ESDRAS 6

1Niyan si Dario nga hari nagmando, kag nagpausisa sa balay sang mga tolon-an, diin nahamtang ang mga bahandi sa Babilonia. 2Kag nakita sa Ecbatana, sa palacio sa puud sang Media, ang linukot nga sa sini nasulat ini: “Ang sinulat. 3Sa nahaunang tuig ni Ciro nga hari, si Ciro nga hari naghimo sing mando: Nahanungud sang balay sang Dios sa Jerusalem, ipatindug ang balay, sa duug diin sila nagadolot sing mga halad: kag ipapasad sing malig-on ang iya mga sadsaran; ang iya kataason kan-uman ka maniko kag kan-uman ka maniko ang iya kasangkaron, 4nga may tatlo ka anib nga dalagku nga mga bato kag isa ka anib nga bag-ong tablon; ang mga kagastohan kuhaon sa balay sang hari. 5Kag ang mga gamit man nga bulawan kag pilak sang balay sang Dios, nga ginkuha ni Nabucodonosor gikan sa templo nga yara sa Jerusalem kag gindala sa Babilonia, iuli kag isulud liwat sa templo nga yara sa Jerusalem, ang tagsatagsa sa iya duug; ibutang mo sila sa balay sang Dios.”

6“Busa karon, Tatnai, pangolo-puud sa Tabok sang Suba, Setar-boznai, kag ang inyo mga kaupdanan nga mga Afarsacnon, nga yara sa Tabok sang Suba, palayo kamo gikan dira; 7pabayai ninyo ang buluhaton sining balay sang Dios; ang pangolo-puud sang mga Judio kag ang mga tigulang sang mga Judio magpatindug sining balay sang Dios sa iya duug. 8Labut pa nagahimo ako sing mando kon ano ang himoon ninyo sining mga tigulang sang mga Judio tungud sa pagpatindug sining balay sang Dios; gikan sa mga pagkabutang sang hari, gikan sa buhis sa Tabok sang Suba, sa bug-os nga kakugi ihatag ang mga galastohon sa sining mga tawo, agud nga indi sila masablagan. 9Kag ang ila kinahanglan—ang mga tinday sang baka, mga carnero, ukon mga cordero nga sa mga halad-nga-sinonog sa Dios sang langit, trigo, asin, alak, ukon lana, sono sa polong sang mga sacerdote nga yara sa Jerusalem—ihatag sa ila adlawadlaw sa walay langan, 10agud nga magdolot sila sing mga halad nga maamyon sa Dios sang langit, kag magpangamuyo tungud sa kabuhi sang hari kag sang iya mga lalaking anak. 11Naghimo ako sing mando man nga ang bisan sin-o nga magbalhin sining polong, pakuhaan sing balayan ang iya balay, kag bayawon sia kag ilansang sa sini, kag tungud sini ang iya balay himoon nga talampukan sang ipot. 12Ang Dios nga nagapapuyo sang iya ngalan didto maglaglag sang tanan nga hari kag katawohan nga mag-untay sang ila kamut sa pagliwat sang amo, sa paglaglag sining balay sang Dios nga yara sa Jerusalem. Ako si Dario naghimo sing mando; paghimoon ini sa bug-os nga kakugi.”

13Niyan si Tatnai, ang pangolo-puud sa Tabok sang Suba, si Setar-boznai, kag ang ila mga kaupdanan bangud sang ginpadala ni Dario nga hari, naghimo sono sa bug-os nga kakugi. 14Kag ang mga tigulang sang mga Judio nagpatindug kag nag-uswag, paagi sa mga pagtagna ni Hageo#Hag. 1:1. nga manalagna kag ni Zacarias#Zac. 1:1. nga anak ni Iddo. Ginpatindug nila kag gintapus ini sono sa sogo sang Dios sang Israel kag sono sa sogo ni Ciro kag ni Dario kag ni Artajerjes nga hari sang Persia; 15kag ining balay natapus sa ikatlong adlaw sang bulan nga Adar, nga amo ang ikan-um nga tuig sang paghari ni Dario nga hari.

16Kag ang katawohan sang Israel, ang mga sacerdote kag ang mga Levinhon, kag ang iban sang mga anak sang kabihagan, naghiwat sang paghalad sa sining balay sang Dios nga may kasadya. 17Nagdolot sila sa paghalad sining balay sang Dios sing isa ka gatus ka tinday nga baka, duha ka gatus ka carnero, apat ka gatus ka cordero, kag napulog duha ka lalaki nga kanding nga halad-tungud-sa-sala nga sa bug-os nga Israel, sono sa kadamuon sang mga kabikahan sang Israel. 18Kag ginpahamtang nila ang mga sacerdote sa ila mga binahin kag ang mga Levinhon sa ila mga kinabon, tungud sa pag-alagdan sang Dios nga yara sa Jerusalem, sono sa nasulat sa tolon-an ni Moises.

19Ang mga anak sang kabihagan naghiwat sang pascua sa ikapulog apat nga adlaw sang nahaunang bulan.#Ex. 12:1-20. 20Kay ang mga sacerdote kag ang mga Levinhon nagpaninlo sing tingub sang ila kaugalingon; tanan sila matinlo. Gani gin-ihaw nila ang pascua tungud sa tanan nga anak sang kabihagan, tungud sa ila mga masigkasacerdote, kag tungud sa ila kaugalingon; 21nagkaon sini ang katawohan sang Israel nga nagbalik gikan sa kabihagan, kag ang tanan nga nagpahain sang ila kaugalingon sa ila gikan sa kahigkoan sang mga pungsud sang duta sa pagpangita sa Ginoo, ang Dios sang Israel. 22Kag naghiwat sila sang piesta sang tinapay nga walay tapay sing pito ka adlaw nga may kalipay; kay ang Ginoo naghimo sa ila nga malipayon, kag nagpaliso sang tagiposoon sang hari sang Asiria sa ila, sa pagpalig-on sang ila mga kamut sa buluhaton sa balay sang Dios, ang Dios sang Israel.

Currently Selected:

ESDRAS 6: ABHIL82

Highlight

Copy