NEHEMIAS 4
4
Ang Pagbantay batok sa mga Kasumpong
1Karon sang pagkabati ni Sanbalat nga nagapatindug kami sang kuta, nagsingkal sia kag naakig sing daku, kag nag-uligyat sang mga Judio. 2Kag nagpamolong sia sa atubangan sang iya mga utud kag sang hangaway sang Samaria, “Ano bala ang ginahimo sining mapigaw nga mga Judio? Magapamakud bala sila? Magahalad bala sila? Pagatapuson bala nila sa isa ka adlaw? Banhawon bala nila ang mga bato gikan sa mga tinumpok sang dag-ot, sa ginatan-aw nga nasonog sila?” 3Yara sa luyo niya si Tobias nga Amonhon, kag nagsiling sia, “Bisan pa ang ginapatindug nila—kon taklasan sang ido nga talonon, lumpagon niya ang ila kuta nga bato!” 4Pamatii, O Dios namon, kay ginatamay kami; pabalika sa ila kaugalingon nga olo ang ila pasipala, kag itugyan sila nga inagaw sa duta sang kabihagan. 5Indi pagtaboni ang ila kalautan, kag indi pagpanasa ang ila sala sa atubangan mo; kay ginpaakig ka nila sa atubangan sang mga manugpatindug.
6Gani napatindug namon ang kuta; kag ang bug-os nga kuta napatabo tubtub sa katunga sang iya kataason. Kay ang katawohan may kabubut-on sa pagpangabudlay.
7Apang sang pagkabati ni Sanbalat kag ni Tobias kag sang mga Arabiahanon kag sang mga Amonhon kag sang mga Asdodnon nga ang pagkaayo sang mga kuta sang Jerusalem nagpadayon kag nga ang mga bulho nakapulan, nagsingkal sila sing tama gid; 8kag naghimbon sila tanan sing tingub sa pagkadto kag sa pagpakig-away sa Jerusalem kag sa paggamo sa iya. 9Kag nagpangamuyo kami sa amon Dios, kag nagbutang sing mga bantay batok sa ila sa adlaw kag gab-i.
10Apang ang Juda nagsiling, “Ang kusug sang mga manugdala sang lulan nagluya, kag may madamu nga dag-ot; sa bagay nga indi kita makasarang magpatindug sang kuta.” 11Kag ang aton mga kasumpung nagsiling, “Indi sila makahibalo ukon makakita tubtub nga magsulud kita sa tunga nila kag magpatay sa ila kag magpadolog sang buluhaton.” 12Sang pag-abut sang mga Judio nga nagpuyo malapit sa ila nagsiling sila sa amon sing makapulo, “Gikan sa tanan nga duug diin nagapuyo sila magataklad sila batok sa aton.” 13Gani sa manubu gid nga mga bahin sang nakawaan sa likod sang kuta, sa mga wayang, ginbutang ko ang katawohan sono sa ila mga panimalay, nga may ila nga mga espada, ila mga bangkaw, kag ila mga pana. 14Kag nagtolok ako, kag nagtindug, kag nagsiling sa mga dungganon kag sa mga manuggahum kag sa iban nga katawohan, “Dili kamo magkahadluk sa ila. Dumduma ang Ginoo, nga daku kag makakulugmat, kag pakig-away kamo tungud sa inyo mga utud, sa inyo mga anak nga lalaki, sa inyo mga anak nga babayi, sa inyo mga asawa, kag sa inyo mga balay.”
15Sang pagkabati sang amon mga kaaway nga nahibaloan namon ini kag ginpakawala sing pulus sang Dios ang laygay nila, nagbalik kami tanan sa kuta, ang tagsatagsa sa iya buluhaton. 16Kutub sadto nga tion, ang katunga sang akon mga alagad nagpangabudlay sa buluhaton, kag ang katunga sa ila nag-uyat sang mga bangkaw, sang mga taming, sang mga pana, kag sang mga limbutong; kag ang mga manuggahum yara sa likod sang bug-os nga balay sang Juda, 17nga mga nagapatindug sang kuta. Ang mga nagpas-an sing mga lulan ginlulanan sa bagay nga ang tagsatagsa nagpangabudlay sa buluhaton sing isa ka kamut kag ang isa nag-uyat sing hinganiban. 18Kag ang tagsatagsa sang mga manugpatindug may espada nga nataklus sa iya kilid samtang nagpatindug sia. Ang nagpatonog sang budyong yara sa luyo nakon. 19Kag nagsiling ako sa mga dungganon kag sa mga punoan kag sa iban sang katawohan, “Ang buluhaton daku kag malapad, kag nabahinbahin kita sa kuta, ang isa malayo sa isa. 20Sa bisan ano nga duug mabatian ninyo ang tonog sang budyong, magtilipon kamo didto sa amon. Ang aton Dios magapakig-away tungud sa aton.
21Gani kami nagpangabudlay sa buluhaton, kag ang katunga sa ila nagdala sing mga bangkaw kutub sa pagpamanagbanag tubtub sa pagsubang sang mga bitoon. 22Subong man sa amo nga tion nagsiling ako sa katawohan, “Ang tagsatagsa magdayon sa sulud sang Jerusalem upud sang iya mga alagad, agud nga sa kagab-ihon manginbantay sila sa aton kag magpangabudlay sa adlaw.” 23Gani bisan ako ukon ang akon mga utud ukon ang akon mga alagad ukon ang mga tawo sang bantay nga nagsonod sa akon, wala sa amon sing nagauba sang amon panapton; ang tagsatagsa may iya nga hinganiban sa iya kamut.
Currently Selected:
NEHEMIAS 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
