JOB 4
4
Si Elifaz Nagasabdong kay Job
1Niyan nagsabat si Elifaz nga Temanhon:
2“Kon ang isa magpangahas sa paghambal sa imo, magkasakit ka bala?
Apang sin-o bala ang makapugong sang iya kaugalingon sa pagpamolong?
3Yari karon, ikaw nakatudlo sa madamu,
kag nakapabaskug ka sang maluya nga mga kamut.
4Ang imo mga polong nakapapag-on sa iya nga nagakapukan,
kag ginpabakud mo ang maluya nga mga tuhud.
5Apang karon ini nag-abut sa imo, kag ginapunaw ka;
ini nagatandug sa imo, kag nalisang ka.
6Indi bala ang imo kahadluk sa Dios pagsalig mo,
kag ang pagkatarung sang imo mga dalanon imo paglaum?
7“Panumduma, sin-o bala ang nawala nga wala sing sala?
Ukon diin bala ang mga matarung ginapapas?
8Sono sa nakita ko, sila nga nagaarado sing kalautan
kag nagasab-ug sing kagamo nagaani sang amo.
9Tungud sa gininhawa sang Dios nawala sila,
kag tungud sa pusnga sang iya kaakig napapas sila.
10Ang ngurub sang leon, ang tingug sang mabangis nga leon,
ang mga ngipon sang totoy nga mga leon, nagakaboong.
11Ang tigulang nga leon nagakawala tungud sa kakulang sing tulukbon,
kag ang mga totoy sang leon nga inang nagaaplaag.
12“Karon ang isa ka butang gindala sa akon sing tago,
ang akon dulunggan nakabaton sing hutik sini.
13Sa mga panghunahuna gikan sa mga palanan-awon sang kagab-ihon,
sang nag-abut ang hamook nga katologon sa mga tawo,
14nag-abut sa akon ang kahadluk, kag ang palangurug,
nga nagpakibang sang tanan ko nga mga tul-an.
15Niyan isa ka espiritu naglabay sa akon nawung;
nagpalanindug ang balahibo sang akon lawas.
16Nagdolog ini,
apang indi ako makakilala sang iya dagway.
May dagway sa atubangan sang akon mga mata;
may katinong, kag nabatian ko ang isa ka tingug:
17‘Magalabi pa bala katarung sa Dios ang tawong mamalatyon?
magalabi pa bala kaputli ang tawo sa iya Magbubuhat?
18Wala sia nagasalig bisan sa iya mga alagad,
kag ang iya mga manugtunda ginapabangdan niya sing kabuangan;
19daw ano pa gid sila nga nagapuyo sa mga balay nga lunang,
nga ang iya sadsaran yara sa yab-ok,
nga ginapigsa kaangay sang sipit.
20Kutub sa kaagahon tubtub sa kagab-ihon ginalaglag sila;
nagakawala sing dayon nga wala sing bisan sin-o nga nagasapak sini.
21Kon bugrason ang ila banting sang layanglayang sa sulud nila,
wala bala nagakapatay sila, kag nga wala sing kaalam?’
Currently Selected:
JOB 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
