HUKOM 9
9
Ang Paghari ni Abimelec
1Karon si Abimelec nga anak ni Jerubbaal nagkadto sa Siquem sa mga utud sang iya iloy kag nagpakighambal sa ila kag sa bug-os nga panimalay sang balay sang amay sang iya iloy, 2“Isiling sa mga idulungug sang tanan nga tawo sang Siquem, ‘Kon labi pa bala kaayo sa inyo, nga ang tanan nga anak nga lalaki ni Jerubbaal nga kapitoan ka tawo magpangolo sa inyo, ukon nga ang isa magpangolo sa inyo?’ Dumduma man nga ako inyo tul-an kag inyo unud.” 3Kag ang mga utud sang iya iloy nagpamolong nahanungud sa iya sa mga idulungug sang tanan nga tawo sang Siquem sini tanan nga polong; kag ang ila mga tagiposoon nabuyuk sa pagsonod kay Abimelec, kay nagsiling sila, “Aton utud sia.” 4Kag ginhatagan nila sia sing kapitoan ka bilog nga pilak gikan sa balay ni Baal-berit nga ginhinakay ni Abimelec sa mga tawo nga kulangkulang kag hanginon, nga nagsonod sa iya. 5Kag nagkadto sia sa balay sang iya amay sa Ofra, kag ginpatay ang iya mga utud nga mga anak ni Jerubbaal, nga kapitoan ka tawo, sa isa ka bato; apang nabilin si Jotam nga kamanghuran nga anak ni Jerubbaal, kay nanago sia. 6Kag ang tanan nga tawo sang Siquem nagtilipon sing tingub, kag ang bug-os nga panimalay ni Milo, kag nagkadto kag naghimo kay Abimelec nga hari, sa luyo sang terebinto sang haligi nga yara sa Siquem.
7Sang ginsugid nila ini kay Jotam, nagkadto sia kag nagtindug sa putokputokan sang Bukid nga Gerizim, kag nagbayaw sang iya tingug kag nagsinggit kag nagsiling sa ila, “Pamatii ninyo ako, kamo nga mga tawo sang Siquem, agud nga ang Dios magpamati sa inyo. 8Ang mga kahoy nagkadto sa isa ka tion sa paghaplas sing hari sa ibabaw nila; kag nagsiling sila sa kahoy nga olivo, ‘Gahum ka sa amon.’ 9Apang ang kahoy nga olivo nagsiling sa ila, ‘Bayaan ko bala ang akon katambok, nga tungud sa akon ginapadunggan nila ang Dios kag ang tawo, kag magkadto sa paghapayhapay sa ibabaw sang mga kahoy?’ 10Kag ang mga kahoy nagsiling sa higuera, ‘Kari ka, kag maggahum sa amon.’ 11Apang ang higuera nagsiling sa ila, ‘Bayaan ko bala ang akon katam-is kag ang akon maayong bunga, kag magkadto sa paghapayhapay sa ibabaw sang mga kahoy?’ 12Kag ang mga kahoy nagsiling sa balagon, ‘Kari ka, kag maggahum sa amon.’ 13Kag ang balagon nagsiling sa ila, ‘Bayaan ko bala ang akon bag-ong alak nga nagalipay sang Dios kag sang tawo, kag magkadto sa paghapayhapay sa ibabaw sang mga kahoy?’ 14Niyan ang tanan nga kahoy nagsiling sa talongon, ‘Kari ka, kag maggahum sa amon.’ 15Kag ang talongon nagsiling sa mga kahoy, ‘Kon sa pagkamatuud ginahaplas ako ninyo nga hari sa inyo, niyan kari kag pasilong kamo sa idalum sang akon landong; apang kon indi, maggowa ang kalayo sa talongon kag maglamon sang mga cedro sang Libano.’
16“Busa karon, kon naghisayo kamo sing matuud kag matarung nga ginhimo ninyo nga hari si Abimelec, kag kon naghisayo kamo sing maayo kay Jerubbaal kag sa iya panimalay, kag nakahimo sa iya sono sa nagakaigo sa iya mga kamut— 17kay ang akon amay nagpakig-away tungud sa inyo, kag nagpasimpalad sang iya kabuhi, kag nagluwas sa inyo sa kamut sang Midian; 18kag kamo nagtindug batok sa panimalay sang akon amay sining adlaw, kag nagpatay sang iya mga anak, nga kapitoan ka tawo, sa isa ka bato, kag naghimo kay Abimelec, ang anak sang iya alagad nga babayi, nga hari sa mga tawo sang Siquem, bangud nga inyo utud sia— 19kon kamo niyan nakahisayo sing matuud kag matarung kay Jerubbaal kag sa iya panimalay sining adlaw, niyan magkalipay kamo kay Abimelec, kag sia man magkalipay sa inyo; 20apang kon wala, maggowa ang kalayo gikan kay Abimelec, kag maglamon sang mga tawo sang Siquem, kag sang panimalay ni Milo; kag maggowa ang kalayo gikan sa mga tawo sang Siquem, kag gikan sa panimalay ni Milo, kag maglamon kay Abimelec.” 21Kag si Jotam nagdalagan kag nagpalagyo, kag nagkadto sa Beer, kag nagpuyo didto, sa kahadluk kay Abimelec nga iya utud.
22Si Abimelec nagprincipe sa Israel sing tatlo ka tuig. 23Kag ang Dios nagpadala sing espiritu nga malaut sa tunga ni Abimelec kag sa mga tawo sang Siquem; kag ang mga tawo sang Siquem nagluib kay Abimelec; 24agud nga ang pagpintas nga nahimo sa kapitoan ka anak ni Jerubbaal mag-abut kag ang dugo nila maholog kay Abimelec nga ila utud, nga nagpatay sa ila, kag sa mga tawo sang Siquem, nga nagpabakud sang iya mga kamut sa pagpatay sang iya mga utud. 25Kag ang mga tawo sang Siquem nagbutang sing mga manugpuut sa iya sa mga putokputokan sang mga bukid, kag ginbuyong nila ang tanan nga nag-agi sa sadtong dalanon sa luyo nila; kag ginsugid ini kay Abimelec.
26Kag si Gaal nga anak ni Ebed nag-abut upud ang iya mga utud kag nagkadto sa Siquem; kag ang mga tawo sang Siquem nagsalig sa iya. 27Kag nagkadto sila sa latagon, kag nagpamupo sa ila mga ulubasan kag naglinas sang mga uvas, kag naghiwat sing piesta, kag nagsulud sa balay sang ila dios, kag nagkaon kag nag-inum kag nagpakamalaut kay Abimelec. 28Kag si Gaal nga anak ni Ebed nagsiling, “Sin-o bala si Abimelec, kag sin-o bala si Siquem, nga mag-alagad kita sa iya? Wala bala ang anak ni Jerubbaal kag si Zebul nga iya manugdumala nag-alagad sa mga tawo ni Hamor nga amay ni Siquem? Ngaa bala niyan mag-alagad kita sa iya? 29Kabay pa kuntani nga ining katawohan yari sa idalum sang akon kamut! niyan pahalinon ko si Abimelec. Kag nagsiling sia kay Abimelec, ‘Dugangi ang imo hangaway, kag gowa ka.’”
30Sang si Zebul nga pangolo sang banwa nakabati sang mga polong ni Gaal nga anak ni Ebed, nagdabdab ang iya kaakig. 31Kag nagpadala sia sing mga manugbalita sing tago kay Abimelec sa Aruma, nga nagasiling, “Yari karon, si Gaal nga anak ni Ebed kag ang iya mga utud nag-abut sa Siquem, kag ginapilit nila ang banwa batok sa imo. 32Busa karon, tindug ka sa kagab-ihon, ikaw kag ang katawohan nga kaupud nimo, kag magpuut kamo sa latagon. 33Niyan sa kaagahon, sa pagbutlak sang adlaw, magbangon ka sing aga pa kag gubaton ang banwa; kag kon si Gaal kag ang katawohan kaupud niya maggowa batok sa imo, niyan himoon mo sa ila sono sa imo kahigayonan.”
34Kag si Abimelec nagtindug sa kagab-ihon kag ang bug-os nga katawohan kaupud niya, kag nagpuut sila batok sa Siquem sa apat ka hut-ong. 35Kag si Gaal nga anak ni Ebed naggowa kag nagtindug sa salamputan sang gawang sang banwa; kag si Abimelec kag ang bug-os nga katawohan kaupud niya nagtindug gikan sa pulut-an. 36Kag sang nalantawan ni Gaal ang katawohan, nagsiling sia kay Zebul, “Yari karon, may nagadulhog nga mga tawo gikan sa mga putokputokan sang mga bukid!” Kag si Zebul nagsiling sa iya, “Ginatolok mo ang landong sang mga bukid subong nga daw mga tawo.” 37Si Gaal nagpomolong liwat kag nagsiling, “Tan-awa, may mga tawo nga nagadulhog paagi sa tunga sang duta, kag ang isa ka hut-ong nagapakari sa dalanon sang terebinto sang Meonenim.#9:37 Kon sayoron Terebinto sang mga manugpakot. 38Niyan si Zebul nagsiling sa iya, “Diin na bala karon ang imo baba, nga nagsiling ka, ‘Sin-o bala si Abimelec, nga mag-alagad kita sa iya?’ Indi bala ini ang katawohan nga gintamay mo? Gowa ka karon, kag awayon sila.” 39Kag si Gaal naggowa sa atubangan sang mga tawo sang Siquem, kag nagpakig-away kay Abimelec. 40Kag ginlagas sia ni Abimelec, kag nagpalagyo sia sa atubangan niya; kag may napukan nga madamu nga pilason, tubtub sa salamputan sang gawang. 41Kag si Abimelec nagpuyo sa Aruma; kag gintabog ni Zebul si Gaal kag ang iya mga utud, agud nga indi sila magpuyo sa Siquem.
42Sa madason nga adlaw ang katawohan nagkadto sa latagon. Kag nagsugid sila kay Abimelec. 43Ginkuha niya ang iya katawohan kag ginbahinbahin sila sa tatlo ka kabon, kag nagpuut sa latagon; kag naglantaw sia kag nakita ang katawohan nga nagagowa sa banwa, kag nagtindug sia batok sa ila kag ginpatay sila. 44Si Abimelec kag ang mga kabon kaupud niya nagsolong kag nagtindug sa salamputan sang gawang sang banwa, samtang ang duha ka kabon nagdamhag sa tanan nga yadto sa latagon kag ginpatay sila. 45Kag si Abimelec nag-away batok sa banwa sa bug-os sadtong adlaw; gin-agaw niya ang banwa, kag ginpatay ang katawohan nga yadto didto; kag ginlaglag niya ang banwa kag ginsab-ugan ini sing asin.
46Sang nakabati sini ang tanan nga tawo sa Torre sang Siquem, nagsulud sila sa kuta sang balay ni El-berit. 47Ginsugid kay Abimelec nga nagtilipon sing tingub ang tanan nga tawo sang Torre sang Siquem. 48Kag si Abimelec nagtaklad sa Bukid nga Salmon, sia kag ang bug-os nga katawohan kaupud niya; kag si Abimelec nagdala sing wasay sa iya kamut, kag nagtapas sing sanga gikan sa kakahoyan, kag nagkuha sini kag ginpas-an ini sa iya abaga. Kag nagasiling sia sa katawohan nga kaupud niya, “Ang nakita ninyo nga ginahimo ko, dalidali kamo kag maghimo subong sang nahimo ko.” 49Gani sa among bagay ang bug-os nga katawohan nagtapas ang tagsa ka tawo sang mga sanga kag nagsonod kay Abimelec. Kag ginbutang sila sa kuta, kag gintutdan sing kalayo ang kuta sa ibabaw nila, sa bagay nga ang tanan nga tawo sang Torre sa Siquem nagkalamatay man, mga isa ka libo ka lalaki kag mga babayi.
50Niyan si Abimelec nagkadto sa Tebes, kag nagpatindug sing dologan batok sa Tebes, kag gin-agaw ini. 51Apang sa tunga sang banwa may torre nga malig-on, kag nagpalagyo didto ang tanan nga lalaki kag babayi, kag ang tanan sa banwa, kag nagpangtakup sila sa sulud; kag nagsaka sila sa atop sang torre. 52Kag nagkadto si Abimelec sa torre, kag nagpakig-away batok sini, kag nagpalapit sa ganhaan sang torre sa pagtutud sini sa kalayo. 53Kag ginholog sang isa ka babayi ang naibabaw nga bato sang galingan sa ibabaw sang olo ni Abimelec, kag naboong ang iya bagol. 54Niyan gintawag niya sing madali ang iya pamatan-on nga manugdala sang hinganiban, kag nagsiling sa iya, “Gabuta ang imo espada kag patya ako, agud nga ang mga tawo indi magsiling nahanungud sa akon, ‘Isa ka babayi nagpatay sa iya.’” Kag ginbuno sia sang iya pamatan-on nga lalaki, kag napatay sia. 55Kag sang nakita sang mga tawo sang Israel nga patay na si Abimelec, nagpauli ang tagsa ka tawo sa iya duug. 56Sa amo ginbalusan sang Dios ang pagkamalaut ni Abimelec, nga iya ginhimo sa iya amay sa pagpatay sang iya kapitoan ka utud; 57kag ang bug-os nga pagkamalaut sang mga tawo sang Siquem ginbalus sang Dios sa ibabaw sang ila mga olo, kag nag-abut sa ila ang pagpakamalaut ni Jotam nga anak ni Jerubbaal.
Currently Selected:
HUKOM 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
