DEUTERONOMIO 22
22
1“Dili mo pagpabay-an ang baka sang imo utud ukon ang iya carnero nga nagatalang, kag magpanago ka gikan sa ila; dalhon mo sila sing totoo pabalik sa imo utud. 2Kag kon ang imo utud indi malapit sa imo, ukon wala mo sia makilal-i, niyan dalhon mo ini sa imo balay, kag ini mangindira sa imo tubtub nga ang imo utud magpangita sini; niyan iuli mo ini sa iya. 3Kag amo ini ang himoon mo sa iya asno; amo ini ang himoon mo sa iya panapton; amo ini ang himoon mo sa tagsa ka nadula nga butang sang imo utud, nga nadula niya kag nakita mo; indi ka makapanago. 4Dili ka magtolok sang asno sang imo utud ukon sang iya baka nga naglup-og sa dalanon, kag magpanago ka gikan sa ila; buligan mo sia sa pagpatindug sa ila.#Ex. 23:4-5.
5“Dili magpanaput ang babayi sang panapton sang lalaki, kag dili magpanaput ang lalaki sang panapton sang babayi; kay ang bisan sin-o nga maghimo sini kangil-aran sa Ginoo nga imo Dios.
6“Kon masalapuan mo sa atubangan mo sa dalanon ang isa ka pugad sang pispis, sa bisan ano nga kahoy ukon sa duta, nga may mga buto ukon mga itlog kag ang iloy nagaluub sa mga buto ukon sa mga itlog, dili mo pagkuhaon ang iloy upud sang mga buto; 7buhian mo ang iloy, apang makuha mo imo ang mga buto; agud nga magmaayo sa imo, kag nga mapalawig mo ang imo mga adlaw.
8“Kon nagapatindug ka sing bag-o nga balay, maghimo ka sing alubaybay sa imo alibungan, agud nga indi ka magdala sing dugo sa imo balay, kon ang bisan sin-o nga tawo maholog gikan didto.
9“Dili mo pagsab-ugan ang imo ulubasan sing duha ka sari nga binhi, basi kuhaon sa imo ang bug-os nga patubas, ang binhi nga ginsab-ug mo kag ang patubas sang ulubasan. 10Dili ka mag-arado nga nasaangan ang baka kag ang asno. 11Dili ka magpanaput sang panapton nga salakut, ang bulbul sang carnero kag lino sing tingub.#Lev. 19:19.
12“Maghimo ka nga sa imo sing mga plikos sa apat ka kilid sang imo panapton nga ginatabon mo sa imo.#Num. 15:37-41.
Mga Kasogoan nahanungud sang Pagkaputli
13“Kon ang isa ka tawo magpangasawa, kag maghiusa sa iya, kag dumtan sia, 14kag butangbutangan sia sing mga butang nga makahuluya, kag magpalapnag sing malaut nga kabantugan sa iya, kag magsiling, ‘Ginpangasawa ko ini nga babayi, kag sang pagpalapit ko sa iya, wala ko makita sa iya ang mga tanda sang pagkaulay,’ 15niyan ang amay kag ang iloy sang pamatan-on nga babayi magkuha sang mga tanda sang pagkaulay sang pamatan-on nga babayi kag dalhon sa mga tigulang sang banwa sa gawang; 16kag ang amay sang pamatan-on nga babayi magsiling sa mga tigulang, ‘Ginpaasawa ko ang akon anak nga babayi sa sini nga lalaki, kag ginadumtan niya sia; 17kag yari karon, ginbutangbutangan niya sia sing mga butang nga makahuluya, nga nagasiling, “Wala ko makita sa imo anak nga babayi ang mga tanda sang pagkaulay. Kag bisan pa ini amo ang mga tanda sang pagkaulay sang akon anak nga babayi.’ Kag ihumlad nila ang panapton sa atubangan sang mga tigulang sang banwa. 18Niyan dakpon sang mga tigulang sadto nga banwa ang lalaki kag silotan sia; 19kag pabayaron nila sia sing isa ka gatus ka siclo nga pilak, kag ihatag sila sa amay sang pamatan-on nga babayi, bangud nga nagpalapnag sia sing malaut nga kabantugan sa isa ka ulay sang Israel; kag sia mangin-asawa niya; indi niya sia masikway sa tanan niya nga adlaw. 20Apang kon ini nga butang matuud, nga wala makita ang mga tanda sang pagkaulay sa pamatan-on nga babayi, 21niyan dalhon nila sa gowa ang pamatan-on nga babayi sa ganhaan sang balay sang iya amay, kag ang mga lalaki sa iya banwa magabato sa iya sa kamatayon, bangud nga naghimo sia sing kabuangan sa Israel sa pagkamahilawason sa balay sang iya amay; sa amo ipahilayo mo ang malaut gikan sa tunga mo.
22“Kon makit-an ang isa ka lalaki nga nagahulid sa isa ka babayi nga minyo, niyan sila nga duha patyon, ang lalaki nga naghulid sa babayi, kag ang babayi; sa amo ipahilayo mo ang malaut gikan sa Israel.
23“Kon may dalaga nga ulay nga kalaslon sa bana, kag makita sia sang isa ka lalaki sa sulud sang banwa kag maghulid sa iya, 24niyan dalhon ninyo sila nga duha sa gawang sadto nga banwa, kag batohon ninyo sila sa kamatayon, ang dalaga bangud nga wala sia magsinggit nga yara sia sa banwa, kag ang lalaki bangud nga ginpapaubus niya ang asawa sang iya isigkatawo; sa amo ipahilayo mo ang malaut gikan sa tunga mo.
25“Apang kon makit-an sang lalaki sa latagon ang dalaga nga kalasalon, kag luguson sia sang lalaki kag maghulid sa iya, niyan ang lalaki lamang nga naghulid sa iya patyon. 26Apang ang dalaga indi mo pag-anhon; wala sing sala sa dalaga nga takus sa kamatayon, kay subong sang isa ka lalaki nga nagatindug batok sa iya isigkatawo kag nagapatay sa iya, amo man ini nga butang; 27kay nakita niya sia sa latagon, kag nagsinggit ang dalaga nga kalasalon kag wala sing bisan sin-o nga magaluwas sa iya.
28“Kon makit-an sang isa ka lalaki ang isa ka dalaga nga ulay nga indi kalaslon, kag dakpon sia kag maghulid sa iya, kag masapwan sila, 29niyan ang lalaki nga naghulid sa iya maghatag sa amay sang dalaga sing kalim-an ka siclo nga pilak, kag sia mangin-iya asawa, bangud nga ginpapaubus niya sia; indi niya masikway sia sa tanan niya nga adlaw.#Ex. 22:16-17.
30“Ang isa ka lalaki dili magkuha sang asawa sang iya amay, kag dili magbukas sang sayal sang iya amay.#Lev. 18:8; 20:11; Deut. 27:20.
Currently Selected:
DEUTERONOMIO 22: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
