling, “Tindug kag pakamaayoha ang Ginoo nga inyo Dios kutub sa gihapon tubtub sa gihapon. Pakamaayohon ang imo mahimayaon nga ngalan nga ginbayaw labaw sa tanan nga pagpakamaayo kag pagdayaw.”
6Kag si Esdras nagsiling: “Ikaw amo ang Ginoo, ikaw lamang; ginhimo mo ang langit, ang langit sang mga langit, pati ang bug-os nilang kadam-an, ang duta kag ang tanan nga butang nga yara sa iya, ang mga dagat kag ang tanan nga yara sa ila; kag ikaw nagatipig sa ila tanan; kag ang kadam-an sang langit nagasimba sa imo. 7Ikaw amo ang Ginoo, ang Dios nga nagpili kay Abram kag nagpagowa sa iya gikan sa Ur sang Caldea#Gen. 12:1. kag naghatag sa iya sang ngalan nga Abraham;#Gen. 17:5. 8kag ikaw nakasapu sang iya tagiposoon nga matutum sa atubangan mo, kag nagpakigkatipan sa iya sa paghatag sang duta sang mga Canaanhon, sang mga Hethanon, sang mga Amornon, sang mga Peresnon, sang mga Jebusnon, kag sang mga Gergasnon;#Gen. 15:18-21. sa paghatag sini sa mga kaliwatan niya; kag ikaw nagtuman sang imo mga polong, kay matarung ka.
9“Kag nakita mo ang kapipit-an sang amon mga ginikanan sa Egipto#Ex. 3:7. kag nagpamati sang ila pagtu-aw sa ubay sang Dagat nga Mapula,#Ex. 14:10-12. 10kag nagpakita sing mga tanda kag mga katingalahan kay Faraon kag sa tanan niyang alagad kag sa bug-os nga katawohan sang iya duta,#Ex. 7:8–12:32. kay nahibaloan mo nga sila nagpabugal batok sa ila; kag nakaagum ka sing ngalan, subong sang sa sining adlaw. 11Kag ginpahawa mo ang dagat sa atubangan nila, sa bagay nga nag-agi sila sa tunga sang dagat sa mamalang duta;#Ex. 14:21-29. kag ang ila mga manuglagas gintagbong mo sa mga kadadalman, subong sang bato pakadto sa gamhanan nga mga tubig.#Ex. 15:4-5. 12Labut pa sa haliging panganud ginmandoan mo sila sa adlawon, kag sa haliging kalayo sa kagab-ihon sa paghatag sa ila sing kapawa sa dalanon nga ila paglaktan.#Ex. 13:21-22. 13Nagpanaug ka man sa Bukid nga Sinai, kag nagpakighambal sa ila kutub sa langit kag naghatag sa ila sing matarung nga mga pagsolondan kag matuud nga mga kasogoan, maayong mga palatukuran kag mga sogo, 14kag nagpakilala sa ila sang imo balaan nga adlaw nga inugpahuway kag nagsogo sa ila sing mga sogo kag mga palatukuran kag kasogoan paagi kay Moises nga imo alagad.#Ex. 19:18–23:33. 15Ikaw naghatag sa ila sing kalan-on gikan sa langit sa ila kagutum#Ex. 16:4-15. kag nagpagowa sing tubig nga sa ila gikan sa igang sa ila kauhaw,#Ex. 17:1-7. kag nagsogo sa ila nga magsulud sila sa pagtag-iya sang duta nga imo nasumpa nga ihatag sa ila.#Deut. 1:21.
16“Apang sila kag ang amon mga ginikanan nagbugalon kag nagpatig-a sang ila tingkoy kag wala magpamati sang imo mga sogo; 17sila nagdumili sa pagtuman, kag wala magsapak sang imo mga katingalahan nga ginhimo mo sa tunga nila; kondi nagpatig-a sang ila tingkoy kag sa ila pagbato nagtangdo sing pangolo sa pagbalik sa ila kahiolipnan.#Num. 14:1-4; Deut. 1:26-33. Apang ikaw Dios nga handa sa pagpatawad, mainayohon kag maloloy-on, makuli sa pagpangakig kag bugana sa malig-on nga paghigugma,#Ex. 34:6; Num. 14:18. kag wala magbiya sa ila. 18Bisan sang nakahimo sila nga sa ila sing tinday nga baka nga tinunaw kag nagsiling, ‘Ini amo ang imo Dios nga nagpataklad sa imo gikan sa Egipto,’#Ex. 32:1-4. kag nakahikut sing dalagku nga mga pagpaakig, 19ikaw sa imo bugana nga mga kalooy wala magbiya sa ila sa kamingawan; ang haligi nga panganud wala magbulag sa ibabaw nila sa adlawon sa pagtuytuy sa ila sa dalanon, kag ang haligi nga kalayo sa kagab-ihon sa pagpakita sa ila sing kapawa kag sang dalanon nga ila paglaktan. 20Ikaw naghatag man sang imo maayo nga Espiritu sa pagtudlo sa ila, kag wala magpugung sang imo mana gikan sa ila baba, kag naghatag sa ila sing tubig nga sa ila kauhaw. 21Ginsakdag mo sila sing kap-atan ka tuig sa kamingawan, kag wala sila makulangi sing bisan ano; ang ila mga panapton wala magdaan kag ang ila mga tiil wala magbanug.#Deut. 8:2-4. 22Labut pa ginhatagan mo sila sing mga ginharian kag mga katawohan, nga ginpanagtag mo sa ila sono sa ila mga bahin; gani ginpanag-iyahan nila ang duta ni Sihon nga hari sang Hesbon kag ang duta ni Og nga hari sang Basan.#Num. 21:21-35. 23Ang ila mga kaliwatan man ginpabuad mo subong sang mga bitoon sang langit,#Gen. 15:5; 22:17. kag ginpasulud mo sila sa duta nga nahanungud sini nagsiling ka sa ila mga ginikanan nga magsulud sila sa pagtag-iya sini.#Jos. 3:14-17. 24Gani ang mga kaliwatan nagsulud kag nagpanag-iya sang duta, kag ginpangdaug mo sa atubangan nila ang mga pumuluyo sang duta, ang mga Canaanhon, kag gintugyan sila sa ila mga kamut, pati ang ila mga hari kag ang mga katawohan sang duta, agud nga mahimo nila sa ila ang sono sa kabubut-on nila.#Jos. 11:23. 25Kag nag-agaw sila sing mga banwa nga napamakuran kag duta nga mabungahon, kag nagpanag-iya sing mga balay nga puno sang tanan nga maayo nga butang, mga suluptan nga nakutkut, mga ulubasan, mga kaolibahan kag mga kahoy nga mabungahon sa kabuganaan; gani nagkaon sila, kag nabusug kag nagtambok, kag nagkalipay sila sa imo daku nga pagkaayo.#Deut. 6:10-11.
26“Walay sapayan nagdimatinumanon sila kag nagsumpung batok sa imo kag naghaboy sang imo kasogoan sa likod nila kag nagpatay sang imo mga manalagna, nga nagpamatuud batok sa ila sa pagpaliso sa ila sa imo, kag naghikut sila sing dalagku nga mga pagpaakig. 27Busa gintugyan mo sila sa kamut sang ila mga kasumpung, nga nagsakit sa ila; kag sa tion sang ila kalisdanan sang nagtuaw sila sa imo ginpamatian mo sila kutub sa langit; kag sono sa imo bugana nga mga kalooy ginhatagan mo sila sing mga manluluwas nga nagluwas sa ila sa kamut sang ila mga kasumpung. 28Apang sang nakapahuway sila naghimo sila liwat sing malaut sa atubangan mo, busa ginbayaan mo sila sa kamut sang ila mga kaaway, sa bagay nga naggahum sila sa ila; apang sang nagbalik sila kag nagtuaw sa imo nagpamati ka kutub sa langit, kag sa madamu nga tion ginluwas mo sila sono sa imo mga kalooy.#Huk. 2:11-16. 29Kag nagpamatuud ikaw batok sa ila agud nga mapabalik mo sila sa imo kasogoan. Apang nagbugalon sila kag wala magpamati sa imo mga sogo, kondi nagpakasala sa imo mga pagsolondan, nga kon himoon sang tawo magakabuhi sia sa ila,#Lev. 18:5. kag nagpatiskug sang ila abaga kag nagpatig-a sang ila tingkoy kag indi buut magpamati. 30Nag-antus ka sa ila sa madamu nga tuig, kag nagpamatuud batok sa ila tungud sa imo Espiritu paagi sa imo mga manalagna; apang indi sila buut magpamati.#2 Hari 17:13-18; 2 Cron. 36:15-16. Busa gintugyan mo sila sa kamut sang mga katawohan sang mga duta. 31Wala sing sapayan sa imo bugana nga mga kalooy wala mo sila paglaglaga sing bug-os ukon nagbiya sa ila; kay ikaw Dios nga mainayohon kag maloloy-on.
32“Busa karon, Dios namon, ang daku kag gamhanan kag makahaladluk nga Dios, nga nagatipig sing katipan kag malig-on nga paghigugma, indi pagpakadiotaya sa imo atubangan ang bug-os nga kasakit nga nag-abut sa amon, sa amon mga hari, sa amon mga principe, sa amon mga sacerdote, sa amon mga manalagna, sa amon mga ginikanan, kag sa bug-os mo nga katawohan, kutub sa tion sang mga hari sang Asiria#2 Hari 15:19, 29; 17:3-6; Esd. 4:2, 10. tubtub sini nga adlaw. 33Apang ikaw matarung sa tanan nga nag-abut sa amon, kay naghisayo ka sing maminatud-on apang kami nakahimo sing malaut; 34ang amon mga hari, ang amon mga principe, ang amon mga sacerdote, kag ang amon mga ginikanan wala magbantay sang imo kasogoan ukon magpamati sa imo mga sogo kag sa imo mga pagpamatuud nga imo ginpamatuud batok sa ila. 35Wala sila mag-alagad sa imo sa ila ginharian, kag sa imo daku nga pagkaayo nga ginhatag mo sa ila, kag sa duta nga malapad kag mabungahon nga ginhatag mo sa atubangan nila; kag wala sila magtalikod sa ila malaut nga mga binuhatan. 36Yari karon, mga ulipon kami sa sini nga adlaw; sa duta nga ginhatag mo sa amon mga ginikanan sa pagkaon sang iya bunga kag iya kaayohan, yari karon, mga ulipon kami sa sulud niya. 37Kag nagapatubas ini sing madamu sa mga hari nga ginpagahum mo sa amon bangud sang amon mga sala; may gahum man sila sa amon mga lawas kag sa amon kahayupan sa ila luyag, kag yari kami sa daku nga kasakit.”
Ang Katipan sang Katawohan sa Pagbantay sang Kasogoan
38Bangud sini tanan nagahimo kami sing malig-on nga katipan kag nagasulat sini, kag ang amon mga principe, ang amon mga Levinhon, kag ang amon mga sacerdote nagapat-in sa sini.
Currently Selected:
NEHEMIAS 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
