HUKOM 16

Si Samson sa Gaza

1Si Samson nagkadto sa Gaza, kag nakakita didto sing babayi nga makihilawason, kag naghiusa sa iya. 2Ginsugid ini sa mga Gazanhon, “Si Samson nag-abut diri,” kag ginlikupan nila sia kag ginput-an sia sa bug-os nga gab-i sa gawang sang banwa. Nagtinong sila sa bug-os nga gab-i, nga nagasiling, “Hulaton ta tubtub mag-aga; niyan patyon ta sia.” 3Apang si Samson naghigda tubtub sa tunga ang gab-i, kag nagbangon sia sa tunga ang gab-i kag ginkaptan ang mga takup sang gawang sang banwa kag ang duha ka haligi, kag gingabut sila, ang pintal kag tanan, kag ginpas-an sila kag gindala sila sa putokputokan sang bukid nga yara sa tampad sang Hebron.

Si Samson kag si Delila

4Sang olihi sini naghigugma sia sing isa ka babayi sa nalupyakan sang Sorec, nga ginhingalanan Delila. 5Kag ang mga ginoo sang mga Filistinhon nagtaklad pakadto sa iya kag nagsiling sa iya, “Oloolohi sia, kag tan-awa kon diin nagagikan ang iya daku nga kusug, kag kon ano nga paagi nga madaug namon sia, agud nga magapus namon sia sa pagpaubus sa iya; kag ang tagsatagsa sa amon magahatag sa imo sing napulo ka isa ka gatus ka bilog nga pilak.” 6Kag si Delila nagsiling kay Samson, “Ginaampo ko sa imo sugiri ako kon diin nagagikan ang imo daku nga kusug, kag ano ang ikagapus sa imo, sa pagpaubus sa imo.” 7Kag nagsiling sa iya si Samson, “Kon gapuson nila ako sing pito ka hilaw nga banting sang pana nga wala mabulad, niyan magamaluya ako, kag manginsubong sa iban nga tawo.” 8Niyan ang mga ginoo sang mga Filistinhon nagdala sa iya sing pito ka hilaw nga banting sang pana nga wala pa mabulad, kag gingapus niya sia sini. 9Karon may mga manugpuut sia nga nagapabilin sa nasulud nga hulut. Kag si Delila nagsiling sa iya, “Ang mga Filistinhon, yara sa imo, Samson!” Apang ginbugras niya ang mga banting sang pana, subong sang pagbugto sang nahot sang kable kon makasindot sa kalayo. Gani wala mahibal-i ang iya kusug.

10Kag si Delila nagsiling kay Samson, “Yari karon, natiawtiawan mo ako, kag ginbutigan mo ako; ginaampo ko sa imo sugiri ako kon ano ang ikagapus sa imo.” 11Kag nagsiling sia sa iya, “Kon gapuson lamang nila ako sing mga lubid nga bag-o nga wala pa magamit, niyan magaluya ako, kag manginsubong sa iban nga tawo.” 12Gani si Delila nagkuha sing bag-o nga mga lubid kag gingapus sia sini, kag nagsiling sa iya, “Ang mga Filistinhon yara sa imo, Samson!” Kag ang mga manugpuut yara sa hulut nga nasulud. Apang ginbugto niya sila sa iya mga butkon kaangay sang hilo.

13Kag si Delila nagsiling kay Samson, “Tubtub karon gintiawtiawan mo ako, kag ginbutigan ako; sugiri ako ano bala ang ikagapus sa imo.” Kag nagsiling sia sa iya, “Kon ihabol mo ang pito ka salapid nga bohok sang akon olo sa hablon.” 14Kag ginhigot niya ini sa palpal, kag nagsiling sa iya, “Ang mga Filistinhon yara sa imo, Samson!” Apang sia nagmata sa iya katologon, kag gingabut niya ang palpal, ang tiral, kag ang hablon.

15Kag nagsiling sia sa iya, “Paano bala nga pagsiling mo, ‘Ako nahagugma sa imo,’ kon ang imo tagiposoon wala sa akon? Sa makatlo gintiawtiawan mo ako, kag wala makasugid sa akon kon diin nagagikan ang imo dakung kusug.” 16Kag sang ginpuga sia niya adlawadlaw sa iya mga polong, kag ginpilit sia, ang iya kalag gingamohan sa ikamatay. 17Kag ginsugiran niya sia sang bug-os niyang tagiposoon, kag nagsiling sa iya, “Wala gid sing inugkiskis nga nag-agi sa akon olo; kay ako Nazareo sa Dios kutub pa sa tiyan sang akon iloy. Kon kiskisan ako, niyan ang akon kusug magataliwan sa akon, kag magaluya ako, kag manginkaangay sa iban nga tawo.”

18Sang nakita ni Delila nga ginsugid niya sa iya ang bug-os niyang tagiposoon, nagpadala sia kag nagpatawag sang mga ginoo sang mga Filistinhon, nga nagasiling, “Taklad kamo sining makaisa na lamang, kay ginsugid niya sa akon ang bug-os niyang tagiposoon.” Niyan ang mga ginoo sang mga Filistinhon nagtaklad pakadto sa iya, kag nagdala sa ila kamut sang cuarta. 19Ginpatolog niya sia sa ibabaw sang iya mga tuhud; kag nagpatawag sia sing isa ka tawo, kag ginkiskis ang pito ka salapid nga bohok sang iya olo. Niyan ginsugdan niya sa pagsakit sa iya, kag ang iya kusug nagtaliwan sa iya. 20Kag nagsiling sia, “Ang mga Filistinhon yara sa imo, Samson!” Kag nagmata sia sa iya katologon, kag nagsiling, “Magagowa ako subong sang sa iban nga mga tion, kag magapanginpalus.” Apang wala sia makahibalo nga ang Ginoo nagtaliwan sa iya. 21Kag gindakup sia sang mga Filistinhon kag ginlukat ang iya mga mata, kag gindulhog nila sia sa Gaza, kag gingapus sia sing mga grillos nga saway; kag naggaling sia sa balay nga bilanggoan. 22Apang ang bohok sang iya olo nagsugud sa pagtubo liwat sa tapus nakiskisan sia.

Ang Pagkapatay ni Samson

23Karon ang mga ginoo sang mga Filistinhon nagtipon sa ila sing tingub sa pagdolot sing dakung halad kay Dagon nga ila dios, kag sa pagkasadya; kay nagsiling sila, “Ang aton dios nagtugyan sa aton kamut kay Samson nga aton kaaway.” 24Kag sang nakita sia sang katawohan, nagdayaw sila sa ila dios; kay nagsiling sila, “Ang aton dios nagtugyan sa aton kamut sang aton kaaway, ang manuglaglag sang aton duta, nga nakapatay sang madamu sa aton.” 25Kag sang malipayon ang tagiposoon nila, nagsiling sila, “Tawga ninyo si Samson, agud nga maghimo sia sa aton sing kalingawan.” Gani tinawag nila si Samson gikan sa bilanggoan, kag naghimo sia sing kalingawan sa atubangan nila. Ginbutang nila sia sa ulut sang mga haligi; 26kag si Samson nagsiling sa pamatan-on nga nagtuytuy sa iya sa kamut, “Tuguti ako sa paghikap sang mga haligi diin nagatindug ang balay, agud nga magsandig ako sa ila.” 27Karon ang balay napuno sang mga lalaki kag mga babayi; ang tanan nga ginoo sang mga Filistinhon yadto didto, kag sa ibabaw sang atup may mga tatlo ka libo ka mga lalaki kag mga babayi, nga nagtan-aw sang kalingawan nga ginhimo ni Samson.

28Niyan si Samson nagpanawag sa Ginoo, kag nagsiling, “O Ginoong Dios, dumduma ako, ginaampo ko sa imo, kag pabaskuga ako, ginaampo ko sa imo, sini lamang nga makaisa, O Dios, agud nga sa makaisa makatimalus ako sa mga Filistinhon bangud sang akon duha ka mata.” 29Kag nagkaput si Samson sa duha ka haligi nga natunga nga ginatungtungan sang balay, kag ginduso sila, ang isa sang iya kamut nga too, kag ang isa sang iya kamut nga wala. 30Kag si Samson nagsiling, “Pakamatya ako kaupud sang mga Filistinhon.” Niyan nagduko sia sa bug-os niyang kusug; kag nalusud ang balay sa ibabaw sang mga ginoo kag sa ibabaw sang bug-os nga katawohan nga didto sa sulud sini. Gani ang mga patay nga napatay niya sa iya kamatayon labi pa kadamu sa mga ginpatay niya sa iya kinabuhi. 31Niyan nagdulhog ang iya mga utud kag ang bug-os nga panimalay sang iya amay kag nagkuha sa iya kag gindala sia pataklad kag ginlubung sia sa ulut sang Zora kag Estaol sa lulubngan ni Manoa nga iya amay. Naghukom sia sang Israel sing duha ka pulo ka tuig.

Currently Selected:

HUKOM 16: ABHIL82

Highlight

Copy