GENESIS 29

Si Jacob Nagapangagad kay Laban tungud kay Raquel kag kay Lea

1Niyan nagpadayon si Jacob sang iya panlakatan, kag nag-abut sa duta sang katawohan sang sidlangan. 2Sang nagtolok sia, nakita niya ang isa ka bobon sa latagon, kag yari karon, tatlo ka panong sang carnero nga nagaluko sa luyo sini; kay gikan sa sadtong bobon ginpainum nila ang mga panong. Daku ang bato sa baba sang bobon, 3kag sang natipon didto ang tanan nga panong, ginpaligid nila ang bato gikan sa baba sang bobon, kag ginpainum ang mga carnero, kag gin-uli ang bato sa baba sang bobon sa iya duug.

4Si Jacob nagsiling sa ila, “Mga utud ko, tagadiin bala kamo?” Nagsiling sila, “Taga-Haran kami.” 5Nagsiling sia sa ila, “Kilala bala ninyo si Laban nga anak ni Nahor?” Nagsiling sila, “Kilala namon sia.” 6Nagsiling sia sa ila, “Maayo bala sia?” Nagsiling sila, “Maayo; kag tan-awa, si Raquel nga iya anak nga babayi nagapakari upud sa mga carnero!” 7Nagsiling sia, “Yari karon, mataas pa ang adlaw, indi pa tion sa pagtipon sang kahayupan; paimna ninyo ang mga carnero, kag lakat kamo, pahalba sila.” 8Apang nagsiling sila, “Indi kami makasarang tubtub nga matipon ang tanan nga panong, kag mapaligid ang bato gikan sa baba sang bobon; ugaling mapainum namon ang mga carnero.”

9Sang nagahambal pa sia sa ila, si Raquel nag-abut upud ang mga carnero sang iya amay; kay sia nagbantay sa ila. 10Karon sang nakita ni Jacob si Raquel nga anak ni Laban nga utud sang iya iloy, kag ang mga carnero ni Laban nga utud sang iya iloy, nagpalapit si Jacob kag ginpaligid ang bato gikan sa baba sang bobon, kag ginpainum ang panong ni Laban nga utud sang iya iloy. 11Niyan ginhalukan ni Jacob si Raquel, kag naghibi sing mabaskug. 12Kag si Jacob nagsugid kay Raquel nga sia himata sang iya amay, kag nga anak sia ni Rebeca; kag nagdalagan sia kag nagsugid sa iya amay.

13Sang pagkabati ni Laban sang mga balita nahanungud kay Jacob nga anak sang iya utud nga babayi, nagdalagan sia sa pagbaton sa iya, kag ginhakus sia kag ginhalukan sia, kag gindala sia sa iya balay. Si Jacob nagpanugid kay Laban sini tanan nga butang, 14kag si Laban nagsiling sa iya, “Sa pagkamatuud ikaw tul-an ko kag unud ko!” Kag nagpabilin sia upud sa iya sing isa ka bulan.

15Niyan si Laban nagsiling kay Jacob, “Bangud nga ikaw akon himata, busa magaalagad ka bala sa akon sa wala sing ano? Sugiri ako, ano bala ang imo sohol?” 16Karon si Laban may duha ka anak nga babayi; ang ngalan sang magulang si Lea, kag ang ngalan sang manghud si Raquel. 17Ang mga mata ni Lea huluy, apang si Raquel maayoayo kag maambong. 18Ginhigugma ni Jacob si Raquel; kag sia nagsiling, “Ako magapangagad sa imo sing pito ka tuig tungud kay Raquel nga imo anak nga manghud.” 19Si Laban nagsiling, “Maayo pa nga ihatag ko sia sa imo sang ihatag ko sia sa iban nga tawo; pabilin ka sa akon.” 20Gani si Jacob nagpangagad tungud kay Raquel sing pito ka tuig, kag daw pila lamang ka adlaw sila sa iya bangud sang gugma niya sa iya.

21Niyan nagsiling si Jacob kay Laban, “Ihatag sa akon ang akon asawa, kay natuman na ang akon mga adlaw, agud nga maghiusa ako sa iya.” 22Gani gintipon ni Laban ang tanan nga tawo sang duug, kag naghiwat sing piesta. 23Apang sang pagkagab-i ginkuha niya si Lea nga iya anak kag gindala sia kay Jacob; kag naghiusa sia sa iya. 24(Ginhatag ni Laban ang iya alagad nga babayi nga si Zilpa nga alagad sa iya anak nga si Lea.) 25Kag sang pagkaaga, yari karon, si Lea gali; kag si Jacob nagsiling kay Laban, “Ano bala ini ang ginhimo mo sa akon? Wala bala ako magpangagad sa imo tungud kay Raquel? Ngaa bala nga ginlimbongan mo ako?” 26Si Laban nagsiling, “Wala ginahimoa ang subong sa amon duug, sa paghatag sang manghud sing una sa magulang. 27Bug-os ang iya semana sini, kag ihatag namon sa imo ang isa man tungud sang pagpangagad mo sa akon sa pito pa ka tuig.” 28Ginhimo ni Jacob ang subong sini, kag ginbug-os ang semana niya; niyan ginpaasawa ni Laban sa iya si Raquel nga iya anak. 29(Ginhatag ni Laban ang iya alagad nga babayi nga si Bilha nga alagad kay Raquel nga iya anak.) 30Gani naghiusa man sia kay Raquel, kag ginhigugma niya si Raquel sing labi kay Lea, kag nagpangagad sa iya sing pito pa ka tuig.

Ang mga Anak ni Jacob

31Sang nakita sang Ginoo nga si Lea gintamay, ginbuksan niya ang iya tiyan; apang si Raquel baw-as. 32Kag nagpanamkon si Lea kag nag-anak sing lalaki, kag ginhingalanan niya sia Ruben;#29:32 Kon sayoron Tan-awa, isa ka anak nga lalaki. kay nagsiling sia, “Bangud nga gintolok sang Ginoo ang akon kapipit-an; sa pagkamatuud karon higugmaon ako sang akon bana.” 33Nagpanamkon sia liwat, kag nag-anak sing lalaki, kag nagsiling, “Bangud nga nakabati ang Ginoo nga ako gintamay, ginhatagan niya ako sini man”; kag ginhingalanan niya sia Simeon. 34Nagpanamkon sia liwat kag nag-anak sing lalaki, kag nagsiling, “Karon sa sining tion magatingub sa akon ang akon bana, bangud nga ginpangankan ko sia sing tatlo ka anak”; busa ginhingalanan sia Levi. 35Kag nagpanamkon sia liwat kag nag-anak sing lalaki, kag nagsiling sia, “Sa sining tion dayawon ko ang Ginoo”; busa ginhingalanan niya sia Juda; kag nag-untat sia sa pag-anak.

Currently Selected:

GENESIS 29: ABHIL82

Highlight

Copy