HUKOM 8
8
Si Gideon Nagadakup sang mga Hari sang Midian
1Kag ang mga tawo sang Efraim nagsiling sa iya, “Ngaa bala nga ginhimoan mo kami sing subong, nga wala mo kami pagtawga sang pagkadto mo sa pag-away batok sa Midian?” Kag ginbasol nila sia sing matigdas. 2Kag nagsiling sia sa ila, “Ano bala ang nahimo ko karon nga ipaanggid sa inyo? Indi bala ang sinaghaw sang uvas sang Efraim maayo pa sa patubas sang uvas sang Abiezer? 3Gintugyan sang Dios sa inyo mga kamut ang mga principe sang Midian, si Oreb kag si Zeeb; ano bala ang nasarangan ko sa paghimo nga ipaanggid sa inyo?” Niyan ang kaakig nila batok sa iya nalugpayan, sang pagsiling niya sina.
4Kag nag-abut si Gideon sa Jordan kag nagtabok, sia kag ang tatlo ka gatus ka lalaki kaupud niya, nga lapyo apang nagalagas. 5Gani nagsiling sia sa mga tawo sa Sucot, “Ginaampo ko sa inyo, hatagi ninyo sing mga binilog sang tinapay ang katawohan nga nagasonod sa akon; kay ginalapyo sila, kag ako nagalagas kay Zeba kag kay Zalmuna, ang mga hari sang Midian.” 6Kag ang mga principe sang Sucot nagsiling, “Yara na bala ang mga kamut ni Zeba kag ni Zalmuna sa imo kamut, agud nga maghatag kami sing tinapay sa imo hangaway?” 7Kag si Gideon nagsiling, “Busa kon itugyan sang Ginoo sa akon kamut si Zeba kag Zalmuna, niyan gision ko ang inyo unud sa mga talongon sang kamingawan kag sa mga tunuk.” 8Kag gikan didto nagtaklad sia sa Penuel, kag nagpamolong sa ila sa amo nga bagay; kag ang mga lalaki sang Penuel nagsabat sa iya subong sang ginsabat sang mga lalaki sang Sucot. 9Kag sia nagpamolong man sa mga lalaki sang Penuel, “Kon ako magbalik sa paghidait, lumpagon ko ini nga torre.”
10Karon si Zeba kag Zalmuna didto sa Carcor kag upud sa ila ang ila mga kasoldadosan, mga napulo kag lima ka libo ka lalaki, ang tanan nga nabilin sang bug-os nga kasoldadosan sang katawohan sang Sidlangan; kay may napukan nga isa ka gatus kag duha ka pulo ka libo ka lalaki nga naggabut sing espada. 11Kag si Gideon nagtaklad sa dalan sang mga nagpuyo sa mga layanglayang sa sidlangan sang Noba kag sang Jogbea, kag naglaglag sang kasoldadosan; kay ang kasoldadosan naghinalig. 12Kag si Zeba kag si Zalmuna nalagyo; kag ginlagas sila niya kag gindakup niya ang duha ka hari sang Midian, si Zeba kag si Zalmuna, kag ginpahanguyusan ang bug-os nga kasoldadosan.
13Niyan si Gideon nga anak ni Joas nagpauli gikan sa inaway gikan sa taklaran sang Heres. 14Kag gindakup niya ang isa ka pamatan-on nga lalaki sang mga lalaki sang Sucot, kag nagpamangkot sa iya; kag ginsulat niya sa iya ang mga principe sang Sucot, kag ang iya mga tigulang, kapitoan kag pito ka lalaki. 15Kag nag-abut sia sa mga lalaki sang Sucot, kag nagsiling, “Yari si Zeba kag si Zalmuna, nga tungud sa ila gin-uligyat ako ninyo, nga nagasiling, ‘Yara na bala ang mga kamut ni Zeba kag ni Zalmuna sa imo kamut, agud nga maghatag kami sing tinapay sa imo mga tawo nga luya?’” 16Kag nagkuha sia sang mga tigulang sang banwa kag sang mga talongon sang kamingawan kag mga tunuk, kag sa ila gintudloan niya ang mga lalaki sang Sucot. 17Kag ginlumpag niya ang torre sang Penuel, kag ginpatay ang mga lalaki sang banwa.
18Niyan nagsiling sia kay Zeba kag kay Zalmuna, “Ano bala nga bagay sang mga lalaki ang ginpatay ninyo sa Tabor?” Sila nagsabat, “Kon ano ikaw, amo sila, ang tagsatagsa kaangay sa mga anak sang hari.” 19Kag nagsiling sia, “Mga utud ko sila nga lalaki, mga anak sang akon iloy; sa nagakabuhi ang Ginoo, kon ginluwas ninyo sila nga buhi, indi ko kamo pagpatyon.” 20Kag nagsiling sia kay Jeter nga iya panganay, “Tindug ka, kag patya sila.” Apang ang pamatan-on wala maggabut sang iya espada; kay nahadluk sia, tungud nga sia pamatan-on pa. 21Niyan nagsiling si Zeba kag si Zalmuna, “Tindug ka, kag magdamhag sa amon; kay kon ano ang lalaki, amo ang iya kusug.” Kag si Gideon nagtindug, kag nagpatay kay Zeba kag kay Zalmuna; kag nagkuha sang mga latilati sa mga liog sang ila mga camelyo.
22Niyan ang mga lalaki sang Israel nagsiling kay Gideon, “Pangolo ka sa amon, ikaw kag ang imo anak nga lalaki kag ang imo man apo nga lalaki; kay naluwas mo kami gikan sa kamut sang Midian.” 23Si Gideon nagsiling sa ila, “Indi gid ako magpangolo sa inyo, kag indi man ang akon anak nga lalaki magpangolo sa inyo; ang Ginoo magpangolo sa inyo.” 24Kag si Gideon nagsiling sa ila, “Buut ako magpangabay sa inyo; ang tagsa ka tawo sa inyo maghatag sa akon sang mga aritos gikan sa iya inagaw.” (Kay may mga aritos nga bulawan sila, bangud nga mga Ismaelnon sila.) 25Kag nagsabat sila, “Ihatag namon sila sing kinabubut-on.” Kag naghumlad sila sing panapton, kag nagpilak didto ang tagsa ka tawo sang mga aritos gikan sa iya inagaw. 26Kag ang kabug-aton sang mga aritos nga bulawan nga iya ginpangayo isa ka libo kag pito ka gatus ka siclo nga bulawan; luwas sang mga latilati kag sang mga pindanti, kag sang panapton nga purpura nga yara sa mga hari sang Midian, kag luwas sang mga baliog nga mga talikala nga yara sa mga liog sang ila mga camelyo. 27Kag naghimo si Gideon sing efod sini nga ginbutang ini sa iya banwa, sa Ofra; kag ang bug-os nga Israel nagmakihilawason sa pagsonod sini didto, kag ini nanginsiod kay Gideon kag sa iya panimalay. 28Gani ang Midian gindaug sa atubangan sang katawohan sang Israel, kag wala na sila makautwas sang ila mga olo. Kag ang duta may pahuway nga kap-atan ka tuig sa mga adlaw ni Gideon.
29Si Jerubbaal nga anak ni Joas naglakat kag nagpuyo sa iya balay nga kaugalingon. 30Karon si Gideon may kapitoan ka anak nga lalaki gikan sa iya lawas, kay madamu sia sing asawa. 31Kag ang iya babayi nga didto sa Siquem nag-anak man sia nga sa iya sing lalaki, kag ginhingalanan niya sia nga Abimelec. 32Kag si Gideon nga anak ni Joas napatay sa maayong katigulangon, kag ginlubung sa lulubngan sang iya amay nga si Joas, sa Ofra sang mga Abiezernon.
33Sa gilayon sang napatay si Gideon, ang katawohan sang Israel nagbalik liwat kag nagmakihilawason sa pagsonod sa mga Baal, kag naghimo sang Baal-berit nga ila dios. 34Kag wala magdumdum ang katawohan sang Israel sa Ginoo nga ila Dios, nga nagluwas sa ila gikan sa kamut sang tanan nilang kaaway sa tagsa ka luyo; 35kag wala sila magpakita sing kalolo sa panimalay ni Jerubbaal (nga amo, si Gideon) sono sa tanan nga pagkaayo nga napakita niya sa Israel.
Currently Selected:
HUKOM 8: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
