ISAIAS 63
63
Ang Adlaw sang Pagtimalus sang Ginoo
1Sin-o bala ini nga nagaabut gikan sa Edom,#Isa. 34:1-17; Jer. 49:7-22; Ezeq. 25:12-14; 35:1-15; Amos 1:11-12; Ab. 1-14; Mal. 1:2-5.
nga may nalugum nga mga panapton gikan sa Bozra,
ini nga mahimayaon sa iya panapton,
nga nagalakat sa pagkadaku sang iya kusug?
“Ako ini, nga nagapamolong sa pagkamatarung,
nga gamhanan sa pagluwas.”
2Ngaa bala nga mapula ka sa imo panapton,
kag ang imo mga panapton kaangay sa nagalinas sa linasan sang alak?
3“Naglinas ako nga isa lamang sa linasan sang alak,#Bug. 14:20; 19:15.
kag gikan sa mga tawo wala sing tawo nga nag-upud sa akon;
ginlinas ko sila sa akon kaakig
kag gintapak sila sa akon kasingkal;
ang ila dugo sang kabuhi nagaagsik sa akon mga panapton,
kag nadagtaan ko ang bug-os ko nga bayo.#Bug. 19:13.
4Kay ang adlaw sang pagtimalus yari sa akon tagiposoon,
kag ang tuig sang akon pagtubus nagaabut.
5Nagtolok ako, apang wala gid sing matabang;
natingala ako, apang wala gid sing mapatindug;
busa ang akon kaugalingon nga butkon nagluwas sa akon,
kag ang akon kasingkal nagpatindug sa akon.
6Ginlinas ko ang mga katawohan sa akon kaakig,
ginhobog ko sila sa akon kasingkal,
kag gin-ula ko sa duta ang ila dugo sang kabuhi.”
Ang Pagkaayo sang Ginoo sa Israel
7Isambit ko ang malig-on nga paghigugma sang Ginoo,
ang mga pagdayaw sang Ginoo,
sono sa tanan nga ginhatag sa amon sang Ginoo,
kag ang daku nga pagkaayo ayon sa panimalay sang Israel
nga ginhatag niya sa ila sono sa iya mga kalooy,
sono sa kadam-an sang iya malig-on nga paghigugma.
8Kay nagsiling sia, Sa pagkamatuud sila akon katawohan,
mga anak nga indi maglimbong;
gani sia ila Manluluwas.
9Sa tanan nila nga kapipit-an ginpiotan sia,
kag ang manugtunda sang iya pagtambong nagluwas sa ila;
sa iya gugma kag sa iya kaawa gintubus niya sila;
ginkugus niya sila kag gindala sila sa tanan nga adlaw sang dumaan.
10Apang nagbato sila
kag ginpasubo ang iya balaan nga Espiritu;
busa nanginkaaway sia nila,
kag sia gid nagpakig-away sa ila.
11Niyan nadumduman niya ang mga adlaw sang dumaan,
si Moises kag ang iya katawohan.
Diin bala ang nagpataklad sa ila gikan sa dagat
upud sa mga manugpahalab sang iya panong?
Diin bala ang nagbutang sa tunga nila
sang iya balaan nga Espiritu,
12nga nagpaupud sang iya butkon nga mahimayaon
sa too nga kamut ni Moises,
nga nagpahawa sang mga tubig sa atubangan nila#Ex. 14:21.
sa paghimo nga sa iya sing ngalan nga dayon,
13nga nagtuytuy sa ila paagi sa mga kadadalman?
Subong sang kabayo sa kamingawan,
wala sila makasandad.
14Subong sang kahayupan nga nagadulhog sa nalupyakan,
ang Espiritu sang Ginoo nagpapahuway sa ila.
Sa amo gintuytuyan mo ang imo katawohan,
sa paghimo nga sa imo sing ngalan nga mahimayaon.
Pangamuyo nga Kalooyan kag Buligan
15Tamud ka kutub sa langit kag magtolok,
kutub sa puluy-an sang imo pagkabalaan kag sang imo himaya.
Diin bala ang imo kakugi kag ang imo gamhanan nga mga buhat?
Ang kahidlaw sang imo tagiposoon kag ang imo mga kalooy
ginapunggan ayon sa akon.
16Kay ikaw amo ang amon Amay,
bisan si Abraham wala makakilala sa amon
kag ang Israel wala nagakilala sa amon;
ikaw, O Ginoo, amo ang amon Amay,
amon Manunubus kutub sa wala sing katapusan amo ang imo ngalan.
17O Ginoo, ngaa bala ginapatalang mo kami sa imo mga dalanon
kag ginpatig-a ang amon mga tagiposoon, sa kahadluk sa imo?
Balik ka tungud sa imo mga alagad,
ang mga kabikahan sang imo panublion.
18Sa malip-ot lamang nga tion ang imo balaan nga katawohan nagtag-iya sini;
gintapak sang amon mga kasumpung ang imo santuario.
19Nahimo kami subong sang mga wala mo gid magahumi,
subong sang mga wala matawag sa imo ngalan.
Currently Selected:
ISAIAS 63: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
