ISAIAS 9
9
Ang Pagkatawo kag ang Paghari sang Principe sang Paghidait
1Apang walay kadulum sa iya nga yara sa pagbakho. Sang unang tion ginpatamay niya ang duta sang Zabulon kag ang duta sang Neftali,#Mat. 4:15. apang sa olihing tion ginhimo niya ini nga mahimayaon sa dalanon sang dagat, sa tabok sang Jordan, Galilea sang mga pungsud.
2Ang katawohan nga naglakat sa kadudulman
nakakita sing daku nga kapawa;
ang mga nagpuyo sa duta sang landong sang kamatayon,
ang kapawa nagsilak sa ila.#Mat. 4:16; Luc. 1:79.
3Ginpadamu mo ang pungsud,
gindugangan mo ang ila kalipay;
nagakalipay sila sa atubangan mo
sono sa kalipay sa ani,
subong sang kasadya sang mga tawo kon magbahinbahin sila sang inagaw.
4Kay ang gota sang iya lulan,
kag ang sungkud sang iya abaga,
ang bilogon sang iya manugpigus,
ginbali mo subong sang sa adlaw sang Midian.
5Kay ang bug-os nga hinganib sang lupit nga tawo sa kagubut
kag ang mga panapton nga gintubug sa dugo
sonogon kag mangin-gatong sa kalayo.
6Kay sa aton natawo ang isa ka bata,
sa aton ginhatag ang isa ka anak nga lalaki;
kag ang pagbulut-an manginsa iya abaga,
kag tawgon ang iya ngalan
“Makatilingala nga Manuglaygay, Dios nga Gamhanan,
Amay nga Nagapadayon, Principe sang Paghidait.”
7Nahanungud sang pagdugang sang iya pagbulut-an kag sang paghidait
walay katapusan,
sa trono ni David, kag sa iya ginharian,
sa pagpalig-on sini, sa pagtib-ong sini
sa katarungan kag sa pagkamatarung
kutub karon tubtub gid sa gihapon.#Luc. 1:32-33.
Ang kakugi sang Ginoo sang mga kasoldadosan magahimo sini.
Ang Kaakig sang Ginoo batok sa Israel
8Ang Ginoo nagpadala sing polong sa Jacob,
kag nagtupa ini sa Israel;
9kag makahibalo ang bug-os nga katawohan,
ang Efraim kag ang pumuluyo sang Samaria,
nga nagasiling sa pagpabugal kag katig-a sang tagiposoon:
10“Ang mga tisa nagakaholog,
apang patindugon naton sing binasbasan nga bato;
ginapulud ang mga sicomoro,
apang ilisan naton sila sing mga cedro.”
11Busa patindugon sang Ginoo ang mga kasumpung ni Rezin,
kag magapainit sang iya mga kaaway.
12Ang mga Sirianhon sa atubangan kag ang mga Filistinhon sa likod
nagalamon sang Israel sa naganganga nga baba.
Tungud sini tanan wala makuha ang iya kaakig
kondi ang iya kamut nauntay pa gihapon.
13Apang ang katawohan wala magliso sa iya nga nagpilas sa ila,
kag wala sila magpangita sa Ginoo sang mga kasoldadosan.
14Busa utdon sang Ginoo sa Israel ang olo kag ang ikog,
ang paklang kag ang banban sa isa ka adlaw—
15ang tigulang kag dungganon nga tawo amo ang olo,
kag ang manalagna nga nagatudlo sing kabutigan amo ang ikog;
16kay ang mga nagadumala sining katawohan nagapasayup sa ila,
kag ang mga ginadumalahan nila ginalaglag,
17Busa ang Ginoo indi magkasadya sa ila mga pamatan-on nga lalaki,
kag indi magkalooy sia sa ila mga ilo kag mga balong babayi;
kay ang tagsatagsa mapasipalahon kag manughimo sing malaut,
kag ang tagsa ka baba magapamolong sing kabuangan.
Tungud sini tanan wala makuha ang iya kaakig
kondi ang iya kamut nauntay pa gihapon.
18Kay ang pagkamalaut nagadabdab subong sang kalayo,
nagalamon ini sang kasapinitan kag sang mga talongon;
nagamakut ini sa mga kasiotan sang talon,
kag nagatub-ok sila sa haliging aso.
19Paagi sa kasingkal sang Ginoo sang mga kasoldadosan
nasonog ang duta,
kag ang katawohan subong sang gatong sang kalayo;
walay tawo nga nagapatawad sang iya utud.
20Ang isa magasabnit sa toong kamut, kag gutumon,
kag magakaon sia sa walang kamut, kag indi mabusug sila;
ang tagsa ka tawo magakaon sang unud sang iya kaugalingon nga butkon,
21ang Manases magakaon sang Efraim, kag ang Efraim sang Manases,
kag sila nga duha batok sa Juda.
Tungud sini tanan wala makuha ang iya kaakig
kondi ang iya kamut nauntay pa gihapon.
Currently Selected:
ISAIAS 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
