OSEAS 11
11
Ang Dios Nagahandum sang Iya Balingag nga Katawohan
1Sang bata pa si Israel, niyan ginhigugma ko sia,
kag gintawag ang akon anak nga lalaki gikan sa Egipto.#Mat. 2:15.
2Sa labi pa nga pagtawag sang mga manalagna sa ila,
labi pa nga nagpalayo sila sa ila;
nagahalad sila sa mga Baal,
kag nagsonog sing incienso sa mga larawan nga tinigban.
3Apang gintudloan ko sa paglakat ang Efraim,
ginkungkung ko sila;
apang wala sila makakilala nga ako nag-ayo sa ila.
4Ginbutong ko sila sa mga lubid sang tawo,
sa mga gapus sang gugma,
kag naginsubong ako sa ila
sang nagahukas sang gota sa ila mga sulang,
kag ginbutangan ko sing pagkaon sa atubangan nila.
5Indi sila magbalik sa duta sang Egipto,
kondi ang mga Asiriahanon amo ang ila hari,
bangud nga nagdumili sila sa pagbalik sa akon.
6Ang espada magatupa sa ila kabanwaanan,
magaupus sang ila mga pintal,
kag magahalunhon sa ila bangud sang ila kaugalingon nga mga laygay.
7Ang akon katawohan nabuyuk sa pagtalikod sa akon;
gani ginatangdo sila sa gota,
kag wala gid sing magahukas sini.
8Paano bala ang pagbiya ko sa imo, Efraim!
Paano bala ang pagsikway ko sa imo, Israel!
Paano bala ang paghimo ko sa imo subong sang Adma!
Paano bala ang paghimo ko sa imo subong sang Zeboim!#Deut. 29:23.
Ang akon tagiposoon nagliso sa sulud nakon,
nagadabdab sing tingub ang akon mga kaawa.
9Indi ko paghikuton ang kapintas sang akon kaakig,
indi ako magbalik sa paglaglag sang Efraim;
kay Dios ako kag indi tawo,
ang Balaan sa tunga nimo,
kag indi ako mag-abut sa kasingkal.
10Magasonod sila sa Ginoo,
nga magangurub kaangay sang leon;
kay magangurub sia,
kag ang mga anak magaabut nga nagakurug gikan sa katundan;
11magaabut sila nga nagakurug subong sang pispis gikan sa Egipto,
kag subong sang alimokon gikan sa duta sang Asiria;
kag papuy-on ko sila sa ila mga balay, nagasiling ang Ginoo.
12Ginalibutan ako sang Efraim sing pagkadimatuud,
kag ang panimalay sang Israel sing paglimbong;
apang ang Juda nagadumala pa upud sa Dios,
kag matutum upud sa Balaan.
Currently Selected:
OSEAS 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
