NEHEMIAS 5
5
Ang Pagbayad sang Saka Ginwala
1Karon may nagtuaw nga daku nga pagpanghakroy sang katawohan kag sang ila mga asawa batok sa mga Judio nga ila mga utud. 2Kay may iban nga nagsiling, “Kami, ang amon mga anak nga lalaki kag ang amon mga anak nga babayi, madamu; hatagi kami sing uyas, agud nga makakaon kami kag mabuhi.” 3May iban man nga nagsiling, “Amon ginaprenda ang amon mga uma, ang amon mga ulubasan, kag ang amon mga balay sa pagkuha sing uyas bangud sang tiggulutum.” 4May iban man nga nagsiling, “Nahulaman namon sing cuarta ang amon mga uma kag ang amon mga ulubasan tungud sa buhis sang hari. 5Karon ang amon unud subong sang unud sang amon mga utud, ang amon mga anak subong sang ila mga anak; apang ginapaulipon namon ang amon mga anak nga lalaki kag ang amon mga anak nga babayi, kag iban sang amon mga anak nga babayi naulipon na; apang wala kami sing gahum sa paglikaw sini, kay ang amon mga uma kag ang amon mga ulubasan yara na sa iban nga mga tawo.
6Naakig ako sing tama sang nabatian ko ang ila pagtuaw kag ini nga mga polong. 7Nagpatugsiling ako sa akon kaugalingon, kag nagpakigbais sa mga dungganon kag sa mga manuggahum. Nagsiling ako sa ila, “Nagasukut kamo sing saka, anng tagsatagsa sa iya utud.”#Ex. 22:25; Lev. 25:35-37; Deut. 23:19-20. Kag naghimo ako sing daku nga pagtilipon batok sa ila, 8kag nagsiling ako sa ila, “Kita, sono sa aton ikasarang, naggawad sang aton mga utud nga mga Judio nga nabaligya sa mga pungsud; apang ginabaligya gid ninyo ang mga inyo mga utud agud nga mabaligya sila sa aton!” Naghipus sila, kag wala sing isabat. 9Gani nagsiling man ako sa ila, “Ang butang nga inyo ginahimo indi maayo. Indi bala dapat kamo maglakat sa kahadluk sa aton Dios bangud sa kahuya sa mga pungsud nga mga kaaway naton? 10Labut pa ako kag ang mga utud ko kag ang mga alagad ko nagapahulam sa ila sing cuarta kag uyas. Bayaan ta ini nga pagpasaka. 11Iuli sa ila sini gid nga adlaw ang ila mga uma, ang ila mga ulubasan, ang ila mga kaolibahan, kag ang ila mga balay, kag ang ikaisa ka gatus nga bahin sang cuarta, sang uyas, sang bag-o nga alak, kag sang lana nga ginsukot ninyo sa ila.” 12Niyan nagsiling sila, “Iuli namon sila kag dili magsukut sing bisan ano sa ila. Amo ini ang amon himoon sono gid sa imo ginasiling.” Niyan gintawag ko ang mga sacerdote, kag ginpasumpa sila nga maghimo sila sono sa sini nga saad. 13Gintuk-ap ko man ang akon sabak kag nagsiling, “Sa among bagay ituk-ap sang Dios ang tagsa ka tawo gikan sa iya balay kag gikan sa iya pangabudlayan nga wala nagatuman sining saad. Sa amo ituk-ap sia sing subong gid sini kag kuhaan sing sulud.” Kag ang bug-os nga pagtilipon nagsiling, “Kabay pa” kag nagdayaw sa Ginoo. Kag ang katawohan naghimo sono sa sining saad.
14Labut pa kutub sa tion nga gintangdo ako nga pangolo-puud sa duta sang Juda, kutub sa ikaduha ka pulo nga tuig tubtub sa ikakatloan kag duha nga tuig ni Artajerjes nga hari, napulog duha ka tuig, ako kag ang akon mga utud wala makakaon sang kalan-on sang pangolo-puud. 15Ang unang mga pangolo-puud nga una sa akon nagpabug-at sang mga tawo, kag nagkuha sa ila sing kalan-on kag alak, luwas sang kap-atan ka siclo nga pilak. Bisan ang ila mga alagad man naggahum sa katawohan. Apang wala ako maghimo sing subong, bangud sang kahadluk sa Dios. 16Nagpadayon ako man sa buluhaton sining kuta, kag wala kami magbakal sing bisan anong duta; kag ang akon mga alagad nagtipon didto sa buluhaton. 17Labut pa may dira sa akon latok gikan sa mga Judio kag manuggahum nga isa ka gatus kag kalim-an ka tawo, luwas sa ila nga nag-abut sa amon gikan sa mga pungsud sa palibut namon. 18Karon ang gin-aman sa isa ka adlaw isa ka baka kag anum ka carnero nga pinili; mga pispis man naaman nga sa akon, kag makaisa sa napulo ka adlaw may tanan nga sari sang alak; apang tungud sini tanan wala ako magpangayo sang kalan-on sa pangolo-puud, bangud nga ang pag-ulipon mabug-at sa sining katawohan. 19Dumduma sa akon, O Dios ko, nga sa kaayohan ang tanan nga akon nahimo tungud sining katawohan.
Currently Selected:
NEHEMIAS 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
