JONAS 4
4
Ang Kaakig ni Jonas
1Apang naalipungut si Jonas sing lakas, kag naakig sia. 2Kag nagpangamuyo sia sa Ginoo kag nagsiling, “Nagaampo ako sa imo, O Ginoo, indi bala amo ini ang ginasiling ko sang didto pa ako sa akon duta? Busa nagdalidali ako sa pagpalagyo pa Tarsis; kay nakahibalo ako nga ikaw Dios nga mainayohon kag maloloy-on, makuli sa pagpangakig, kag bugana sa malig-on nga paghigugma,#Ex. 34:6. kag nagakalisud ka sang malaut. 3Busa karon, O Ginoo, ginapakilooy ko sa imo, kuhaa sa akon ang akon kabuhi, kay maayo pa sa akon nga mapatay sang magkabuhi.” 4Kag ang Ginoo nagsiling, “Nagahimo ka bala sing maayo sa pagpangakig?” 5Niyan si Jonas naggowa sa banwa kag naglingkod nayon sa sidlangan sang banwa, kag naghimo nga sa iya didto sing payagpayag. Naglingkod sia sa idalum sini sa handong, tubtub nga makita niya kon ano ang mataboan sang banwa.
6Kag ang Ginoong Dios nag-aman sing tangantangan, kag ginpatubo ini sa ibabaw ni Jonas, agud nga manginhandong ini sa iya olo, sa pagluwas sa iya sa malaut niyang kahimtangan. Gani si Jonas nagkasadya sing lakas bangud sang tangantangan. 7Apang ang Dios nag-aman sing ulud sa pag-abut sang kaagahon sa madason nga adlaw, kag ini nag-ut-ut sang tangantangan, sa bagay nga nalaya ini. 8Sang pagsubang sang adlaw, ang Dios nag-aman sing masingkal nga salatan, kag ang adlaw nagtupa sa olo ni Jonas sa bagay nga napunaw sia; kag nagpangabay nga sa iya kaugalingon nga mapatay sia, kag nagsiling, “Maayo pa saakon nga mapatay sang sa magkabuhi.” 9Apang ang Dios nagsiling kay Jonas, “Naghimo ka bala sing maayo sa pagpangakig tungud sa tangantangan?” Kag sia nagsiling, “Nagahimo ako sing maayo sa pagpangakig, bisan tubtub sa kamatayon.” 10Kag ang Ginoo nagsiling, “May kahilak ka sa tangantangan, nga wala mo pagpangabudlayi, ukon pagpatuboa, nga nag-ulhut sa kagab-ihon, kag nawala sa kagab-ihon. 11Kag indi bala ako mahilak sa Ninive, inang daku nga banwa, nga may kapin sa isa ka gatus kag duha ka pulo ka libo ka tawo nga indi makakilala sang ila kamut nga too kag sang ila kamut nga wala, kag may madamu man nga kahayupan?”
Currently Selected:
JONAS 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
