HUKOM 17
17
Ang mga Larawan kag Sacerdote ni Mica
1May isa ka lalaki sa kabakoloran sang Efraim, nga ginhingalanan Mica. 2Kag nagsiling sia sa iya iloy, “Ang napulog isa ka gatus ka bilog nga pilak nga nakuha sa imo, nga nahanungud sa ila nagmitlang ka sing pagpakamalaut, kag ginpamolong man sa akon idulungug, yari karon, ang pilak yari sa akon; ako nagkuha sini.” Kag ang iya iloy nagsiling, “Pakamaayohon sang Ginoo ang anak ko.” 3Kag gin-uli niya sa iya iloy ang napulog isa ka gatus ka bilog nga pilak; kag ang iya iloy nagsiling, “Ginahalad ko sing totoo sa Ginoo ang pilak gikan sa akon kamut tungud sa akon anak, sa paghimo sing larawan nga tinigban kag larawan nga tinunaw; busa karon iuli ko ina sa imo.” 4Gani sang nauli niya sa iya iloy ang cuarta, nagkuha ang iya iloy sing duha ka gatus ka bilog nga pilak, kag ginhatag sila sa manugtunaw, nga naghimo sini nga larawan nga tinigban kag larawan nga tinunaw; kag ini yara sa balay ni Mica. 5Kag ang tawo nga si Mica may balay sang mga dios, kag naghimo sia sing efod kag mga terafim, kag ginhalad ang isa sang iya mga anak nga lalaki, nga nanginsacerdote niya. 6Sadtong mga adlaw wala sing hari sa Israel; ang tagsa ka tawo naghimo sang matarung sa iya kaugalingon nga mga mata.#Huk. 21:25.
7Karon may isa ka pamatan-on gikan sa Bet-lehem-juda, sa panimalay ni Juda, nga Levinhon; kag nagpanlugayaw sia didto. 8Kag ang lalaki naghalin sa banwa sang Bet-lehem-juda, sa pagpanlugayaw kon diin sia makakita sing duug; kag nag-abut sia sa kabakoloran sang Efraim sa balay ni Mica, sang nagpanlakatan sia. 9Kag si Mica nagsiling sa iya, “Diin ka bala maghalin?” Kag sia nagsiling sa iya, “Ako Levinhon sang Bet-lehem-juda, kag nagakadto ako sa pagpanlugayaw diin makakita ako sing duug.” 10Kag si Mica nagsiling sa iya, “Puyo ka upud sa akon, kag manginsubong nga amay kag sacerdote sa akon, kag hatagan ko ikaw sing napulo ka bilog nga pilak sa tinuig, kag isa ka ilislan nga bayo, kag sang imo pagkaon.” Gani ang Levinhon nagpabilin. 11Kag ang Levinhon nakauyon sa pagpuyo upud sa lalaki; kag ang pamatan-on nanginsubong sang isa sang iya mga anak. 12Kag ginhalad ni Mica ang Levinhon, kag ang pamatan-on nangin-iya sacerdote, kag didto sa balay ni Mica. 13Niyan si Mica nagsiling, “Karon nahibaloan ko nga ang Ginoo magahimo sa akon sing maayo, sa ginatan-aw nga may akon ako nga Levinhon nga akon sacerdote.”
Currently Selected:
HUKOM 17: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
