JOB 3
3
Si Job Nagakasubo nahanungud sang Iya Pagkatawo
1Sa tapus sini gintikab ni Job ang iya baba kag ginpakamalaut ang adlaw sang iya pagkatawo.#Jer. 20:14-18. 2Kag si Job nagsiling:
3“Mawala ang adlaw nga akon ginpakatawohan,
kag ang kagab-ihon nga nagsiling,
‘May lalaki nga bata nga ginpanamkon.’
4Yadto nga adlaw manginkadudulman!
Ang Dios gikan sa ibabaw indi magpangita sini,
ukon ang kapawa magsilak sa sini.
5Mag-angkon sini ang kadulum kag ang mangitongito nga kadudulman.
Magholon sa iya ang mga gal-um;
magpakugmat sini ang pagkaitum sang adlaw.
6Nahanungud sadtong gab-i—dakpon ini sang pitipit nga kadudulman!
dili ini magkalipay sa mga adlaw sang tuig,
dili ini pag-ilakip sa kadamuon sang mga bulan.
7Yari karon, magmingaw yadtong gab-i;
dili mag-abut sa iya ang malipayon nga tingug.
8Magpakamalaut sila sini nga nagapakamalaut sang adlaw,
ang mga sampaton magpukaw sang Leviatan.
9Magdulum ang mga bitoon sang iya kasisidmon;
papangitaa ini sing kapawa, apang wala,
kag dili pagpatan-awa sang mga ilalakub sang kaagahon;
10bangud nga wala ini nagtakup sang mga ganhaan sang tiyan sang akon iloy,
ukon nagtago sing kagamo gikan sa akon mga mata.
11“Ngaa bala nga wala ako mapatay kutub sa tiyan,
ukon mabugtoi sing ginhawa sang ginbun-ag ako sang akon iloy?
12Ngaa bala nga ginbaton ako sang mga tuhud?
Ukon ngaa bala sang mga soso, nga nagsoso ako?
13Kay niyan nakahigda na ako kuntani kag naglinong;
nakatolog na ako kuntani; niyan nakapahuway na ako,
14kaupud sang mga hari kag mga manuglaygay sang duta
nga nagpatindug sa ila sing mga duug nga mamingaw,
15ukon kaupud sa mga principe nga may bulawan,
nga nagpuno sang ila mga balay sing pilak.
16Ukon ngaa bala indi ako subong sang natago nga nahar-as,
subong sang mga bata nga wala makakita sing kapawa?
17Didto ang mga malauton nagauntat sa pagtublag,
kag didto ang mga lapyo nagapahuway.
18Didto ang mga binilanggo nagapahuway sing tingub;
indi sila makabati sang tingug sang manugdumala sang pangabudlay.
19Yadto didto ang magamay kag ang dalagku,
kag ang alagad hilway sa iya agalon.
20“Ngaa bala ang kapawa ginhatag sa iya nga yara sa kasakit,
kag ang kabuhi sa napaitan sa kalag;
21nga nagahandum sang kamatayon, apang wala ini mag-abut,#Bug. 9:6.
kag nagakutkut tungud sini labi pa sa mga natago nga bahandi;
22nga nagakalipay sing lakas,
kag nagakasadya, kon makita nila ang lulubngan?
23Ngaa bala ang kapawa ginhatag sa tawo nga ang iya dalan nalipdan,
nga ginkudalan sang Dios?
24Kay ang akon panghayhay nagaabut sa wala pa ako nakakaon,
kag ang akon mga pag-ugayong ginabobo kaangay sang tubig.
25Kay ang butang nga ginahadlukan ko nagaabut sa akon,
kag ang ginakahangaw-an ko nagakari sa akon.
26Indi ako mahim-ong, kag indi ako malinong;
wala ako sing kapahuwayan; kondi ang kagamo nagaabut.”
Currently Selected:
JOB 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
