OSEAS 10
10
1Ang Israel malambo nga uvas
nga nagapamunga.
Sono sa kabugana sang iya bunga
ginpadamu niya ang iya mga halaran;
sono sa pagkaayo sang ila duta
naghimo sila sing matahum nga mga obelisco.
2Ang ila tagiposoon nabahinbahin;
karon masapwan nga nakasala sila.
Gub-on niya ang ila mga halaran,
laglagon niya ang ila mga obelisco.
3Karon sa pagkamatuud magasiling sila:
“Wala na kami sing hari,
kay wala kami nagakahadluk sa Ginoo,
kag ang hari, ano bala ang iya mahimo sa amon?”
4Nagapamolong sila sing mga polong nga wala sing pulus;
nga nagasumpa sing dimatuud sa paghimo sing mga katipan;
busa ang paghukom nagatubo subong sang tubli
sa mga sul-ay sang latagon.
5Ang mga pumuluyo sang Samaria kugmaton
sang mga tinday nga baka sang Bet-aven.#1 Hari 12:28-29.
Kay ang iya katawohan magalalaw sa sini,
kag ang iya mga sacerdote nga nagkasadya sa iya,
tungud sang iya himaya nga nagtaliwan sa iya.
6Ini man dalhon sa Asiria,
nga amuma kay Hari Jareb.
Si Efraim magabaton sing kahuluy-an,
kag ang Israel mahuy-an sang iya kaugalingon nga laygay.
7Ang Samaria kag ang iya hari ginkuha,
subong sang bukal sa ibabaw sang tubig.
8Ang mataas nga mga duug man sang Aven, ang sala sang Israel,
pagalaglagon.
Magatubo sa ibabaw sang iya mga halaran
ang talongon kag ang mga ragiwriw;
kag magasiling sila sa mga bukid, Taboni kami,
kag sa kabakoloran, Pukani kami.#Luc. 23:30; Bug. 6:16.
9O Israel, nagpakasala ka kutub sa mga adlaw sang Gabaa;#Huk. 19:1-30.
didto nagtindug sila.
Ang inaway batok sa mga anak sang kalautan wala bala nagalambut sa ila sa Gabaa?
10Kon luyag ko silotan ko sila;
kag ang mga katawohan magatipon batok sa ila
kon sila magaid sa ila duha ka paglalis.
11Ang Efraim bakiya nga baka nga natun-an
nga maluyag sa paglinas,
apang nag-agi ako sa ibabaw sang iya matahum nga liog;
butangan ko sing manugsakay ang Efraim,
ang Juda magaarado,
ang Jacob magapakaras sang iya nga puga.
12Sab-ug kamo nga sa inyo sing pagkamatarung,
mag-ani sono sa pagkaayo;
bungkaga ang inyo pinabayaan nga duta,#Jer. 4:3.
kay tion ini sa pagpangita sa Ginoo,
tubtub nga mag-abut sia kag mag-ulan sa inyo sing pagkamatarung.
13Nag-arado kamo sing pagkamalaut,
nag-ani kamo sing kalautan,
nakakaon kamo sang bunga sang kabutigan.
Kay nagsalig ka sa imo dalanon
kag sa kadamuon sang imo gamhanan nga mga tawo,
14busa ang kagubut magalutaw sa imo katawohan,
kag ang tanan mo nga mga pamakud laglagon,
subong sang paglaglag ni Salman sang Bet-arbel sa adlaw sang inaway;
ang iloy ginlampus upud sa mga anak.
15Amo ini ang himoon sang Bet-el sa inyo,
bangud sang inyo daku nga pagkamalaut. Sa pamanagbanag laglagon sing bug-os
ang hari sang Israel.
Currently Selected:
OSEAS 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
