ISAIAS 64
64
1O kabay kuntani nga gision mo ang kalangitan kag magpanaug ka,
nga sa imo atubangan magtay-ug ang kabukiran—
2subong sang pagdukut sang kalayo sa mga sanga nga laya,
kag sang kalayo nga nagapabukal sang tubig—
sa pagpakilala sang imo ngalan sa imo mga kasumpung,
agud nga ang mga pungsud magkurug sa imo atubangan!
3Sang naghimo ka sing mga butang nga makakulugmat nga wala namon pagpaabuta,
nagpanaug ka, ang kabukiran nagkurug sa atubangan mo.
4Kay kutub sa dumaan ang mga tawo wala makabati
ukon makahantup tungud sa idulungug,
ukon ang mata makakita sing Dios luwas sa imo,
nga nagahikut tungud sa mga nagahulat sa iya.#1 Cor. 2:9.
5Nagasugata ka sang nagakasadya kag nagahikut sing pagkamatarung,
sila nga nagadumdum sa imo sa mga dalanon mo.
Yari karon, ikaw nasingkal, kag nakasala kami;
sa amon mga sala yara kami sa malawig na nga tion, kag maluwas bala kami?
6Kay kami tanan nanginsubong sang isa nga dimatinlo,
kag ang tanan namon nga pagkamatarung subong sang panapton nga nadagtaan.
Kami tanan nalaya subong sang dahon,
kag ang amon mga kalautan, kaangay sang hangin, nagakuha sa amon.
7Wala gid sing nagapanawag sa imo ngalan,
nga nagapanikasug sa iya kaugalingon sa pagkapyot sa imo;
kay gintago mo gikan sa amon ang imo nawung,
kag nagpapas sa amon tungud sa amon mga kalautan.
8Apang karon, O Ginoo, ikaw amon Amay;
kami ang lunang, kag ikaw ang amon maninihon;
kami tanan binuhatan sang imo mga kamut.
9Dili magkasingkal sing tama gid, O Ginoo,
kag dili pagdumduma sa gihapon ang kalautan.
Yari karon, toloka, kami tanan imo katawohan.
10Ang imo balaan nga mga banwa manginkamingawan,
ang Sion manginkamingawan,
ang Jerusalem kasulub-an.
11Ang amon balaan kag ang amon matahum nga balay,
diin nagdayaw sa imo ang amon mga ginikanan,
ginsonog sang kalayo,
kag ang tanan namon nga duug nga matahum ginguba.
12Magapugung ka bala sang imo kaugalingon tungud sining mga butang, O Ginoo?
Magahipus ka bala, kag papiotan kami sing tama gid?
Currently Selected:
ISAIAS 64: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
