GENESIS 30

1Sang nakita ni Raquel nga wala sia magpanganak nga kay Jacob, nahisa sia sa iya utud nga babayi; kag nagsiling kay Jacob, “Hatagi ako sing mga anak, ukon indi mapatay ako!” 2Si Jacob nagpangakig kay Raquel, kag nagsiling sia, “Tal-us bala ako sang Dios, nga nagpugung sa imo sang bunga sang imo tiyan?” 3Niyan nagsiling sia, “Yari ang akon alagad nga si Bilha; hiusa ka sa iya; agud nga mag-anak sia sa ibabaw sang akon mga tuhud, kag ako man makaagum sing mga anak paagi sa iya.” 4Gani ginpaasawa niya sa iya si Bilha nga iya alagad; kag si Jacob naghiusa sa iya. 5Kag nagpanamkon si Bilha kag nag-anak kay Jacob sing lalaki. 6Niyan si Raquel nagsiling, “Ginhukman ako sang Dios, kag ginpamatian man niya ang akon tingug kag ginhatagan ako sing anak nga lalaki”; busa ginhingalanan niya sia Dan.#30:6 Kon sayoron Sia naghukom. 7Nagpanamkon liwat si Bilha nga alagad ni Raquel kag nag-anak sing ikaduha nga lalaki kay Jacob. 8Niyan si Raquel nagsiling, “Sa makusug nga mga pagdumug nakigdumug ako sa akon utud nga babayi, kag nagdaug”; gani ginhingalanan niya sia Neftali.

9Sang nakita ni Lea nga nag-untat sia sa pag-anak, ginkuha niya si Zilpa nga iya alagad kag ginpaasawa sia kay Jacob. 10Niyan si Zilpa nga alagad ni Lea nag-anak kay Jacob sing lalaki. 11Kag si Lea nagsiling, “Mapalaron!” gani ginhingalanan niya sia Gad.#30:11 Kon sayoron Kapalaran. 12Si Zilpa nga alagad ni Lea nag-anak sing ikaduha nga lalaki kay Jacob. 13Kag si Lea nagsiling, “Malipayon ako! Kay ang mga anak nga babayi magatawag sa akon nga malipayon”; gani ginhingalanan niya sia Aser.#30:13 Kon sayoron Malipayon.

14Si Ruben nagkadto sa panag-on sang ani sang trigo kag nakakita sia sing mga mandragora sa latagon, kag gindala sila kay Lea nga iya iloy. Niyan nagsiling si Raquel kay Lea, “Ginaampo ko, hatagi ako sang mga mandragora sang imo anak.” 15Apang nagsiling sia sa iya, “Diotay bala nga butang nga ang akon bana ginkuha mo? Kag kuhaon mo pa bala ang mga mandragora man sang akon anak?” Si Raquel nagsiling, “Niyan magahulid sia upud sa imo sining gab-i tungud sang mga mandragora sang imo anak.” 16Sang nagpauli si Jacob gikan sa latagon sa kahaponon, si Lea naggowa sa pagsugata sa iya, kag nagsiling, “Kinahanglan nga maghiusa ka sa akon; kay ginhinakayan ko ikaw tungud sang mga mandragora sang akon anak.” Gani naghulid sia upud sa iya sadtong gab-i. 17Kag ginpamatian sang Dios si Lea, kag nagpanamkon sia kag nag-anak kay Jacob sing ikalima nga lalaki. 18Si Lea nagsiling, “Ang Dios naghatag sa akon sang akon hinakay bangud nga ginhatag ko ang akon alagad sa akon bana”; kag ginhingalanan niya sia Isacar. 19Kag nagpanamkon liwat si Lea, kag nag-anak kay Jacob sing ikan-um nga lalaki. 20Niyan si Lea nagsiling, “Ang Dios naghatag sa akon sing maayo nga dote; karon magapadungug sa akon ang akon bana, bangud nga ginpangankan ko sia sing anum ka lalaki”; kag ginhingalanan niya sia Zabulon. 21Sang olihi nag-anak sia sing babayi, kag ginhingalanan niya sia Dina. 22Niyan ang Dios nagdumdum kay Raquel, kag ginpamatian sia sang Dios, kag ginbuksan niya ang iya tiyan. 23Nagpanamkon sia kag nag-anak sing lalaki, kag nagsiling, “Ginkuha sang Dios ang akon kahuluy-an”; 24kag ginhingalanan niya sia Jose,#30:24 Kon sayoron Nagadugang sia. nga nagasiling, “Kabay nga ang Ginoo magdugang sa akon sing isa pa ka anak!”

Ang Daya ni Laban kag ni Jacob

25Sang si Raquel nakaanak kay Jose, si Jacob nagsiling kay Laban, “Palakta ako, agud nga makapauli ako sa akon duug kag sa akon duta. 26Ihatag sa akon ang akon mga asawa kag ang akon mga anak nga tungud sa ila nag-alagad ako sa imo, kag palakta ako; kay nakahibalo ka sang akon pag-alagad sa imo.” 27Apang si Laban nagsiling sa iya, “Kon tugutan mo ako sa pagsiling sini, nahibaloan ko paagi sa papakut nga ang Ginoo nagpakamaayo sa akon bangud sa imo; 28ipat-ud sa akon ang imo sohol, kag ihatag ko ini.” 29Nagsiling si Jacob sa iya, “Ikaw nakahibalo kon daw ano nga pag-alagad ko sa imo, kag kon paano ang kahimtangan sang imo kahayupan sa akon. 30Kay diotay ang imo sang wala pa ako mag-abut, kag nagdugang ini nga nanginkadam-an; kag ang Ginoo nagpakamaayo sa imo sa bisan diin ako magliso. Apang karon san-o pa bala magapanigana ako tungud sa akon kaugalingon nga panimalay man?” 31Nagsiling sia, “Ano bala ang ihatag ko sa imo?” Si Jacob nagsiling, “Indi ka maghatag sa akon sing bisan ano; kon himoon mo ini tungud sa akon, pahalbon ko liwat ang imo panong kag bantayan ini: 32magaagi ako karon nga adlaw sa tunga sang bug-os mong panong, nga nagapain sang tagsa nga pintokpintokon kag kambang kag sang tagsa nga maitum sa mga carnero, kag sang kambang kag sang pintokpintokon sa mga kanding; kag mangin-akon sohol ang kasubong sini. 33Gani magasabat tungud sa akon ang akon pagkamatarung kutub karon, kon magkari ikaw sa pagtan-aw sang akon sohol. Ang tagsa nga indi pintokpintokon kag kambang sa mga kanding kag indi maitum sa mga carnero, ina kon makita sa akon isipon nga kinawat.” 34Si Laban nagsiling, “Maayo! Manginsono ini sa imo nasiling.” 35Apang ginpain niya sadtong adlaw ang lalaki nga mga kanding nga guraygurayon kag kambang, kag ang tanan nga kanding nga babayi nga pintokpintokon kag kambang, ang tagsa nga may puti, kag ang tanan nga maitum sa mga carnero, kag ginhatag sila sa mga kamut sang iya mga lalaking anak; 36kag ginbutangan niya sing kalayoon nga tatlo ka adlaw nga lakton sa tunga niya kag ni Jacob; kag si Jacob nagpahalab sang nabilin nga mga panong ni Laban.

37Niyan nagkuha si Jacob sing mga sanga nga hilaw sang alamo kag sang avelyano kag sang castaño, kag ginpanitan niya sila sing gurayguray nga puti, nga ginapadayag ang puti sang mga sanga. 38Ginbutang niya ang mga sanga nga iya ginpanitan sa atubang sang mga panong sa mga tarog sang tubig, sa mga palaimnan, diin nagakadto ang mga panong sa pag-inum. Kag sanglit nag-ilinit sila kon mag-abut sa pag-inum, 39nagpanamkon ang mga panong sa atubang sang mga sanga kag sa amo ang mga panong nagbata sing mga guraygurayon, mga pintokpintokon, kag mga kambang. 40Kag ginpain ni Jacob ang mga cordero, kag ginpaatubang ang mga panong sa mga guraygurayon kag ang tanan nga maitum sa panong ni Laban; kag ginpain niya ang iya kaugalingon nga mga manada, kag wala niya pag-isimpon sila sa panong ni Laban. 41Sa bisan san-o nagapalainit ang labi pa kabakud sang panong ginbutang ni Jacob ang mga sanga sa atubang sang mga panong sa mga tarog, agud magpanamkon sila sa tunga sang mga sanga, 42apang kon ang panong mga maluya wala niya sila ginabutang; gani ang mga labi pa kaluya iya ni Laban, kag ang mga labi pa kabakud iya ni Jacob. 43Sa amo ang tawo nagmanggaranon sing lakas, kag may madamung panong, mga alagad nga babayi kag mga alagad nga lalaki, kag mga camelyo kag mga asno.

Currently Selected:

GENESIS 30: ABHIL82

Highlight

Copy