ESDRAS 7
7
Si Esdras kag ang Iya Kabon Nagakadto sa Jerusalem
1Karon sa tapus sining mga butang, sang paghari ni Artajerjes nga hari sang Persia, si Esdras nga lalaking anak ni Seraya, ang lalaking anak ni Azarias, ang lalaking anak ni Helcias, 2ang lalaking anak ni Sallum, ang lalaking anak ni Sadoc, ang lalaking anak ni Ahitob, 3ang lalaking anak ni Amarias, ang lalaking anak ni Azarias, ang lalaking anak ni Marayot, 4ang lalaking anak ni Zeraya, ang lalaking anak ni Uzi, ang lalaking anak ni Buki, 5ang lalaking anak ni Abisue, ang lalaking anak ni Finees, ang lalaking anak ni Eleazar, ang lalaking anak ni Aaron nga puno nga sacerdote— 6ini si Esdras nagtaklad gikan sa Babilonia. Sia manunulat nga handa sa kasogoan ni Moises nga ginhatag sang Ginoo nga Dios sang Israel; kag gintugutan sia sang hari sang tanan niyang pangabay, sono sa kamut sang Ginoo nga iya Dios sa ibabaw niya.
7Kag may nagtaklad pa Jerusalem sang katawohan sang Israel, kag sang mga sacerdote kag mga Levinhon, mga manug-amba kag mga manugbantay sang gawang, kag mga Netinim sa ikapitong tuig sang hari nga si Artajerjes. 8Kag nag-abut sia sa Jerusalem sa ikalimang bulan, sa ikapitong tuig sang hari; 9kay sa nahaunang adlaw sang nahaunang bulan nagsugud sia sa pagtaklad gikan sa Babilonia, kag sa nahaunang adlaw sang ikalimang bulan nag-abut sia sa Jerusalem, sono sa maayong kamut sang iya Dios sa ibabaw niya. 10Kay gintugyan ni Esdras ang iya tagiposoon sa pag-usisa sang kasogoan sang Ginoo, kag sa pagbutang sini sa buhat, kag sa pagtudlo sa Israel sang mga palatukuran kag mga pagsolondan.
11Ini amo ang huwad sang sulat nga ginhatag ni Hari Artajerjes kay Esdras nga sacerdote, ang escriba, ang escriba sang mga polong sang mga sogo sang Ginoo, kag sang iya mga palatukuran sa Israel: 12“Si Artajerjes, hari sang mga hari, kay Esdras nga sacerdote, ang escriba sang kasogoan sang Dios sang langit. Kag karon 13nagahimo ako sing mando nga sila tanan nga gikan sa katawohan sang Israel kag ang ila mga sacerdote kag ang mga Levinhon sa akon ginharian, nga nagahunahuna sing kinabubut-on sa pagkadto sa Jerusalem, mag-upud sa imo. 14Sanglit nga ginpadala ka sang hari kag sang iya pito ka manuglaygay sa pag-usisa nahanungud sa Juda kag Jerusalem, sono sa kasogoan sang imo Dios, nga yara sa imo kamut, 15kag sa pagdala sang pilak kag bulawan nga gindolot sing kinabubut-on sang hari kag sang iya mga manuglaygay sa Dios sang Israel, nga ang iya puluy-an didto sa Jerusalem, 16upud ang tanan nga pilak kag bulawan nga makita mo sa bug-os nga puud sang Babilonia, pati sang dolot-nga-kinabubut-on sang katawohan kag sang mga sacerdote, nga nagdolot sing kinabubut-on sa balay sang ila Dios nga yara sa Jerusalem. 17Busa sa bug-os nga kakugi magbakal ka sa sini nga cuarta sing mga tinday nga baka nga lalaki, mga carnero, mga cordero, pati sang ila mga halad-nga-kalan-on kag mga halad-nga-ilimnon, kag ihalad sila sa halaran sang balay sang inyo Dios nga yadto sa Jerusalem. 18Ang bisan ano nga maayo sa imo kag sa imo mga utud nga himoon sang nabilin nga pilak kag bulawan, himoa ninyo, sono sa kabubut-on sang inyo Dios. 19Ang mga gamit nga ginhatag sa imo nga sa pag-alagdan sang balay sang imo Dios, ihatag mo sa atubangan sang Dios sang Jerusalem. 20Kag ang bisan ano pa nga kinahanglan sa balay sang imo Dios, nga may kahigayonan ka sa paghatag, ihatag ini gikan sa balay sang bahandi sang hari.
21“Kag ako, si Artajerjes nga hari, nagahimo sing mando sa tanan nga manugtipig sang bahandi nga yara sa Tabok sang Suba: ang bisan ano nga kinahanglanon sa inyo ni Esdras nga sacerdote, ang escriba sang kasogoan sang Dios sang langit, himoon ini sa bug-os nga kakugi, 22tubtub sa isa ka gatus ka talanton nga pilak, tubtub sa isa ka gatus ka koro nga trigo, tubtub sa isa ka bat nga alak, tubtub sa isa ka gatus ka bat nga lana, kag asin nga wala pag-isiling kon pila. 23Ang bisan ano nga ginsogo sang Dios sang langit, paghimoon sing sibo gid tungud sa balay sang Dios sang langit, kay ngaa bala may kasingkal batok sa ginharian sang hari kag sang iya mga lalaking anak? 24Nagapamatuud man kami sa imo nga nahanungud sa bisan kay sin-o sang mga sacerdote, sang mga Levinhon, sang mga manug-amba, sang mga manugbantay sang gawang, sang mga Netinim, ukon sang mga alagad sang balay sang Dios, indi igo sa kasogoan ang pagpabayad sa ila sing buhis, alcabala, ukon balayran.
25“Kag ikaw, Esdras, sono sa kaalam sang imo Dios nga yara sa imo kamut, magtangdo ka sing mga punoan kag mga hukom nga maghukom sang bug-os nga katawohan nga yara sa Tabok sang Suba, ang tanan nga nakahibalo sang mga kasogoan sang imo Dios; kag tudloi ninyo sia nga wala makakilala sa ila. 26Ang bisan sin-o nga indi magbutang sa buhat sang kasogoan sang imo Dios kag sang kasogoan sang hari, hukman sia sa bug-os nga kakugi, bisan ini sa kamatayon ukon sa pagtapok ukon sa pagkuha sang mga pagkabutang ukon sa pagbilanggo.”
27Pakamaayohon ang Ginoo, ang Dios sang amon mga ginikanan, nga nagbutang sang subong sini nga butang sa tagiposoon sang hari, sa pagpatahum sang balay sang Ginoo nga yara sa Jerusalem, 28kag nagpadangat sa akon sang iya malig-on nga paghigugma sa atubangan sang hari kag sang iya mga manuglaygay, kag sa atubangan sang tanan nga gamhanan nga mga principe sang hari. Naglig-on ako sono sa kamut sang Ginoo nga akon Dios sa ibabaw nakon, kag gintipon ko ang mga puno gikan sa Israel sa pagtaklad upud sa akon.
Currently Selected:
ESDRAS 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
