MIQUEAS 1
1
Panalabiton tungud sa Samaria kag Jerusalem
1Ang polong sang Ginoo nga nag-abut kay Miqueas nga Morasnon, sa mga adlaw ni Jotam,#2 Hari 15:32-38; 2 Cron. 27:1-7. ni Acas,#2 Hari 16:1-20; 2 Cron. 28:1-27. kag ni Ezequias,#2 Hari 18:1–20:21; 2 Cron. 29:1–32:33. mga hari sang Juda, nga iya nakita nahanungud sa Samaria kag sa Jerusalem.
2Pamati, kamo nga mga katawohan, tanan kamo;
pamatii, O duta, kag tanan nga yara sa iya;
kag ang Ginoong Dios magsaksi batok sa inyo,
ang Ginoo kutub sa iya balaan nga templo.
3Kay yari karon, ang Ginoo nagagowa sa iya duug,
kag magapanaug kag magatapak sa mataas nga mga duug sang duta.
4Kag ang kabukiran matunaw sa idalum niya
kag ang mga nalupyakan magalitik,
subong sang talo sa atubangan sang kalayo,
subong sang mga tubig nga ginaula sa bakilid nga duug.
5Kay amo ini tanan tungud sang paglalis ni Jacob
kag tungud sa mga sala sang balay sang Israel.
Ano bala ang paglalis ni Jacob?
Indi bala ang Samaria?
Kag ano bala ang mataas nga mga duug sang Juda?
Indi bala ang Jerusalem?
6Busa himoon ko ang Samaria subong sang tinumpok sang latagon,
subong sang mga duug nga talamnan sing ulubasan;
kag iula ko ang iya mga bato sa nalupyakan,
kag ipadayag ko ang iya mga sadsaran.
7Ang tanan niya nga tinigban nga mga larawan bukbukon,
ang tanan niya nga hinakay sonogon sa kalayo,
kag ang tanan niya nga diosdios pamingawon ko;
kay sa hinakay sang makihilawason gintipon niya sila,
kag sa hinakay sang makihilawason ibalik sila.
8Tungud sini magapanalabiton ako kag magahaya;
magalakat ako nga hublas kag hubo;
magahaya ako subong sang mga chacal,
kag magapanalabiton ako subong sang mga avestruz.
9Kay ang iya mga pilas dimapaayo;
kag nagalambut ini tubtub gid sa Juda,
nagalambut ini tubtub sa gawang sang akon katawohan,
tubtub sa Jerusalem.
10Dili ini pag-isugid sa Gat,
dili gid kamo maghibi;
nagaligid ako sa yab-ok
sa Bet-le-afra.
11Taliwan,
O pumuluyo sang Safir,
sa kahubo kag kahuya;
ang pumuluyo sang Zaanan
wala maggowa;
ang paghaya sang Bet-ezel
magakuha sa inyo sang iya sakdag.
12Kay ang pumuluyo sang Marot nagalangkag sang kaayohan,
kay ang malaut nagapanaug gikan sa Ginoo
tubtub sa gawang sang Jerusalem.
13Itakud ang kangga sa kabayo nga madasig,
O pumuluyo sang Laquis;
sia amo ang kamunoan sang sala
sa babayi nga anak sang Sion,
kay sa imo nakita
ang mga paglalis sang Israel.
14Busa maghatag ka sing dolot sa pagtaliwan
sa Moreset-gat;
ang mga panimalay sang Aczib manginmalimbongon nga butang
sa mga hari sang Israel.
15Dalhon ko pa sa imo ang nagatag-iya sa imo,
O pumuluyo sang Maresa;
ang himaya sang Israel
magalambut tubtub sa Adullam.
16Magpabolog ka kag magpaalot sang imo bohok,
tungud sa mga anak nga imo nahamut-an;
palapara ang imo pagkabolog subong sang aguila,
kay ginbihag sila gikan sa imo.
Currently Selected:
MIQUEAS 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
