ESDRAS 8
8
1Ini sila amo ang mga pangolo sang mga kabaranggayan, kag amo ini ang listahan sang kaliwatan sang mga nagtaklad upud sa akon gikan sa Babilonia, sang paghari ni Artajerjes nga hari: 2gikan sa mga lalaking anak ni Finees, si Gersom. Gikan sa mga lalaking anak ni Itamar, si Daniel. Gikan sa mga lalaking anak ni David, si Hatus, 3gikan sa mga lalaking anak ni Secanias. Gikan sa mga lalaking anak ni Paros, si Zacarias, upud sa iya gin-isip sono sa listahan sang kaliwatan sang mga lalaki isa ka gatus kag kalim-an. 4Gikan sa mga lalaking anak ni Pahat-moab, si Elioenai nga lalaking anak ni Zeraias, kag upud sa iya duha ka gatus ka lalaki. 5Gikan sa mga lalaking anak ni Secanias, ang lalaking anak ni Jahaziel, kag upud sa iya tatlo ka gatus ka lalaki. 6Gikan sa mga lalaking anak ni Adin, si Ebed nga lalaking anak ni Jonatan, kag upud sa iya kalim-an ka lalaki. 7Gikan sa mga lalaking anak ni Elam, si Isaya nga lalaking anak ni Atalias, kag upud sa iya kapitoan ka lalaki. 8Gikan sa mga lalaking anak ni Sepatias, si Zebadias nga lalaking anak ni Mecael, kag upud sa iya kawaloan ka lalaki. 9Gikan sa mga lalaking anak ni Joab, si Obadias nga lalaking anak ni Jehiel, upud sa iya duha ka gatus kag napulo kag walo ka lalaki. 10Gikan sa mga lalaking anak ni Selomit, ang lalaking anak ni Josifias, kag upud sa iya isa ka gatus kag kan-uman ka lalaki. 11Gikan sa mga lalaking anak ni Bebai, si Zacarias nga lalaking anak ni Bebai, kag upud sa iya duha ka pulo kag walo ka mga lalaki. 12Gikan sa mga lalaking anak ni Azgad, si Johanan nga lalaking anak ni Hacatan, kag upud sa iya isa ka gatus kag napulo ka lalaki. 13Gikan sa mga lalaking anak ni Adonicam, ang mga katapusan, ang ila mga ngalan si Elifelet, si Jeuel, kag si Semayas, kag upud sa ila kan-uman ka lalaki. 14Gikan sa mga lalaking anak ni Bigvai, si Utai kag si Zabud, kag upud sa ila kapitoan ka lalaki.
15Gintipon ko sila sa suba nga nagailig pa Ahava, kag didto nagpahamtang kami sing dologan sing tatlo ka adlaw. Sang gintan-aw ko ang katawohan kag ang mga sacerdote, wala ko makita didto ang bisan sin-o sang mga lalaking anak ni Levi. 16Niyan ginpatawag ko si Eliezer, si Ariel, si Semaya, si Elnatan, si Jarib, si Elnatan, si Natan, si Zacarias, kag si Mesullam, puno nga mga tawo, si Joiarib man kag si Elnatan, nga mga manunudlo, 17kag ginpadala ko sila sa kay Iddo, nga puno sa duug nga Casifia, nga ginsugiran ko sila sang isiling nila kay Iddo kag sa iya mga utud nga mga Netinim sa duug nga Casifia, nga magdala sila sa amon sing mga manug-alagad sa balay sang amon Dios. 18Kag paagi sa maayo nga kamut sang amon Dios sa ibabaw namon, nagdala sila sa amon sing lalaki nga mahangponon, gikan sa mga lalaking anak ni Mali nga lalaking anak ni Levi, lalaking anak ni Israel; si Serebias upud ang iya mga lalaking anak kag ang iya mga himata, napulo kag walo; 19si Hasabias man kag upud sa iya si Isaya gikan sa mga lalaking anak ni Merari, ang iya mga himata kag ang ila mga lalaking anak, duha ka pulo; 20luwas sang duha ka gatus kag duha ka pulo ka Netinim, nga ginhatag ni David kag sang iya mga principe sa pag-alagdan sang mga Levinhon. Tanan sila nasambit sa ngalan.
21Niyan nagbantala ako sing puasa didto, sa luyo sang suba nga Ahava, agud nga makapaubus kami sa atubangan sang amon Dios, sa pagpangayo gikan sa iya sing dalan nga matadlong tungud sa amon, tungud sa amon mga magamay, kag sa amon bug-os nga pagkabutang. 22Kay nahuya ako magpangayo sa hari sing guban sang mga soldado kag mga manugkabayo sa pagtabang sa amon batok sa kaaway sa dalanon; bangud nga nakapamolong kami sa hari, “Ang kamut sang amon Dios yara sa tanan nga nagadangup sa iya sa kaayohan, apang ang iya gahum kag kasingkal batok sa tanan nga nagbiya sa iya.” 23Gani nagpuasa kami kag napakilooy sa amon Dios tungud sini, kag nalooy sia sa amon.
24Niyan ginpain ko ang napulog duha sang mga puno sang mga sacerdote: si Serebias, si Hasabias, kag napulo sang ila mga himata upud sa ila. 25Kag gintimbang ko sa ila ang pilak kag ang bulawan kag ang mga gamit, ang halad nga sa balay sang amon Dios nga gindolot sang hari kag sang iya mga manuglaygay kag sang iya mga principe kag sang bug-os nga Israel nga nagtambong didto; 26gintimbang ko sa kamut nila ang anum ka gatus kag kalim-an ka talanton nga pilak, kag ang mga gamit nga pilak nga isa ka gatus ka talanton, sa bulawan isa ka gatus ka talanton, 27duha ka pulo ka yahong nga bulawan nga isa ka libo ka darico, kag duha ka gamit nga mapino nga mahining nga saway nga bilidhon subong sang bulawan. 28Kag nagsiling ako sa ila, “Balaan kamo sa Ginoo, kag balaan ang mga gamit; kag ang pilak kag ang bulawan halad-nga-kinabubut-on sa Ginoo, ang Dios sang amon mga ginikanan. 29Bantayi ninyo kag tipigan sila tubtub nga matimbang ninyo sila sa atubangan sang mga puno sang mga sacerdote kag sang mga Levinhon kag sang mga principe sang mga kabaranggayan sang Israel sa Jerusalem, sa mga hulut sang balay sang Ginoo.” 30Gani ginbaton sang mga sacerdote kag sang mga Levinhon sa timbang ang pilak kag ang bulawan kag ang mga gamit, sa pagdala sa ila sa Jerusalem, sa balay sang amon Dios.
31Niyan nagtaliwan kami gikan sa suba nga Ahava sang ikapulog duha nga adlaw sang nahauna nga bulan, sa pagkadto sa Jerusalem; ang kamut sang amon Dios yara sa ibabaw namon, kag sia nagluwas sa amon sa kamut sang kaaway kag sang manugpuut sa dalanon. 32Nag-abut kami sa Jerusalem, kag nagpabilin didto sing tatlo ka adlaw. 33Sa ikap-at nga adlaw gintimbang ang pilak kag ang bulawan kag ang mga gamit sa balay sang amon Dios sa kamut ni Meremot nga sacerdote, lalaking anak ni Urias, kag upud sa iya yara si Eleazar nga lalaking anak ni Finees, kag upud sa ila yara si Jozabad nga lalaking anak ni Jesua kag si Noadias nga anak ni Binui, ang mga Levinhon. 34Ang kabilogan sa isip kag sa timbang, kag ang bug-os nga timbang nasulat sa sadtong tion.
35Ang mga anak sang kabihagan nga naggowa gikan sa pagtapok nagdolot sing mga halad-nga-sinonog sa Dios sang Israel, napulog duha ka tinday nga baka tungud sa bug-os nga Israel, kasiaman kag anum ka carnero, kapitoan kag pito ka cordero, napulog duha ka kanding nga lalaki nga halad-tungud-sa-sala; ini tanan amo ang halad-nga-sinonog sa Ginoo. 36Ginhatag nila ang mga panugyan sang hari sa mga satrapa sang hari kag sa mga pangolo-puud sa Tabok sang Suba; kag sila nagbulig sa katawohan kag sa balay sang Dios.
Currently Selected:
ESDRAS 8: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
