ISAIAS 8
8
Ang Ginoo Mangin-inyo Kahadluk
1Niyan ang Ginoo nagsiling sa akon, “Kuha ka sing isa ka daku nga tapi kag isulat sa sini sa isululat sang tawo, ‘Kay Maher-salal-has-baz#8:1 Kon sayoron. Ang inagaw nagadasigasig, ang tulukbon nagadalidali.’” 2Kag nagkuha ako nga sa akon sing mga saksi nga matutum sa pagsulat, si Urias nga sacerdote kag si Zacarias nga lalaking anak ni Jeberequias. 3Kag naghiusa ako sa manalagna nga babayi, kag nagpanamkon sia kag nag-anak sing lalaki. Niyan nagsiling sa akon ang Ginoo, “Hingalani sia Maher-salal-has-baz; 4kay sa indi pa ang bata makahibalo magsinggit ‘Amay ko’ kag ‘Iloy ko,’ ang manggad sang Damasco kag ang inagaw sang Samaria dalhon sa atubangan sang hari sang Asiria.”
5Ang Ginoo nagpamolong sa akon liwat: 6“Sa bagay nga ginsikway sining katawohan ang mga tubig sang Siloe nga nagailig sing mahinay, kag nagakalipay kay Rezin kag sa anak nga lalaki ni Remalias; 7busa, yari karon, ang Ginoo nagapasaka sa ila sang mga tubig sang Suba, makusug kag madamu, ang hari sang Asiria kag ang bug-os niyang himaya; kag magaawas sa tanan niya nga iligan kag magalapaw sa tanan niyang pangpang; 8kag magailig ini sing madasig pakadto sa Juda, magalapaw ini kag magalambas, magalambut bisan tubtub sa liog; kag ang paghumlad sang iya mga pakpak magahil-ub sang kasangkaron sang imo duta, O Emmanuel.”
9Magginahud, O kamo nga mga katawohan, kag maboong;
pamati, tanan kamo nga sa malayong duta;
magwagkus kamo kag maboong;
magwagkus kamo kag maboong.
10Maghimbon kamo, kag malaglag ini;
ipamolong ang polong, kag indi ini mahimo,
kay ang Dios nagaupud sa amon.
11Kay ang Ginoo nagpamolong sa akon sing subong sini sa makusug nga kamut, kag nagtudlo sa akon nga indi maglakat sa dalanon sining katawohan, nga nagasiling: 12“Dili kamo magsiling pagpuhon nahanungud sa tanan nga isiling sining katawohan pagpuhon, kag dili kamo magkahadluk sang ila kahadluk, ukon magpakulba kamo. 13Apang ang Ginoo sang mga kasoldadosan, pakabalaanon ninyo sia;#1 Ped. 3:14-15. sia mangin-inyo kahadluk, kag sia mangin-inyo kakugmat. 14Kag sia manginsantuario, kag manginbato sang kasandatan, kag mangin-igang sang kasaklaw sa duha ka balay sang Israel, nga tiglapak kag siod sa mga pumuluyo sang Jerusalem. 15Kag madamu ang makasandad sa sini; sila mapukan kag maboong;#1 Ped. 2:8. sia masiod kag madakup.”
16Bugkusa ang pagpamatuud, pat-ini ang kasogoan sa akon mga gintoton-an. 17Kag hulaton ko ang Ginoo, nga nagalipon sang iya nawung gikan sa balay ni Jacob, kag pangitaon ko sia.#Heb. 2:13. 18Kari karon, ako kag ang mga anak nga ginhatag sa akon sang Ginoo#Heb. 2:13. nga mga tanda kag mga katingalahan sa Israel gikan sa Ginoo sang mga kasoldadosan, nga nagapuyo sa Bukid nga Sion. 19Kag kon magsiling sila sa inyo, “Pamangkot kamo sa mga manugpagowa sang mga espiritu kag sa mga salamangkero nga nagawiswis kag nagakibot,” indi bala magpamangkot ang katawohan sa ila Dios? Tungud sa mga buhi magapamangkot bala sila sa mga patay? 20Sa kasogoan kag sa pagpamatuud! Kon indi sila maghambal sono sining polong, sa pagkamatuud wala sa ila sing pamanagbanag. 21Magaalagi sila sa sini, nga nalisdan sing tama kag gutum; kag kon gutumon sila, magakaakig sila sa ila kaugalingon kag magapakamalaut sa ila hari kag sa ila Dios, kag magatangla; 22kag magatolok sila sa duta, kag yari karon, kalisdanan kag kadudulman, ang kadulum sang pagbakho; kag tabugon sila sa pitipit nga kadudulman.
Currently Selected:
ISAIAS 8: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
