OSEAS 12
12
Ang Efraim Ginsabdong bangud sang Kabutigan kag Pagpigus
1Si Efraim nagakaon sang hangin,
kag nagasonod sa salatan;
nagapabuad sia sing dalayon sing kabutigan kag kamingaw;
nagapakigkatipan sila sa Asiria,
kag ginadala ang lana sa Egipto.
2Ang Ginoo may kasaba man kay Juda,
kag magasilot kay Jacob sono sa iya mga dalanon,
sono sa iya mga hinimoan balusan niya sia.
3Sa tiyan ginkaptan niya sa tikod ang iya utud,#Gen. 25:26.
kag sa iya pagkahamtong may gahum sia upud sa Dios.
4May gahum sia sa manugtunda kag naglandas,
naghibi sia kag nagpakilooy sa iya.#Gen. 32:24-26.
Sa Bet-el nasapwan niya sia,#Gen. 28:10-22.
kag didto nagpakighambal sia sa aton—
5ang Ginoo nga Dios sang mga kasoldadosan,
ang Ginoo amo ang iya handumanan nga ngalan:
6“Busa balik ka sa imo Dios,
hupti ang kalolo kag ang katarungan,
kag hulat sa imo Dios sing dalayon.”
7Manugpalitog sia, yara sa iya kamut ang timbangan sang paglimbong,
nagahigugma sia sa pagpigus.
8Si Efraim nagsiling, “Sa pagkamatuud nagmanggaran ako,
nakakita ako sing manggad nga sa akon”;
sa tanan ko nga pagpangabudlay wala sila sing makita sa akon
nga kalautan nga sala.
9Apang ako ang Ginoo nga imo Dios
kutub sa duta sang Egipto;
papuy-on ko pa ikaw liwat sa mga layanglayang,
subong sang sa mga adlaw sang piesta nga maligdong.#Lev. 23:39-43.
10Nagpamolong man ako sa mga manalagna;
ginpabuad ko ang mga palanan-awon,
kag tungud sa pagpanghikut sang mga manalagna naggamit ako sing mga paanggid.
11Kon may kalautan ang Galaad
sila tanan lunsay dimatuud;
kon sa Gilgal nagahalad sila sing mga tinday nga baka nga lalaki,
ang mga halaran man nila subong sang mga tinumpok
sa mga idas sang latagon.
12(Si Jacob nagpalagyo sa latagon sang Aram,
didto si Israel nagpangagad tungud sa asawa,
kag tungud sa asawa nagbantay sia sing mga carnero.)#Gen. 29:1-20.
13Paagi sa manalagna ginpagowa sang Ginoo sa Egipto ang Israel,#Ex. 12:50-51.
kag paagi sa manalagna gintipigan sia.
14Si Efraim nagpaakig sing mapait gid;
busa ang iya dugo mabilin sa iya,
kag ang iya Ginoo magapabalik sa iya sang iya kahuluy-an.
Currently Selected:
OSEAS 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
