JOSUE 14
14
Ang Canaan Ginbahinbahin paagi sa Papalad
1Kag ini amo ang mga panublion nga ginbaton sang katawohan sang Israel sa duta sang Canaan, nga ginpanagtag sa ila ni Eleazar nga sacerdote, kag ni Josue nga anak ni Nun, kag sang mga pangolo sang mga kabaranggayan sang mga kabikahan sang katawohan sang Israel. 2Paagi sa papalad ang ila panublion, subong sang ginsogo sang Ginoo kay Moises nga sa siam ka kabikahan kag sa katunga nga kabikahan.#Num. 26:52-56; 34:13. 3Kay si Moises nakahatag sing panublion sa duha ka kabikahan kag sa katunga nga kabikahan sa tabok sang Jordan;#Num. 32:33; 34:14-15; Deut. 3:12-17. apang sa mga Levinhon wala sia maghatag sing panublion sa tunga nila. 4Kay ang mga anak ni Jose duha ka kabikahan, si Manases kag si Efraim; kag wala sila maghatag sing bahin sa mga Levinhon sa duta, luwas sang kabanwaanan nga puluy-an, pati sang ila mga halalban nga sa ila kahayupan kag sa ila pagkabutang. 5Subong sang ginsogo sang Ginoo kay Moises amo ini ang ginhimo sang katawohan sang Israel; ginbahinbahin nila ang duta.
Ang Hebron Ginhatag kay Caleb
6Niyan ang mga anak ni Juda nagpalapit kay Josue sa Gilgal; kag si Caleb nga anak ni Jefone nga Ceniznon nagsiling sa iya, “Ikaw nakahibalo sang butang nga ginpamolong sang Ginoo kay Moises nga tawo sang Dios nahanungud sa akon kag nahanungud sa imo#Num. 14:30. sa Cades-barnea. 7Ako kap-atan ka tuig sang ginpadala ako ni Moises nga alagad sang Ginoo kutub sa Cades-barnea sa paglampitaw sang duta; kag ginsugiran ko sia sang yari sa akon tagiposoon.#Num. 13:1-30. 8Apang ang akon mga utud nga nagtaklad kaupud nakon nagpatunaw sang tagiposoon sang katawohan; walay sapayan ako nagsonod sing bug-os gid sa Ginoo nga akon Dios. 9Kag si Moises nagsumpa sadtong adlaw, nga nagasiling, ‘Sa pagkamatuud ang duta nga natapakan sang imo tiil manginpanublion nga dayon sa imo kag sa imo mga anak, bangud nga nag onod ka sing bug-os sa Ginoo nga akon Dios.’#Num. 14:24. 10Kag karon, yari karon, sono sa ginpamolong niya, ginbuhi ako sang Ginoo sining kap-atan kag lima ka tuig kutub sang tion nga ang Ginoo naghambal sining polong kay Moises, sang nagpanlakatan ang Israel sa kamingawan; kag karon, yari karon, ako kawalaon kag lima ka tuig sining adlaw. 11Sa sining adlaw ako subong pa kakusug sang adlaw nga ginpadala ako ni Moises; subong sang kakusug ko sadto amo ang kakusug ko karon, nga sa pag-awayan, kag sa paggowa kag sa pagsulud. 12Busa karon ihatag sa akon ining kabakoloran nga ginpamolong sang Ginoo sadtong adlaw; kay ikaw nakabati sadtong adlaw kon paano nga mga Anakimnon yadto didto, pati ang dalagku kag malig-on nga kabanwaanan: ayhan ang Ginoo magaupud sa akon, kag masobol ko sila sono sa ginpamolong sang Ginoo.”
13Niyan ginpakamaayo sia ni Josue; kag ginhatag niya kay Caleb nga anak ni Jefone ang Hebron nga panublion. 14Gani ang Hebron nanginpanublion ni Caleb nga anak ni Jefone nga Ceniznon tubtub sining adlaw, bangud nga nagsonod sia sing bug-os sa Ginoo, ang Dios sang Israel. 15Karon ang ngalan sang Hebron sadto anay Kiryat-arba;#14:15 Kon sayoron Ang banwa sang Arba. ining Arba ang tawo nga daku gid sa mga Anakimnon. Kag ang duta nakapahuway gikan sa inaway.
Currently Selected:
JOSUE 14: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
