MGA PANALABITON 1
1
Ang mga Kalisud sang Bihag nga Sion
1Daw ano nga nagalingkod sing mamingaw ang banwa
nga puno anay sang katawohan!
Nanginbalo sia nga babayi,
ang daku anay sa tunga sang mga pungsud!
Sia nga princesa sa tunga sang mga puud
nanginbumuluhis.
2Nagahibi sia sing tama sa kagab-ihon,
ang iya mga luha yara sa iya mga pisngi;
sa tanan niya nga mga hinigugma
wala gid sia sing magalipay sa iya;
ang tanan niya nga abyan nagmaluibon sa iya,
sila nangin-iya mga kaaway.
3Si Juda nagkadto sa kabihagan bangud sang kapipit-an
kag bangud sang daku nga kahiolipnan;
nagapuyo sia sa tunga sang mga pungsud,
wala sia makakita sing kapahuwayan;
ang tanan niya nga manughingabut naglambut sa iya
sa tunga sang mga kapiotan.
4Ang mga dalanon sang Sion nagalalaw,
bangud nga wala gid sing nagkadto sa maligdong nga pagtilipon;
ang tanan niya nga gawang mamingaw,
ang iya mga sacerdote nagapanghayhay;
ang iya mga ulay ginapiotan,
kag sia gid yara sa kapaitan.
5Ang iya mga kasumpung nangin-olo,
ang iya mga kaaway nagauswag,
kay ginpiotan sia sang Ginoo
tungud sang kadam-an sang iya mga paglalis;
ang iya mga bata nagkadto,
sa kabihagan sa atubangan sang kasumpung.
6Gikan sa babayi nga anak sang Sion nagtaliwan
ang bug-os niya nga pagkaharianon.
Ang iya mga principe nanginkaangay sang mga usa
nga wala makakita sing halalban;
nagataliwan sila nga wala sing kusug
sa una sang manuglagas.
7Ang Jerusalem nakadumdum
sang mga adlaw sang iya kapipit-an kag sang iya pagkamakalolooy
sang tanan niya nga matahum nga butang
nga gikan sa dumaan nga mga adlaw.
Sang naholog sa mga kamut sang kasumpung ang iya katawohan,
kag wala gid sing nagtabang sa iya,
ang mga kasumpung nakakita sa iya,
nag-uligyat sila sa iya mga pagkamamingaw.
8Ang Jerusalem nakasala sing tama,
busa nanginsubong sia sang dimatinlo nga butang;
ang tanan nga nagpadungug sa iya nagatamay sa iya,
bangud nga nakita nila ang iya pagkahubo;
hoo, nagapanghayhay sia,
kag nagatalikod.
9Ang iya pagkahigko yara sa iya mga sidsid;
sia wala makadumdum sang iya kaolihian;
busa nagkubus sia sing makatilingala,
wala sia sing manuglipay.
“Toloka, O Ginoo, ang akon kapipit-an,
kay ang kaaway nagpadaku sang iya kaugalingon!”
10Ang kasumpung nag-untay sang iya kamut
sa tanan niya nga matahum nga butang;
kay nakita niya nga ang mga pungsud
nagsulud sa iya santuario,
nga nahanungud sa ila nagsogo ka nga indi sila
magsulud sa imo pagtilipon.
11Ang bug-os niya nga katawohan nagapanghayhay
sang nagapangita sila sing kalan-on;
ginhatag nila ang matahum nila nga mga butang tungud sa kalan-on
sa pagpaumpaw sang kalag.
“Tan-awa, O Ginoo, kag toloka, kay ako nanginkailo.”
12“Wala lamang bala sa inyo, kamo tanan nga nagalabay?
Toloka kag tan-awa
kon may kasubo kaangay sang akon kasubo
nga gindala sa akon,
nga ginpapiot sa akon sang Ginoo
sa adlaw sang iya mapintas nga kaakig.
13“Gikan sa hitaas nagpadala sia sing kalayo;
sa akon mga tul-an kag nagalandas ini batok sa ila;
naghumlad sia sing pukot sa akon mga tiil;
ginpabalik niya ako;
ginpamingaw niya ako,
ginpunaw sa bug-os nga adlaw.
14“Ang akon mga paglalis ginbugkus subong nga gota;
gingapus sila sang iya kamut sing tingub;
ginpahamtang sila sa akon liog;
ginpaluya niya ang akon kusug;
ang Ginoo nagtugyan sa akon sa mga kamut
sang mga batok sa akon nga indi ko masarangan.
15“Ginpakawalay pulus sang Ginoo ang tanan ko nga gamhanan nga tawo
sa tunga nakon;
nagtawag sia sing maligdong nga pagtilipon batok sa akon
sa paglaglag sang akon mga pamatan-on nga lalaki;
gintapak sang Ginoo subong sang sa linasan sang uvas
ang ulay nga anak sang Juda.
16“Tungud sining mga butang nagahibi ako;
ang akon mga mata nagailig sing tubig;
bangud nga malayo sa akon ang manuglipay,
nga dapat magpaumpaw sang akon kalag;
ang akon kabataan mamingaw,
bangud nga naglandas ang kaaway.”
17Ang Sion nagauntay sang iya mga kamut,
apang wala gid sing magalipay sa iya;
ang Ginoo nagsogo batok kay Jacob
nga ang mga yara sa palibut niya mangin-iya mga kasumpung;
ang Jerusalem yara sa tunga nila
subong nga dimatinlo nga butang.
18“Ang Ginoo matarung,
kay nagbato ako sa iya sogo;
apang pamati, tanan kamo nga mga katawohan,
kag tan-awa ang akon kasubo;
ang akon mga ulay kag ang akon pamatan-on nga mga lalaki
gindala sa kabihagan.
19“Nagpanawag ako sa akon mga hinigugma,
apang ginlimbongan nila ako;
ang akon mga sacerdote kag mga tigulang
napatay sa banwa,
samtang nagpangita sila sing kalan-on
sa pagpaumpaw sang ila mga kalag.
20“Toloka, O Ginoo, kay yari ako sa kalisdanan,
ang akon tagiposoon nalisang,
ang akon tagiposoon nagaliso sa sulud nakon,
kay nagbato ako sing lakas.
Sa gowa ang espada nagapapas;
sa puluy-an may yara nga subong sang kamatayon.
21“Nakabati sila nga nagapanghayhay ako;
wala gid sing makalipay sa akon.
Ang tanan kong kaaway nakabati sang akon kalisdanan;
nagakasadya sila nga ikaw naghimo sini.
Dalhon mo ang adlaw nga imo ginbantala,
kag magmanginkaangay sila sa akon.
22“Mag-abut sa atubangan mo ang tanan nilang pagkamalaut;
kag himoa sa ila
subong sang ginhimo mo sa akon
bangud sa tanan kong paglalis;
kay madamu ang akon panghayhay
kag ang akon tagiposoon ginapunaw.”
Currently Selected:
MGA PANALABITON 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
