OSEAS 13
13
Ang Bug-os nga Kalaglagan sang Efraim Gintagna
1Sang si Efraim nagpamolong, may pagkurug;
nagpakataas sia sa Israel;
apang sang nagpakasala sia sa Baal napatay sia.
2Kag karon nagpakasala sila sing labi kag labi pa,
kag sa ila pilak naghimo sila nga sa ila sing mga larawan nga tinunaw,
mag diosdios sono sa ila paghangup,
tanan sila binuhatan sang mga panday.
Maghalad sa ila, nagasiling sila.
Ang mga tawo nagahaluk sa mga tinday!
3Busa manginsubong sila sang panganud sang kaagahon
kag sang ton-og nga nagapuas sing aga pa,
subong sang labhang nga ginapalid sang buhawi gikan sa salog nga linasan
kag subong sang aso nga nagagowa sa simboryo.
4Apang ako amo ang Ginoo nga imo Dios
kutub sa duta sang Egipto;
wala ka sing kilalahon nga dios kondi ako,
kag luwas sa akon walay manluluwas.
5Ginkilala ko ikaw sa kamingawan,#Deut. 8:12-16.
sa duta sang dakung tingadlaw;
6sono sa ila halalban sa amo ginbusug sila,
nabusug sila, kag nagpakataas ang ila tagiposoon;
busa nalipat sila sa akon.
7Busa ako subong sang leon sa ila,
subong sang leopardo magapuut ako sa dalanon.
8Sugataon ko sila subong sang oso nga nawad-an sang iya mga totoy,
kusniton ko ang putus sang ila tagiposoon,
kag didto halunhonon ko sila kaangay sang leon nga babayi,
subong sang pagpang-it sang sapat nga talonon sa ila.
9Laglagon ko ikaw, O Israel;
sin-o ang makabulig sa imo?
10Diin na bala karon ang imo hari, agud nga maluwas ka niya;
sa tanan mong kabanwaanan, ang imo mga hukom—
nga nahanungud sa ila nagsiling ka,
“Hatagi ako sing hari kag mga principe”?#1 Sam. 8:5-6.
11Ginhatagan ko ikaw sing hari sa akon kaakig,#1 Sam. 10:17-24.
kag ginkuha sia sa akon kasingkal.#1 Sam. 15:26.
12Ang kalautan ni Efraim ginputus,
ang iya sala ginsuput.
13Ang mga kalisud sang babayi nga ginasakitan magaabut sa iya,
sia dimaalam nga anak nga lalaki;
kay tion na nga indi sia magpalantang
sa duug nga balataan.
14Gawaron ko bala sila sa gahum sang Sheol?
Tubson ko bala sila sa kamatayon?
O Kamatayon, diin bala ang imo mga kalalat-an?
O Sheol, diin bala ang imo kalaglagan?#1 Cor. 15:55.
Ang paghinulsul lipdan sa akon mga mata.
15Bisan pa mabungahon sia sa tunga sang iya mga utud,
ang salatan magaabut, ang ginhawa sang Ginoo,
nga nagasaka gikan sa kamingawan;
kag magamala ang iya tuburan,
mahubsan ang iya tulubdan;
atihon niya ang bahandi
sang tanan nga malahalon nga gamit.
16Ang Samaria magaantus sang iya sala,
kay nagbato sia sa iya Dios;
mapukan sila sa espada,
ang ila mga lapsag ilampus,
kag ang ila mga babayi nga nagabusung gayhabon.
Currently Selected:
OSEAS 13: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
