GENESIS 28

1Niyan gintawag ni Isaac si Jacob kag ginpakamaayo sia, kag gintulinan sia, kag nagsiling sa iya, “Dili ka magpangasawa sa isa ka Canaanhon. 2Tindug ka, kadto sa Padan-aram sa balay ni Betuel nga amay sang imo iloy; kag pangasawa ka gikan didto sa isa sang mga anak ni Laban nga utud sang imo iloy. 3Ang Dios nga Makaako magpakamaayo sa imo kag maghimo sa imo nga mabungahon kag magpabuad sa imo, agud nga manginkabon ka sang mga katawohan. 4Kabay maghatag sia sang pagpakamaayo ni Abraham#Gen. 17:4-8. sa imo kag sa imo mga kaliwatan upud sa imo, agud nga mapanubli mo ang duta sang imo mga pagpanlugayaw nga ginhatag sang Dios kay Abraham!” 5Sa amo ginpalakat ni Isaac si Jacob; kag nagkadto sia sa Padan-aram kay Laban, anak ni Betuel nga Sirianhon, ang utud ni Rebeca, iloy ni Jacob kag ni Esau.

6Karon nakita ni Esau nga ginpakamaayo ni Isaac si Jacob kag ginpalakat sia sa Padan-aram sa pagpangasawa didto, kag nga sang ginpakamaayo niya sia gintulinan niya sia, “Dili ka magpangasawa sa isa sang mga Canaanhon,” 7kag nga si Jacob nagtuman sa iya amay kag sa iya iloy kag nagkadto sa Padan-aram. 8Gani sang nakita ni Esau nga ang mga babayi nga Canaanhon wala mahamut-i ni Isaac nga iya amay, 9nagkadto si Esau kay Ismael kag nagpangasawa kay Mahalat nga anak ni Ismael nga anak ni Abraham, utud ni Nebayot, luwas sang iya mga asawa na.

Ang Dios Nagapahayag kay Jacob sa Bet-el

10Naggowa si Jacob sa Beer-seba, kag nagkadto pa Haran. 11Kag nag-abut sia sa isa ka duug, kag nagpabilin didto sa sadtong gab-i, bangud nga natunud na ang adlaw. Sa tapus sia nakakuha sing isa sang mga bato sang duug, iya gin-onlan kag naghigda sa sadtong duug sa pagtolog. 12Kag nagdamgo sia nga may isa ka hagdan nga ginpatindug sa duta, kag ang iya ukbung naglambut sa langit; kag yari karon, ang mga manugtunda sang Dios nagasaka kag nagapanaug sa sini!#Juan 1:51. 13Kag yari karon, ang Ginoo nagtindug sa ibabaw sini#28:13 Ukon sa luyo niya. kag nagsiling, “Ako ang Ginoo, ang Dios ni Abraham nga imo amay kag ang Dios ni Isaac; ang duta nga imo ginahigdaan ihatag ko sa imo kag sa imo mga kaliwatan;#Gen. 13:14. 14kag ang imo mga kaliwatan manginsubong sang yab-ok sang duta, kag magalapnag ka sa katundan kag sa sidlangan kag sa aminhan kag sa bagatnan; kag paagi sa imo kag sa imo mga kaliwatan pakamaayohon ang tanan nga panimalay sang duta.#Gen. 12:3; 22:18. 15Yari karon, nagaupud ako sa imo kag magabantay sa imo sa bisan diin ka magakadto, kag magapabalik sa imo sa sining duta; kay indi ako magbiya sa imo tubtub nga mahimo ko ang akon ginpamolong sa imo.” 16Niyan nagmata si Jacob sa iya katologon kag nagsiling, “Sa pagkamatuud ang Ginoo yari sa sining duug; kag wala ako makahibalo sini.” 17Kag hinadlukan sia, kag nagsiling, “Daw ano ka makakulugmat sining duug! Indi ini iban kondi balay sang Dios, kag ini amo ang gawang sang langit.”

18Gani nagbangon si Jacob sing aga pa, kag ginkuha ang bato nga iya gin-onlan kag ginpatindug ini nga haligi kag ginboboan sing lana ang ibabaw sini. 19Ginhingalanan niya yadtong duug Bet-el;#28:19 Kon sayoron Balay sang Dios. apang ang ngalan anay sang banwa amo ang Luz. 20Niyan si Jacob naghimo sing saad, nga nagasiling, “Kon mag-upud ang Dios sa akon, kag magbantay sa akon sa sining dalanon nga akon ginalaktan, kag maghatag sa akon sing tinapay nga kaonon kag panapton nga isuklub, 21sa bagay nga makabalik ako sa paghidait sa balay sang akon amay, niyan ang Ginoo mangin-akon Dios, 22kag ining bato, nga akon ginpatindug nga haligi, manginbalay sang Dios; kag sa tanan nga ihatag mo sa akon ihatag ko ang ikapulo sa imo.”

Currently Selected:

GENESIS 28: ABHIL82

Highlight

Copy