HUKOM 10
10
Si Tola kag si Jair Nagahukom sang Israel
1Madason kay Abimelec may nagtindug sa pagluwas sang Israel nga si Tola nga anak ni Pua, ang anak ni Dodo, lalaki sang Isacar; kag nagpuyo sia sa Samir sa kabakoloran sang Efraim. 2Kag naghukom sia sa Israel sing duha ka pulo kag tatlo ka tuig. Niyan sia napatay, kag ginlubung sa Samir.
3Kag madason sa iya nagtindug si Jair nga Galaadnon, kag naghukom sia sa Israel sing duha ka pulo kag duha ka tuig. 4Kag may katloan ka anak nga lalaki sia nga nagsakay sa katloan ka polyino nga asno; kag may katloan sila ka banwa, nga ginahingalanan Havot-jair#10:4 Kon sayoron Ang mga banwa ni Jair. tubtub sining adlaw, nga yara sa duta sang Galaad. 5Kag napatay si Jair, kag ginlubung sa Kamon.
Si Jefte Nagaluwas sang Israel gikan sa mga Amonhon
6Kag ang katawohan sang Israel liwat naghimo sang malaut sa itololok sang Ginoo, kag nag-alagad sa mga Baal kag sa Astarot, sa mga dios sang Siria, sa mga dios sang Sidon, sa mga dios sang Moab, sa mga dios sang mga anak ni Amon, kag sa mga dios sang mga Filistinhon; kag ginbayaan nila ang Ginoo, kag wala mag-alagad sa iya. 7Kag nagdabdab ang kaakig sang Ginoo batok sa Israel, kag ginbaligya niya sila sa kamut sang mga Filistinhon kag sa kamut sang mga anak ni Amon, 8kag gintublag kag ginpigus nila ang mga anak sang Israel sadtong tuig. Sa napulog walo ka tuig ginpigus nila ang tanan nga katawohan sang Israel sa tabok sang Jordan sa duta sang mga Amornon, nga yara sa Galaad. 9Kag ang mga anak ni Amon nagtabok sang Jordan sa pagpakig-away sa Juda kag batok sa Benjamin kag sa panimalay ni Efraim; sa bagay nga ang Israel nagkalisud sing tama.
10Kag ang katawohan sang Israel nagtuaw sa Ginoo, nga nagasiling, “Kami nakasala batok sa imo, bangud nga amon ginbayaan ang amon Dios kag nag-alagad sa mga Baal.” 11Kag ang Ginoo nagsiling sa katawohan sang Israel, “Wala ko bala pagluwasa kamo sa mga Egiptohanon kag sa mga Amornon, sa mga anak ni Amon kag sa mga Filistinhon? 12Ang mga Sidonhon man, ang mga Amalecnon, kag ang mga Maonhon nagpigus sa inyo; kag nagtuaw kamo sa akon, kag ginluwas ko kamo gikan sa ila kamut. 13Apang kamo nagbiya sa akon kag nag-alagad sa iban nga mga dios; busa indi na ako magluwas sa inyo. 14Lakat kamo kag magtuaw sa mga dios nga ginpili ninyo; magluwas sila sa inyo sa tion sang inyo kalisdanan.” 15Kag ang katawohan sang Israel nagsiling sa Ginoo, “Nakasala kami; himoa sa amon ang bisan anong maayo sa imo; lamang luwasa kami, ginaampo namon sa imo, sining adlaw.” 16Gani ginsikway nila sa ila ang mga dios nga dumuloong kag nag-alagad sa Ginoo; kag ang iya kalag nagkasakit bangud sang pagkakailo sang Israel.
17Niyan ang mga anak ni Amon nagtipon sing tingub, kag nagpahamtang sing dologan sa Galaad; kag ang katawohan sang Israel nagtipon sing tingub, kag nagpahamtang sing dologan sa Mizpa. 18Kag ang katawohan, ang mga principe sang Galaad, nagsilingay, “Sin-o bala sia nga tawo nga magasugud sa pagpakig-away batok sa mga anak ni Amon? Sia manginpangolo sa tanan nga pumuluyo sang Galaad.”
Currently Selected:
HUKOM 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
