NEHEMIAS 8

1Kag ang bug-os nga katawohan nagtipon sing tingub subong nga isa ka tawo sa masangkad nga duug nga yara sa atubangan sang Gawang sang Tubig; kag nagpamolong sila kay Esdras nga escriba nga dalhon ang tolon-an sang kasogoan ni Moises nga ginsogo sang Ginoo sa Israel. 2Kag si Esdras nga sacerdote nagdala sang kasogoan sa atubangan sang pagtilipon, nga mga lalaki kag mga babayi kag sang tanan nga makapamati nga may paghangup, sa nahaunang adlaw sang ikapitong bulan. 3Kag nagbasa sia sa sini sa atubangan sang masangkad nga duug nga yara sa atubangan sang Gawang sang Tubig kutub sa pamanagbanag tubtub sa udto, sa atubangan sang mga lalaki kag mga babayi kag sang makahangup; kag ang mga idulungug sang bug-os nga katawohan nagmatalupangdon sa tolon-an sang kasogoan. 4Kag si Esdras nga escriba nagtindug sa walihan nga kahoy nga ginhimo nila tungud sa katuyoan; kag sa luyo niya nagtindug sila ni Matitias, Sema, Anaya, Urias, Helcias, kag si Maasias sa iya too; kag sa iya wala, sila ni Pedaya, Misael, Malquias, Hasum, Hasbadana, Zacarias, kag Mesullam. 5Kag ginbukad ni Esdras ang tolon-an sa itololok sang bug-os nga katawohan, kay sia labaw sa bug-os nga katawohan; kag sang nabukad niya ini ang bug-os nga katawohan nagtindug. 6Kag si Esdras nagpakamaayo sa Ginoo, ang Dios nga daku; kag ang bug-os nga katawohan nagsabat, “Kabay pa, Kabay pa,” nga nagabayaw sang ila mga kamut; kag nagduko sila kag nagsimba sa Ginoo nga nagahapa sila sa duta. 7Sila ni Jesua, Bani, Serebias, Jamin, Acub, Sabetai, Hodias, Maasias, Kelita, Azaria, Jozabad, Hanan, Pelaya, ang mga Levinhon, nagpahangup sa katawohan sang kasogoan, samtang ang katawohan nagtindug sa ila duug. 8Kag nagbasa sila sa tolon-an, sa kasogoan sang Dios, sing maathag; kag ginhatag nila ang kahologan, sa bagay nga mahangup sang katawohan ang pagbasa.

9Kag si Nehemias, nga pangolo-puud, kag si Esdras nga sacerdote nga escriba, kag ang mga Levinhon nga nagtudlo sang katawohan nagsiling sa bug-os nga katawohan, “Ining adlaw balaan sa Ginoo nga inyo Dios; dili kamo magkasakit ukon maghibi.” Kay ang bug-os nga katawohan naghibi sang nabatian nila ang mga polong sang kasogoan. 10Niyan nagsiling sia sa ila, “Lakat kamo, kaon sang sapay kag inum sang matam-is kag padala sing mga bahin sa wala makaaman; kay ining adlaw balaan sa aton Ginoo; kag dili kamo magkalisud, kay ang kalipay sang Ginoo among inyo kusug.” 11Gani ang mga Levinhon nagpahipus sang bug-os nga katawohan, nga nagasiling, “Maglinong kamo, kay ang adlaw balaan; dili kamo magkalisud.” 12Kag ang bug-os nga katawohan naglakat sa pagkaon kag sa pag-inum kag sa pagpadala sing mga bahin kag sa paghimo sing dakung kinalipay, bangud nga nahangpan nila ang mga polong nga ginpahayag sa ila.

13Sa ikaduhang adlaw nagtipon sing tingub ang mga pangolo sang mga kabaranggayan sang bug-os nga katawohan, ang mga sacerdote kag ang mga Levinhon, kay Esdras nga escriba sa pagtalupangud sang mga polong sang kasogoan. 14Kag nakita nila nga nasulat sa kasogoan kon paano nga ang Ginoo nagsogo paagi kay Moises nga ang katawohan sang Israel magpuyo sa mga payagpayag sa piesta sang ikapitong bulan, 15kag nga ipahibalo nila kag ipabantala sa tanan nilang banwa kag sa Jerusalem, “Kadto kamo sa bukid kag magkuha sing mga sanga sang olivo, mga sanga sang olivo nga talonon, mga sanga sang mirto, mga paklang sang palma, kag mga sanga sang kahoy nga madabong nga himoon nga mga payagpayag, sono sa nasulat.”#Lev. 23:33-36, 39-43; Deut. 16:13-15. 16Gani ang katawohan naglakat kag nagdala sa ila kag naghimo nga sa ila sing mga payagpayag, ang tagsatagsa sa atop sang iya balay, kag sa ila mga luwang kag sa mga luwang sang balay sang Dios, kag sa masangkad nga duug sang Gawang sang Tubig kag sa masangkad nga duug sang Gawang ni Efraim. 17Kag ang bug-os nga pagtilipon sang mga nakabalik gikan sa kabihagan naghimo sing mga payagpayag kag nagpuyo sa mga payagpayag; kay kutub sa mga adlaw ni Jesua nga lalaking anak ni Nun tubtub sadtong adlaw wala makahimo sing subong ang katawohan sang Israel. Kag may tama kadaku nga kasadya. 18Adlawadlaw man, kutub sa nahaunang adlaw tubtub sa katapusan nga adlaw, nagbasa sia sa tolon-an sang kasogoan sang Dios. Ginhiwat nila ang piesta sing pito ka adlaw; kag sa ikawalong adlaw may maligdong nga pagtilipon, sono sa pagsolondan.

Currently Selected:

NEHEMIAS 8: ABHIL82

Highlight

Copy