ISAIAS 62
62
1Tungud sang Sion indi ako maghipus,
kag tungud sang Jerusalem indi ako magpahuway,
tubtub nga ang iya pagkamatarung magagowa subong sang kasilaw,
kag ang iya kaluwasan subong sang suga nga nagadabdab.
2Ang mga pungsud makakita sang imo pagkamatarung,
kag ang tanan nga hari sang imo himaya;
kag tawgon ka sa ngalan nga bag-o
nga ihingalan sang baba sang Ginoo.
3Ikaw man manginpurungpurung sang katahum sa kamut sang Ginoo,
kag diadema nga harianon sa kamut sang imo Dios.
4Indi ka na pagtawgon Binayaan,
kag indi na pagtawgon ang imo duta Mamingaw;
kondi tawgon ka Hefsi-ba,#62:4 Kon sayoron Ang akon kalipay yara sa iya
kag ang imo duta Beula;#62:4 Kon sayoron Kinasal
kay ang Ginoo nagakalipay sa imo,
kag ang imo duta kaslon.
5Kay subong sang pamatan-on nga lalaki nga nagapangasawa sa ulay,
sa amo ang imo mga anak nga lalaki magapangasawa sa imo,
kag subong sang nobyo nga nagakalipay sa palangasaw-on,
sa amo magakalipay sa imo ang imo Dios.
6Nagbutang ako sing mga manugbantay
sa imo mga kuta, O Jerusalem;
indi gid sila maghipus
sa adlaw kag sa gab-i.
Kamo nga mga manugpadumdum sa Ginoo,
dili kamo magpahuway,
7kag dili sia pagpapahuwaya
tubtub nga mapatindug niya ang Jerusalem
kag nga mahimo ini nga pagdayaw sa duta.
8Nagsumpa ang Ginoo tungud sa iya too nga kamut
kag tungud sa butkon sang iya kusug:
“Sa pagkamatuud indi na ako maghatag sang imo uyas
nga kalan-on sa imo mga kaaway,
kag ang mga dumuloong indi na mag-inum sang imo bag-o nga alak,
nga imo ginpangabudlayan;
9kondi ang mga nagdamisag sini magakaon sini
kag magadayaw sa Ginoo,
kag ang mga nagtipon sini magainum sini
sa mga luwang sang akon santuario.”
10Mag-agi, mag-agi sa mga gawang,
amana ninyo ang dalanon sang katawohan;
tampoki, tampoki ang dalan nga daku,
pamuluta ang mga bato,
bayawa ang hayahay tungud sa mga katawohan.
11Yari karon, ang Ginoo nagbantala
tubtub sa ukbung sang duta:
Isiling ninyo sa babayi nga anak sang Sion,
“Yari karon, ang imo kaluwasan nagaabut;
yari karon, ang iya balus upud sa iya,
kag ang iya tumbas sa atubangan niya.”#Isa. 40:10; Bug. 22:12.
12Kag tawgon nila sila Ang balaan nga katawohan,
Ang tinubus sang Ginoo;
kag tawgon ka Pinangita,
banwa nga wala pagbayai.
Currently Selected:
ISAIAS 62: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
