HUKOM 18
18
Si Mica kag ang mga Danhanon
1Sa sadtong mga adlaw walay hari sa Israel. Kag sadtong mga adlaw ang kabikahan sang mga Danhanon nagpangita nga sa ila sing panublion nga mapuy-an; kay tubtub sadtong adlaw ang ila panublion wala pa maholog sa ila sa tunga sang mga kabikahan sang Israel. 2Gani ang mga anak ni Dan nagpadala gikan sa ila panimalay sing lima ka lalaki gikan sa bug-os nila nga kadamuon, mga lalaking isganan, kutub sa Zora kag sa Estaol, sa paglampitaw sang duta kag sa pag-usisa sini; kag nagsiling sila sa ila, “Lakat kamo, usisaon ninyo ang duta.” Kag nag-abut sila sa kabakoloran sang Efraim, sa balay ni Mica, kag nagdayon didto. 3Sang didto sila sa luyo sang balay ni Mica, nakilala nila ang tingug sang pamatan-on nga Levinhon; kag naghapit sila didto kag nagsiling sa iya, “Sin-o bala ang nagdala sa imo diri? Ano bala ang ginahimo mo sining duug? Maano ka bala diri?” 4Kag nagsiling sia sa ila, “Amo ini kag amo ini ang paghisayo sa akon ni Mica: ginsoholan ako niya, kag nahimo ako nga sacerdote niya.” 5Kag sila nagsiling sa iya, “Pakiana ka sa Dios, ginaampo namon sa imo, agud nga amon mahibaloan kon manginmauswagon ang amon dalanon nga ginalaktan namon.” 6Kag ang sacerdote nagsiling sa ila, “Lakat kamo sa paghidait. Ang dalanon nga ginalaktan ninyo yara sa atubangan sang Ginoo.”
7Niyan ang lima ka lalaki nagtaliwan, kag nag-abut sa Lais, kag nakakita sang katawohan didto, kon paano nga pagpuyo nila sa kalig-onan, sono sa pamatasan sang mga Sidonhon, malinong kag malig-on, walay bisan sin-o sa duta, nga may gahum, nga makapakahuya sa ila sa bisan anong butang, kag malayo sila sa mga Sidonhon kag wala sila sing mga paghisayo sa bisan kay sin-ong tawo. 8Kag sang nag-abut sila sa ila mga utud sa Zora kag sa Estaol, ang ila mga utud nagsiling sa ila, “Ano bala sa inyo?” 9Sila nagsiling, “Tindug, kag magtaklad kita batok sa ila; kay nakita namon ang duta, kag yari karon, maayo gid. Kag ngaa bala nagadolog pa kamo? Dili kamo magpabuyanbuyan sa paglakat, kag sa pagsulud sa pagtag-iya sang duta. 10Kon maglakat kamo, magaabut kamo sa katawohan nga malig-on. Ang duta malapad; kay ang Dios naghatag sini sa inyo kamut, duug nga wala makulangi sang bisan anong yara sa duta.”
11Kag may nagtaliwan gikan sa Zora kag sa Estaol, sang panimalay sang mga Danhanon, nga anum ka gatus ka lalaki nga nagtaklus sang mga hinganiban sa inaway, 12kag nagtaklad sila kag nagpahamtang sing dologan sa Kiryat-jearim sa Juda. Tungud sini ginhingalanan nila yadtong duug Mahane-dan#18:12 Kon sayoron Dologan ni Dan. tubtub sining adlaw; yari karon, ini yara sa likod sang Kiryat-jearim. 13Kag gikan didto nag-agi sila sa kabakoloran sang Efraim, kag nag-abut sa balay ni Mica.
14Niyan ang lima ka lalaki nga nagkadto sa paglampitaw sang duta sang Lais, nagsiling sa ila mga utud, “Wala bala kamo makahibalo nga sa sining mga balay may efod kag terafim, kag larawan nga tinigban, kag larawan nga tinunaw? Busa karon, patugsilingi kon ano ang himoon ninyo.” 15Kag naghapit sila didto, kag nag-abut sa balay sang pamatan-on nga lalaki nga Levinhon, sa balay ni Mica, kag ginpamangkot sia kon maanoano sia. 16Karon ang anum ka gatus ka lalaki nga nagtaklus sing mga hinganiban sa inaway, nga gikan sa mga anak ni Dan, nagtindug sa salamputan sang gawang; 17kag ang lima ka lalaki nga nagkadto sa paglampitaw sang duta nagsaka, kag nagsulud, kag nagkuha sang larawan nga tinigban, sang efod, sang terafim, kag sang larawan nga tinunaw, samtang ang sacerdote nagtindug sa luyo sang salamputan sang gawang upud sa anum ka gatus ka tawo nga nagtaklus sang mga hinganiban sa inaway. 18Kag sang nagsulud ini sila sa balay ni Mica kag nagkuha sang larawan nga tinigban, sang efod, sang terafim, kag sang larawan nga tinunaw, ang sacerdote nagsiling sa ila, “Ano bala ang ginahimo ninyo?” 19Kag sila nagsiling sa iya, “Hipus ka, itakup ang imo kamut sa imo baba, kag mag-upud sa amon, kag magmangin-amay ka namon kag magmanginsacerdote. Maayo pa bala sa imo ang magsacerdote sa panimalay sang isa ka tawo, ukon magsacerdote sa isa ka kabikahan kag isa ka panimalay sa Israel?” 20Kag nalipay ang tagiposoon sang sacerdote; ginkuha niya ang efod, kag ang terafim, kag ang larawan nga tinigban, kag nagpatunga sa katawohan.
21Gani nagtalikod sila kag nagtaliwan, nga nagabutang sang mga magamay kag sang kahayupan kag sang mga pagkabutang sa una nila. 22Sang malayo na sila sa balay ni Mica, ang mga lalaki sa mga balay nga malapit sa balay ni Mica nagtipon sing tingub, kag nag-apas sa mga anak ni Dan. 23Kag nagsinggit sila sa mga anak ni Dan, nga nagbalikid kag nagsiling kay Mica, “Ano bala ang ginahinakitan mo nga nagakari ka upud sa among panong?” 24Kag nagsiling sia, “Ginkuha ninyo ang akon mga dios nga ginhimo ko, kag ang sacerdote, kag nagtaliwan, kag ano pa ang akon? Kag paano bala niyan nga nagasiling kamo sa akon, ‘Ano bala ang ginahinakitan mo?’” 25Kag ang mga anak ni Dan nagsiling sa iya, “Dili pag-ipabati ang imo tingug sa tunga namon, basi magdamhag sa inyo ang mga tawo nga maakigon, kag madula mo ang imo kabuhi pati ang mga kabuhi sang imo panimalay.” 26Niyan ang mga anak ni Dan nagpadayon sa ila dalanon; kag sang nakita ni Mica nga sila tama kakusug sa iya, nagbalik sia kag nagpauli sa iya balay.
27Kag ginkuha nila ang ginhimo ni Mica, kag ang sacerdote niya, kag nag-abut sa Lais, sa katawohan nga malinong kag malig-on, kag ginpatay sila sa sulab sang espada, kag ginsonog nila ang banwa sa kalayo. 28Kag wala sing manluluwas bangud nga malayo ini sa Sidon, kag wala sila sing paghisayo sa bisan kay sin-o nga tawo. Ini yara sa nalupyakan nga nahamtang sa Bet-rehob. Kag gintukud nila ang banwa, kag nagpuyo didto. 29Kag ginhingalanan nila ang banwa Dan, sono sa ngalan ni Dan nga ila amay, nga natawo kay Israel; apang sadto anay ang ngalan sang banwa Lais. 30Kag ang mga anak ni Dan nagpatindug sa ila kaugalingon sing larawan nga tinigban; kag si Jonatan nga anak ni Gersom, nga anak ni Moises, kag ang iya mga anak nga lalaki mga sacerdote sa kabikahan sang mga Danhanon tubtub sa adlaw sang pagbihag sang duta. 31Gani ginpatindug nila ang larawan nga tinigban ni Mica nga ginhimo niya, sa bug-os nga tion nga ang balay sang Dios didto sa Silo.
Currently Selected:
HUKOM 18: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
