DEUTERONOMIO 23

Ang mga Ginsikway gikan sa Katilingban

1“Ang napilasan sa iya mga lagak ukon nautdan sang iya kinatawo dili magsulud sa katiponan sang Ginoo.

2“Ang unon dili magsulud sa katiponan sang Ginoo; bisan tubtub sa ikapulo nga kaliwatan wala sing bisan sin-o nga iya nga magsulud sa katiponan sang Ginoo.

3“Ang Amonhon kag ang Moabnon dili magsulud sa katiponan sang Ginoo;#Neh. 13:1-2. bisan tubtub sa ikapulo nga kaliwatan wala sing bisan sin-o nga ila nga magsulud sa katiponan sang Ginoo sa gihapon; 4bangud nga wala sila magsugata nga may tinapay kag may tubig sa inyo sa dalanon, sang naggowa kamo gikan sa Egipto, kag bangud nga ginhinakayan nila batok sa imo si Balaam nga anak ni Beor nga gikan sa Petor sang Mesopotamia, sa pagpakamalaut sa imo.#Num. 22:1-6. 5Wala sing sapayan ang Ginoo nga imo Dios indi buut magpamati kay Balaam; kondi ang Ginoo nga imo Dios nagbaylo sang pagpakamalaut sa pagpakamaayo sa imo,#Num. 23:7–24:9. bangud nga ginhigugma ka sang Ginoo nga imo Dios. 6Dili mo pagtinguhaon ang ila kalinongan kag kauswagan sa tanan mo nga adlaw sa gihapon.

7“Dili mo pagkangil-aran ang Edomnon, kay sia utud mo; dili mo pagkangil-aran ang Egiptohanon, bangud nga manlulugayaw ka sa iya duta. 8Ang mga anak nga matawo sa ila sa ikatlo nga kaliwatan magsulud sa katiponan sang Ginoo.

Ang mga Kasogoan nahanungud sang Pagkatinlo

9“Kon maggowa ka sa dologan batok sa imo mga kaaway niyan maglikaw ka sa tagsa ka butang nga malaut.

10“Kon sa tunga nimo may lalaki nga dimatinlo bangud sang nahanabu sa iya sa gab-i, niyan maggowa sia gikan sa dologan, dili sia magsulud sa dologan; 11apang, kon mag-abut na ang kagab-ihon, magpaligos sia sa tubig, kag kon matunud na ang adlaw, magsulud sia sa dologan.

12“Magbutang ka man sing duug sa gowa sang dologan diin magakadto ka sa gowa; 13kag magdala ka sing pala upud sa imo mga hinganiban; kag kon magkatinkatin ka sa gowa, ikutkut mo ini, kag magliso kag magtabon sang naggowa sa imo. 14Kay ang Ginoo nga imo Dios nagalakat sa tunga sang imo dologan, sa pagluwas sa imo kag sa pagtugyan sang imo mga kaaway sa atubangan mo, busa ang imo dologan magbalaan, agud nga indi sia makakita sing mahigko nga butang sa imo, kag magtalikod sa imo.

Mga Kasogoan nahanungud sang Pagsilinayo sang Tawo

15“Dili mo pag-itugyan sa iya agalon ang ulipon nga nagdangup sa imo gikan sa iya agalon; 16magpuyo sia upud sa imo, sa tunga nimo, sa duug nga pilion niya sa sulud sang isa sang imo mga gawang, diin nahamut-an niya sing maayo gid; dili mo sia pagpiguson.

17“Magwala sing makihilawason sa babayi nga mga anak sang Israel,#Lev. 19:29. kag magwala sing Sodomanhon sa lalaki nga mga anak sang Israel. 18Dili ka magdala sang hinakay sang makihilawason nga babayi, ukon sang sohol sang ido, sa balay sang Ginoo nga imo Dios tungud sa bisan ano nga panaad; kay sila nga duha kangil-aran sa Ginoo.

19“Dili ka magpahulam nga may saka sa imo utud, saka sa cuarta, saka sa kalan-on, saka sa bisan ano nga butang nga ginapahulam nga sakaan. 20Sa dumuloong makapahulam ka nga may saka, apang sa imo utud dili ka magpahulam nga may saka;#Ex. 22:25; Lev. 25:36-37; Deut. 15:7-11. agud nga pakamaayohon ka sang Ginoo nga imo Dios sa tanan nga buluhaton sang imo kamut sa duta nga sudlan mo sa pagtag-iya sa iya.

21“Kon magsaad ka sa Ginoo nga imo Dios, dili ka magpalantang sa pagbayad sini;#Num. 30:1-16; Mat. 5:33. kay sa pagkamatuud kinahanglanon ini sa imo sang Ginoo nga imo Dios, kag manginsala ini sa imo. 22Apang kon magdumili ka sa pagsaad, indi sala ini sa imo. 23Ang maggowa sa imo bibig bantayan mo kag himoon, sono sa ginsaad mo sa Ginoo nga imo Dios, isa ka halad-nga-kinabubut-on nga ginsaad mo sang imo baba.

24“Kon magsulud ka sa ulubasan sang imo isigkatawo, niyan makakaon ka sang uvas sa imo kabulusgan sa imo kaugalingon nga luyag, apang dili magsulud sing bisan ano sini sa imo suludlan. 25Kon magkadto ka sa alanyon nga uyas sang imo isigkatawo, niyan makapangutol ka sang mga uhay, apang dili ka maggamit sing garab sa alanyon nga uyas sang imo isigkatawo.

Currently Selected:

DEUTERONOMIO 23: ABHIL82

Highlight

Copy